ایران کا سعودی عرب پر جدہ میں ہونے والے او آئی سی کے اجلاس میں شرکت سے روکنے کا الزام


ایران سعودی

ایران کی وزارت خارجہ نے الزام لگایا ہے کہ سعودی عرب نے اسلامی ممالک کی تعاون تنظیم (او آئی سی) کی ایک میٹنگ میں ایرانی مندوبین کو شرکت کرنے سے روک دیا ہے۔

یہ میٹنگ پیر کو جدہ میں منعقد ہو رہی ہے اور اس میں مشرق وسطیٰ میں امریکی صدر ڈونلڈ ٹرمپ کے ’مشرق وسطیٰ امن کے منصوبے‘ پر غور کیا جانا ہے۔

خبررساں ادارے روئٹرز کے مطابق وزارت خارجہ کے ترجمان عباس موسوی نے کہا ہے کہ سعودی حکام نے ایران کی جانب سے میٹنگ میں شرکت کرنے والے مندوبین کے لیے ویزے جارے نہیں کیے۔

سعودی عرب کی جانب سے اس کے بارے میں فوری طور پر کوئی وضاحت سامنے نہیں آئی ہے۔

یہ بھی پڑھیے

’اسرائیل، فلسطین امن منصوبہ شرمناک اور قابل نفرت ہے‘

ایران اور سعودی عرب دست و گریباں کیوں؟

’دنیا مشرقی یروشلم کو فلسطین کا دارالحکومت تسلیم کرے‘

عباس موسوی نے ایرانی نیوز ایجنسی فارس کو بتایا: ‘سعودی عرب کی حکومت نے ایرانی مندوبین کو او آئی سی کے ہیڈکوارٹر میں صدر ٹرمپ کے منصوبے پر غور کرنے والی میٹنگ میں شرکت سے باز رکھا۔’

انھوں نے کہا کہ ایران نے او آئی سی میں شکایت درج کی ہے اور سعودی عرب پر تنظیم کا ہیڈکوارٹر ہونے اور میزبان ملک ہونے کے اختیارات کا ناجائز فائدہ اٹھانے کا الزام لگایا ہے۔

عباس موسوی

ایرانی حکام نے اسرائیل اور فلسطین کے درمیان جھگڑے کو حل کرنے کے لیے صدر ٹرمپ کے منصوبے پر تنقید کی ہے اور گذشتہ ہفتے اس کے باضابطہ اعلان کے بعد اسے ناقابل عمل قرار دیا تھا۔

دوسری جانب فلسطینی قیادت نے بھی اس منصوبے کو یہ کہتے ہوئے مسترد کر دیا ہے کہ وہ بہت زیادہ اسرائیل کے حق میں ہے اور اس کے تحت انھیں ایک قابل عمل آزاد ریاست حاصل نہیں ہوگی۔

خیال رہے کہ سعودی عرب اور ایران میں کافی عرصے سے پراکسی جنگ جاری ہے اور دونوں مشرق وسطی میں اپنی سربلندی کے لیے ایک دوسرے کے مقابلے میں ہیں۔ وہ شام اور یمن میں مخالف گروہوں کی حمایت کر رہے ہیں۔

خیال رہے کہ اس سے قبل ملائشیا میں جب مسلم ممالک کے رہنماؤں کی کانفرنس ہوئی تھی اس میں ایران نے شرکت کی تھی لیکن سعودی عرب نے وہاں جانے سے گریز کیا تھا اور اس نے دوسرے ممالک پر بھی مبینہ طور پر دباؤ ڈالا تھا کہ وہ اس میں شرکت نہ کریں۔

یاد رہے کہ پاکستان نے اس کانفرنس میں شرکت کرنے کے وعدے کے باوجود آخری وقت میں معذرت کر لی تھی۔


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32294 posts and counting.See all posts by british-broadcasting-corp