محبت اندھی ہوتی ہے: نابینا انڈین جوڑے کے اندھے پیار کی کہانی
</figure><strong>کہاوت ہے کہ ’پیار اندھا ہوتا ہے‘ لیکن جب دو نابینا لوگ آپس میں ملتے ہیں تو پھر کیا ہوتا ہے؟ </strong>
’یہ ایک الگ طرح کا پیار ہوتا ہے، ایسا پیار جس میں ظاہری شکل و صورت کی کوئی اہمیت نہیں، یہ پیار ظاہر سے بالاتر ہوتا ہے۔‘ یہ الفاظ ہیں انڈیا کے ایوارڈ یافتہ فوٹوگرافر نیرج گیرا کے۔
انھوں نے اپنی ایک حالیہ فوٹو سیریز ’مقدس پیار‘ میں 13 تصاویر میں ایک نابینا جوڑے کی کہانی بیان کی ہے۔
گیرا نے بی بی سی کو بتایا کہ ’میں گذشتہ سال جولائی کے مہینے میں دلی کے کناٹ پلیس میں تھا جب میری نظر ایک خوبصورت جوڑے پر پڑی۔ وہ ہاتھوں میں ہاتھ ڈالے، باتیں کرتے ہوئے، مسکراتے ہوئے جا رہے تھے۔ ‘
ایک شخص اس جوڑے کی کناٹ پلیس میٹرو سٹیشن تک رہنمائی کر ہا تھا۔ گیرا کا کہنا ہے کہ انھوں نے آگے بڑھ کر اس جوڑے کو سٹیشن تک جانے میں مدد کی پیشکش کی۔
اس دوران ان میں بات چیت شروع ہو گئی۔ گیرا نے ان سے پوچھا کہ کیا وہ اپنی کہانی سنانا چاہیں گے تو انھوں نے ’ہاں‘ میں سر ہلا دیا۔
</figure><p>’سیریز ’مقدس پیار‘ 21 سالہ دیپک یادو اور آرتی چورسیا کی کہانی ہے جو فیس بک پر ملے تھے۔
دیپک نے بتایا کہ ان دونوں کے سمارٹ فون پر ایک ایپ ہے جو نابینا لوگوں کے لیے بنی ہے۔ اس ایپ سے انھیں آواز کی صورت میں فیڈ بیک ملتا ہے۔
دیپک نے بتایا کہ سنہ 2018 میں جون کے مہینے میں ان کے نوٹیفیکیشن میں آرتی کا نام دوستی کے لیے تجویز ہوا۔ انھوں نے بی بی سی کو بتایا کہ ان کے اور آرتی کے درمیان بہت کچھ ملتا جلتا تھا اس لیے انھوں نے فیس بک پر دوستی کی درخواست بھیج دی۔
آرتی نے جواب دینے میں پورے دو ہفتے لیے۔ ان کا کہنا ہے کہ وہ دیپک کو نہیں جانتی تھیں اس لیے انھوں نے سوچنے میں وقت لیا۔ بالآخر انھوں نے دیبپک کو دوستوں کی فہرست میں شامل کر لیا۔
جلد ہی ان دونوں کے درمیان پیغامات کا تبادلہ شروع ہو گیا اور پھر بات فون نمبروں کے تبادلے تک پہنچ گئی۔
دیپک نے بتایا کہ ان کی پہلی بار فون پر بات 31 جولائی کو ہوئی اور آرتی نے جملہ ختم کرتے ہوئے کہا کہ جو 90 منٹ تک جاری رہی۔
پھر ان کے درمیان بات چیت کا سلسلہ شروع ہو گیا اور ایک روز آرتی نے دیپک سے پوچھ لیا کہ کیا اس کی کوئی گرل فرینڈ ہے؟ انھوں نے ہنستے ہوئے کہا کہ دیپک کا جواب تھا کہ نہیں یہ خانہ خالی ہے۔ اس کے بعد آرتی کو اپنے جذبات کے اظہار میں زیادہ وقت نہیں لگا۔ یہ 10 اگست کو ہوا۔
</figure><p>آرتی نے بتایا: ’ہم فون پر بات کر رہے تھے۔ میری ایک دوست بھی میرے ساتھ تھی جس نے مجھے آئی لو یو کہنے کا چیلنج دیا تو میں نے کہہ دیا۔‘
دیپک نے کہا کہ وہ یہ سن کر دنگ رہ گئے اور ایک منٹ تک ان سے کچھ نہیں بولا گیا۔ ’مجھے لگا کہ یہ تو میری لائن تھی، یہ کیسے کہہ سکتی ہے؟ پھر میں نے بھی اسے وہی کہہ دیا۔‘
دو مہینے کہ بعد دیپک آرتی کے ہاسٹل گئے اور یہ ان کی پہلی ملاقات تھی۔ اس کے بعد سے دونوں کی اکثر ملاقات ہونے لگی۔ ان کا تعلق بہت گہرا ہو چکا ہے۔
دیپک نے کہا کہ اب تک یہ کہانی ان کے گھر والوں سے چھپی ہوئی ہے۔ وہ اپنے گھر والوں کے بارے میں کہتے ہیں کہ وہ بہت قدامت پسند خیالات رکھتے ہیں۔
’میرے والد کہتے ہیں کہ پیار ویار سے دور رہو، اس کے لیے بعد میں بہت وقت ہوگا ابھی اپنی تعلیم اور کیریئر پر دھیان دو۔‘
</figure><p>آرتی نے کہا کہ ان کے والد کے علاوہ ان کے زیادہ تر گھر والوں کو ان کے پیار کے بارے میں معلوم ہے۔ میں نے ان سے پوچھا کہ ان کے رشتے کے بارے میں جب وہ بی بی سی کی رپورٹ دیکھیں گے تو پھر کیا ہوگا؟
دیپک کا جواب تھا کہ ’میں تو چاہتا ہوں کہ ایسا ہو۔‘
جبکہ آرتی نے کہا کہ جب وہ میڈیا میں اس رشتے کی مثبت تصویر دیکھیں گے تو ان کے لیے اسے قبول کرنا آسان ہوگا۔ آرتی اور دیپک آجکل نوکری کی تلاش میں ہیں تاکہ جلد اکٹھے زندگی شروع کر سکیں۔
آرتی نے کہا کہ ’جیسے ہی ہم میں سے کسی ایک کو نوکری ملے گی ہم منگنی کر لیں گے۔ لیکن کئی بار ڈر لگتا ہے کہ کہیں شادی ہونے تک ہم بوڑھے نہ ہو جائیں۔‘
تصاویر: نیرج گیرا
- امریکی محکمہ خارجہ کی سالانہ رپورٹ میں عمران خان اور ان کی جماعت کے بارے میں کیا کہا گیا اور کیا یہ پاکستان کے لیے مشکلات کھڑی کر سکتا ہے؟ - 25/04/2024
- چڑیا گھر میں سات سال تک نر سمجھا جانے والا دریائی گھوڑا مادہ نکلی - 25/04/2024
- امریکہ کی جانب سے فراہم کردہ 61 ارب ڈالر کی عسکری امداد یوکرین کو روس کے خلاف کیسے فائدہ پہنچائے گی؟ - 25/04/2024
Facebook Comments - Accept Cookies to Enable FB Comments (See Footer).