بھٹو کی پھانسی میں امریکیوں کا کردار


”مسٹر بھٹو ہم تمھیں ایک عبرت ناک مثال بنا دیں گے“ اپنی بات کی مزید وضاحت کرتے ہوئے انھوں نے ایک اور مثال دی۔
”مسٹر بھٹو! جب سامنے سے ریل گاڑی آتی دکھائی دے تو عقلمند آدمی پٹڑی سے ہٹ جاتا ہے“
ذوالفقار بھٹو نے صرف مسکرانے پر اکتفا کیا اور ڈاکٹر ہنری کسنجر کو اپنا موقف منوائے بغیر واپس جانا پڑا۔

بھٹو اور امریکی وزیرخارجہ ڈاکٹر ہنری کسنجر کے درمیان ہوئے اس مکالمے کو سابق چیف آف سٹاف ڈی جی آئی ایس آئی بریگیڈیئر (ر) سید احمد ارشاد ترمذی اپنی کتاب ”حساس ادارے“ میں لکھا ہے

وہ لکھتے ہیں کہ 9 اگست 1976 کو امریکی وزیرخارجہ ڈاکٹر کسنجر لاہور میں مسٹر بھٹو سے ایک خصوصی ملاقات کی تاکہ پاکستان کو ایٹمی ٹیکنالوجی کے حصول اور فرانس سے ایٹمی ریپراسیسنگ پلانٹ کے سودے سے روکا جا سکے حالانکہ اس وقت تک پاکستان فرانس سے ایٹمی پلانٹ کے حصول کے لیے باقاعدہ معاہدہ کر چکا تھا اور عالمی ایٹمی توانائی اتھارٹی کو اس ضمن میں تمام تحفظات کی ضمانت دے چکا تھا۔ اس ملاقات کے دوران کسنجر کو بخوبی اندازہ ہو گیا کہ بھٹو کا فیصلہ اٹل ہے اور وہ ہر حال میں پاکستان کو ایٹمی قوت بنانا چاہتا ہے۔

ذوالفقار بھٹو پاکستان کے پہلے منتخب وزیراعظم تھے۔ انھوں نے جب اقتدار سنبھالا اس وقت پاکستان اپنے شدید ترین بحران سے گزر رہا تھا پاکستان کا وجود پارہ پارہ ہو چکا تھا زخموں سے خون رس رہا تھا پاکستانی قوم کے حوصلے پست تھے۔ قوم کی نظریں بھٹو پر جمی ہوئی تھی انھیں یقین تھا کہ بھٹو اپنی ذہانت اور کرشماتی شخصیت کی بدولت پاکستان کو بحران سے نکال لیں گے۔ بھٹو نے قوم کی امیدوں کو ٹوٹنے نہیں دیا انھوں نے اپنے تئیں ایک دم توڑتے نظام کے وجود میں نئی روح پھونکنے کے لیے بعض انقلابی اصلاحات کا اعلان کیا مایوسی اور نامرادی کے اندھیروں سے امید کی کرن پھوٹنے لگی۔

بھٹو خود خارجہ پالیسی کے ماہر تھے۔ ان کی کامیاب خارجہ پالیسی کی بدولت پاکستان کو بہت جلد قوموں کی عالمی برداری میں کھویا ہوا اعزاز واپس مل گیا۔ اپنی ذہانت اور منصوبہ بندی سے وہ اسلامی اور تیسری دنیا کے متعدد ممالک کی پالیسیوں پر نہ صرف اثرانداز ہو رہے تھے۔ بلکہ ان کی کوشش تھی تیسری دنیا ایک قوت بن کر ابھرے اور روس اور امریکہ کے مقابلے میں اپنے مفادات کی خود حفاظت کر سکے۔ بھٹو کی سرگرمیوں نے علاقے میں امریکی مفادات کو سخت گزند پہنچانا شروع کر دیا تھا جس کی وجہ سے عالمی اسٹیبلشمنٹ نے مقامی اسٹیبلشمنٹ کو ساتھ ملا کر بھٹو کو اقتدار سے معزول کرنے کا منصوبہ بنایا۔

بریگیڈیئر ترمذی رقمطراز ہیں کہ اس بات میں کوئی ابہام باقی نہیں تھا متعدد سفارتکار بھٹو کے خلاف اس مہم میں نہ صرف ملوث تھے۔ بلکہ اس کی مکمل نگرانی بھی کرتے تھے۔ لاہور میں امریکی قونصلیٹ جنرل کے سیاسی آفسیر جین این گوہن کا کردار اس حوالے سے خاصا فعال تھا کئی مقامی رہنما اس کی بھرپور امداد کر رہے تھے۔ اور مرکزی سطح کے چند سیاستدانوں سے مل کر وہ ایک سیاسی دلال کا کردار ادا کر رہا تھا۔ خاص طور پر جماعت اسلامی کے رہنما مودودی اور شیرانوالہ گیٹ کے جمعیت اسلام کے رہنما مولانا عبید اللہ نور کے ساتھ جین نے مسلسل رابطوں اور ملاقاتوں کا اہتمام کر رکھا تھا۔ یہ جین ہی تھا جس نے لاہور سے اسلام آباد میں امریکی سفارتخانے کے چیف آف پولٹیکل افسر مسٹر ہاورڈ بی شیفر کو یہ پیغام دیا تھا کہ ”پارٹی ختم ہو گئی مال لٹ گیا“ جس کے جواب میں بھٹو نے مشہور جملہ کہا تھا ”پارٹی ابھی ختم نہیں ہوئی یاد رکھو ہاتھی کے کان بہت لمبے ہوتے ہیں“۔

جس رات ضیا الحق نے مارشل لا لگایا اور بھٹو کو اقتدار سے نکال باہر کیا اس کے بارے میں الطاف حُسین قریشی اپنی کتاب ”ملاقاتیں کیا کیا“ میں لکھتے ہیں کہ میرے سوال کے جواب میں ضیا الحق نے کہا کہ جس رات مارشل لا لگانا تھا لاکھوں خدشات اور ہزاروں وسوسے تھے۔ یہ اندیشہ بھی تھا کہ ہمارے منصوبے کا اگر کسی کو علم ہو گیا تو کچھ بھی ہو سکتا ہے یہ راز چند افراد تک محدود تھا اور وقت گزرنے کے ساتھ ساتھ عجیب طرح کا احساس مجھ پر طاری ہوتا جا رہا تھا۔ خیال کی ایک لہر اُٹھی ضیا تم کہیں غلطی پر تو نہیں؟ کیا تم پاکستان کو مارشل لا سے بحفاظت گزار سکو گے؟ میں نے وضو کیا اور خشوع وخضوع سے نماز ادا کی اور ایسی لذت محسوس کی جو پہلے کبھی میسر نہ ہوئی تھی۔

قریشی صاحب میری زندگی میں آپ کو قناعت اور درویشی نظر آئے گی اللہ تعالیٰ نے مجھ پر اپنی رحمتوں کی بارش کی اور اعلٰی مناصب عطا کیے اللہ تعالیٰ نے مجھ سے وہ کام لیا جو یقیناً ایک قابل فخر کارنامے سے یاد رکھا جائے گا۔

میں جمہوریت پر غیر متزلزل یقین رکھتا ہوں فوجی حکومت ایک طرف انتہائی ناگزیر مرحلہ ہے اسے زندگی کا معمول نہیں بنایا جا سکتا ہم اقتدارِ پر قابض رہنے کے لیے نہیں اقتدار منتقل کرنے کے لیے آئے ہیں عام انتخابات انشا اللہ 18 اکتوبر کو ہوں گے خدا اور پوری قوم کے ساتھ عہد کیا ہوا ہے اسے پورا کرنے کی ہر ممکن کوشش کروں گا میری دعا ہے اللہ تعالیٰ ہمیں بصیرت و قوت عطا کرے اور ہر قدم پر رہنمائی کرتا رہے بھٹو کے ساتھ آئین اور قانون کے مطابق انصاف کیا جائے گا۔

بریگیڈیئر ترمذی لکھتے ہیں کہ جن دنوں پاکستان سپریم کورٹ میں نواب محمد احمد خان کے قتل کے الزام میں لاہور ہائی کورٹ سے دی جانے والی سزائے موت کے خلاف ذوالفقار علی بھٹو کی اپیل زیربحث تھی ہمارے ایک دوست جسے یو ایس آئی ایس کے ٹیلکس روم تک رسائی تھی مجھے موسٹ ارجنٹ کا خصوصی کوڈڈ پیغام بھجوایا۔ پیغام کی اہمیت کو سمجھتے ہوئے فوری طے شدہ جگہ پر پہنچا۔

راولپنڈی کے راجہ بازار سے جا کر دوست سے آنکھوں ہی آنکھوں میں گفتگو کی اس نے ایک کاغذ ریڑھی پر رکھے کوٹ کی جیب میں ڈال دیا میں نے فوری وہ کوٹ خریدا اور پرچہ لے کر قریب کاپی شاپ پر پہنچا فوٹو کاپی کروا کر اصل اسے واپس کیا۔ دفتر پہنچ کر جب اسے ڈی کوڈ کیا تو مجھے پڑھ کر شدید حیرت ہوئی کہ واشنگٹن سے پاکستان میں اپنے دفتر میں یہ ہدایت دی گئی کہ بھٹو کو پھانسی کے تختے تک پہنچانا یقینی بنایا جائے۔ اس پیغام میں بعض جنرلز کی ریٹائرمنٹ اور تبادلوں کی بھی ہدایت تھی۔

بھٹو صاحب کو یقین تھا اور اعتماد بھی کہ اُن جیسے بین الاقوامی حیثیت اور اہمیت کے حامل لیڈر کو کوئی فوجی آمر پھانسی لگانے کی جرأت نہیں کرسکے گا۔ جبکہ جنرل ضیا الحق کو یقین تھا کہ اُن کی بقا پھر حالات نے جنرل ضیا الحق کے حق میں فیصلہ دے دیا۔ سقراط کو جب زہر کا پیالہ دیا گیا تو وہ ہنس پڑا اس کے شاگردوں نے پوچھا استاد محترم موت آپ کے سر پر منڈلا رہی ہے زہر کا پیالہ پی کر آپ مر جائیں گے اور آپ ہنس رہے ہیں سقراط نے جواب دیا کون کہتا ہے کہ میں مر جاؤں گا۔ گلی کوچوں، چوک چوراہوں اور درسگاہوں میں میرے دیے گئے درس جب تک باقی رہیں گے میں زندہ رہوں گا مریں گے یہ حکمران جو مجھے زہر پینے پر مجبور کر رہے ہیں آج کئی ہزار سال گزرنے کے بعد بھی سقراط زندہ ہے اور باقی گمنام ہیں۔

بھٹو نے شاید سقراط کے ادرشوں کو پڑھ رکھا تھا اس لیے انھوں نے معافی نامے پر دستخط نہیں کیے چار اپریل کا سورج نکلا تو اسلامی دنیا کی ایک عظیم شخصیت اور پاکستانی سیاست کا چمکتا ہوا چاند ہمیشہ ہمیشہ کے لیے زندگی کے منظر سے اوجھل ہوچکا تھا مگر وہ تاریخ میں زندہ ہے اور اسے دار پر لٹکانے والوں کی قبریں آج بھی ویران ہیں۔

بشارت راجہ

Facebook Comments - Accept Cookies to Enable FB Comments (See Footer).

بشارت راجہ

بشارت راجہ شہر اقتدار سے پچھلی ایک دہائی سے مختلف اداروں کے ساتھ بطور رپورٹر عدلیہ اور پارلیمنٹ کور کر رہے ہیں۔ یوں تو بشارت راجہ ایم فل سکالر ہیں مگر ان کا ماننا ہے کہ علم وسعت مطالعہ سے آتا ہے۔ صاحب مطالعہ کی تحریر تیغ آبدار کے جوہر دکھاتی ہے۔ وہ کہتے ہیں کہ وسعت مطالعہ کے بغیر نہ لکھنے میں نکھار آتا ہے اور نہ بولنے میں سنوار اس لیے کتابیں پڑھنے کا جنون ہے۔

bisharat-siddiqui has 157 posts and counting.See all posts by bisharat-siddiqui

Subscribe
Notify of
guest
0 Comments (Email address is not required)
Inline Feedbacks
View all comments