#coronavirus: چین میں نومولود بچے میں کورونا وائرس کی تشخیص
چین میں پیدا ہونے والے ایک بچے میں پیدائش کے صرف 30 گھنٹے بعد کورونا وائرس کی تشخیص ہوئی ہے۔ سرکاری میڈیا کے مطابق یہ بچہ کورونا وائرس سے متاثر ہونے والا اب تک کا سب سے کم عمر فرد ہے۔
یہ بچہ دو فروری کو ووہان کے ایک مقامی ہسپتال میں پیدا ہوا، جو کہ اس وبا کا مرکز ہے۔
بچے کی پیدائش سے قبل بچے کی والدہ کے ٹیسٹ کیے گئے تھے جو مثبت آئے تھے تاہم ابھی تک یہ واضح نہیں ہو سکا کہ یہ بیماری کیسے منتقل ہوئی۔
اس وائرس سے متاثرہ افراد میں بچوں کی تعداد کم ہی ہے تاہم اس سے اب تک 563 افراد ہلاک جبکہ 28 ہزار اٹھارہ افراد متاثر ہو چکے ہیں۔
یہ بھی پڑھیے
کورونا وائرس: ووہان میں لاک ڈاؤن، شہری پریشان
کیا ماسک آپ کو کورونا وائرس سے بچا سکتا ہے؟
کیا کورونا وائرس ایک عالمی وبا بن سکتا ہے؟
چین کے نیشنل ہیلتھ کمیشن کے مطابق ہلاک ہونے والے 80 فیصد افراد کی عمریں 60 سال سے زائد تھیں جبکہ ان 80 فیصد افراد میں سے 75 فیصد وہ تھے جو پہلے ہی کسی نہ کسی بیماری کا شکار تھے۔
سرکاری میڈیا نے بدھ کے روز یہ اطلاع دی کہ کورونا وائرس کے ساتھ پیدا ہونے والے اس بچے کا وزن سوا تین کلو ہے اور اس کی حالت اب ٹھیک ہے جبکہ اسے زیر مشاہدہ رکھا گیا ہے۔
ایک سینئر معالج نے ہانگ کانگ کے اخبار ساؤتھ چائنہ مارننگ پوسٹ کو بتایا کہ یہ کیس اشارہ ہے کہ ’ہمیں وائرس کے ممکنہ نئے ٹرانسمیشن روٹ کے بارے میں فکر مند ہونے کی ضرورت ہے۔‘
یہ وائرس دوسرے ممالک میں بھی پھیل چکا ہے اور چین سے باہر اس سے متاثرہ 191 کیس سامنے آئے ہیں تاہم ان میں ہلاکتوں کی تعداد صرف دو ہے۔
چین کے علاوہ دیگر ممالک میں کورونا وائرس کے بڑھتے ہوئے کیسز کے پیشِ نظر عالمی ادارہ صحت (ڈبلیو ایچ او) اسے ایک عالمی ایمرجنسی قرار دے چکا ہے۔
ڈبلیو ایچ او کے سربراہ ٹیڈروس اڈہانم نے بدھ کے روز تین ماہ کی جوابی منصوبہ بندی کے لے 675 ملین ڈالر کے فنڈ کی اپیل کی ہے۔
واضح رہے کہ چین کے صوبے ووہان میں کورونا وائرس کی وبا سے نمٹنے کے لیے ایک ہزار بستروں کے ایک ہسپتال کی تعمیر صرف دس روز میں مکمل کی گئی ہے۔
- ترکی کے ’پاور ہاؤس‘ استنبول میں میئر کی نشست صدر اردوغان کے لیے اتنی اہم کیوں ہے؟ - 28/03/2024
- مولی دی میگپائی: وہ پرندہ جس کی دوستی کتے سے کرائی گئی اور اب وہ جنگل جانے پر راضی نہیں - 28/03/2024
- ماسکو حملے میں ملوث ایک تاجک ملزم: ’سکیورٹی افسران نے انھیں اتنا مارا کہ وہ لینن کی موت کی ذمہ داری لینے کو تیار ہو سکتا ہے‘ - 28/03/2024
Facebook Comments - Accept Cookies to Enable FB Comments (See Footer).