سوشل میڈیا پر بحث: ارطغرل کا کردار کس سیاسی شخصیت سے مشابہت رکھتا ہے؟
پاکستان میں جہاں ’میرے پاس تم ہو‘ کے کردار دانش کو لوگوں نے اب بھی دل سے لگا کر رکھا ہوا ہے، سعد کے ’عہد وفا‘ کی کہانیاں اب بھی سنائی جاتی ہیں تو یہ کوئی تعجب کی بات نہیں کہ ارطغرل کی جھلک اب پاکستانیوں کو اپنے سیاسی قائدین میں نظر آنے لگی ہے۔
پاکستان میں سینیما گھر بند ہیں، تفریحی مقامات ویران پڑے ہیں مگر ارطغرل غازی ڈرامے کے یوٹیوب چینل پر ایک نظر ڈالنے سے یہ اندازہ ہوتا ہے کہ پاکستانیوں کو شاید ان مشکل حالات میں اپنی بوریت مارنے کا ساتھی مل گیا ہے۔
’ٹی آر ٹی ارطغرل بائی پی ٹی وی‘ نامی یوٹیوب چینل پر اب تک 25 لاکھ کے قریب صارفین سبسکرائب کر چکے ہیں۔ یہ چینل 18 اپریل کو وجود میں آیا اور اب ارطغرل اور حلیمہ جیسے کرداروں کے مداحوں میں آئے روز اضافہ دیکھنے کو مل رہا ہے۔
ایسا ممکن نہیں کہ شہرت پانے والا ڈرامہ نشر کیا جا رہا ہو اور سامعین اسے دیکھ کر اپنے لب سی لیں۔ سوشل میڈیا پر صارفین اس ڈرامے کے کرداروں، کہانی پر بڑھ چڑھ کر تبصرے کرتے دکھائی دے رہے ہیں۔
یہ بھی پڑھیے
’آپ ہمارے ساتھ یہ کیسے کرسکتی ہیں حلیمہ باجی!‘
ترک ڈرامے ارطغرل کے مرکزی کردار حقیقت میں کون ہیں؟
’ارطغرل پر پاکستان میں اتنا اچھا ردِ عمل آیا کہ بیان نہیں کر سکتا‘
اور معاشرے کے ایک بڑے طبقے میں ڈرامے کی واہ واہ ہورہی ہو اور پاکستانی سیاستدان سوشل میڈیا پر ہونے والی اس بحث میں اپنا حصہ نہ ڈالیں یہ بھی ممکن نہیں۔
اس بات سے تو تقریباً سب ہی واقف ہیں کہ اس ڈرامے کے مداحوں میں وزیراعظم عمران خان کو بھی گنا جاتا ہے جو اس میں دکھائی گئی ’اسلامی تہذیب‘ کی تعریف کر چکے ہیں اور انہی کی ہدایت پر اسے سرکاری ٹی وی پر نشر کیا جارہا ہے۔
البتہ گذشتہ روز پاکستان مسلم لیگ ن سے تعلق رکھنے والی صوبائی اسمبلی کی رکن حنا پرویز بٹ نے بھی اس ڈرامے پر اپنی رائے دینے کے لیے سوشل میڈیا کا رخ کیا۔
https://twitter.com/hinaparvezbutt/status/1260717938115559424
حنا پرویز کو اپنی قائد مریم نواز کی قائدانہ صلاحیتوں کا اعتراف کرتے دیکھا گیا۔ ایک ٹویٹ میں انھوں نے لکھا کہ ’ارطغرل ڈرامہ دیکھ کر مجھے خیال آیا کہ مریم نواز صاحبہ بھی انھی خوبیوں کی مالک ہیں۔‘
اس ٹویٹ کے بعد سے سوشل میڈیا پر ایک طوفان برپا ہو گیا اور مسلم لیگ ن کے لوگ جہاں ڈرامے کے ہیرو کو اپنی قائد سے جوڑے جانے پر بے حد خوش نظر آئے وہیں مخالف سیاسی جماعتوں کے صارفین اپنے اپنے قائدین کے قصیدے پڑھتے نظر آئے۔
‘ارطغرل نے عمران خان اور مریم نواز کو ایک صفحے پر لانے میں مدد کی ‘
ارطغرل کے مختلف کرداروں میں لوگ موجودہ سیاسی شخصیات کو ڈھونڈنے لگے مگر بہت سے صارفین صرف اس بات میں دلچسپی لینے لگے کہ کون سا سیاسی قائد ارطغرل کی صحیح عکاسی کرتا ہے؟
صحافی اور اینکر پرسن فریحہ ادریس نے ٹوئٹر کے صارفین سے اس سوال پر ان کی رائے طلب کر ڈالی اور انتخاب کرنے کے لیے عمران خان اور مریم نواز کے علاوہ پاکستان پیپلز پارٹی کے چیئر مین بلاول بھٹو کا نام بھی شامل کر دیا۔
https://twitter.com/WordsBySakib/status/1261305101806907392
ثاقب نامی ایک صارف نے ٹویٹس کا ایک سلسلہ شائع کیا جس میں ڈرامے کے مختلف کردار جیسا کہ کُردوگلو، کارا توئے غار اورگوندودلو کی تصاویر کے ساتھ پاکستانی سیاستدانوں کی تصاویر لگائیں۔
ثاقب نے لکھا کہ یہ وہ سیاستدان ہیں جو اس ڈرامے کے کرداروں سے شکل اور صورت میں نہیں بلکہ عادات و سکنات میں مشابہت رکھتے ہیں۔
صحافی عباس ناصر نے عمران خان کی جماعت پاکستان تحریک انصاف کے رہنماؤں کی جانب سے اس ڈرامے کی حمایت اور حنا پرویز بٹ کی حالیہ ٹویٹ کی جانب اشارہ کرتے ہوئے مزاحیہ انداز میں لکھی ایک ٹویٹ شیئر کی۔
https://twitter.com/abbasnasir59/status/1260847148125560832
ان کا کہنا تھا کہ ’ارطغرل نے عمران خان اور مریم نواز کو ایک صفحے پر لانے میں مدد کی اور ایک مرتبہ پھر ترکی کے ’ڈرامائی دفاتر‘ اجنبی سا محسوس کرنے والے پاکستانیوں کو اکٹھا کررہا ہے۔‘
’ہمیں مقامی تاریخ کو فروغ دینا چاہیے‘
پاکستان تحریک انصاف کے حال ہی میں ترقی پانے والے وزیر اعظم کے معاون خصوصی برائے سیاسی مواصلات شہباز گِل نے بھی چند روز قبل ارطغرل ڈرامے سے متعلق عوام کو اپنی رائے سے آگاہ کیا۔
https://twitter.com/SHABAZGIL/status/1259061608619409409
اپنے بیانات کی وجہ سے میڈیا کی شہ شرخیوں میں رہنے والے شہباز گِل نے نو مئی کو اپنے ٹوئٹر ہینڈل سے لکھا کہ ڈرامہ ’ارطغرل غازی میں دکھایا گیا ہے کہ غدار پہلے حکومتی نظم و نسق چلاتے تھے اور جیسے ہی حالات خراب ہوتے یا ان کا احتساب ہونے کہ قریب آتا تو وہ دشمنوں کے پاس جا کر پناہ لیتے تھے۔‘
شہباز گِل نے یہ واضح نہیں کیا کہ ان کا اشارہ کس کی جانب تھا مگر صارفین خود ہی یہ نتیجہ اخذ کرتے دکھائی دیے۔
تحریک انصاف کے حمایتیوں نے جہاں سابق وزیر اعظم نواز شریف سے اس ٹویٹ کے تانے بانے جوڑے وہیں سعود نامی ایک صارف نے لکھا کہ ’یہاں شاعر پرویز مشرف کو طعنے مار رہا ہے۔‘
پاکستان پیپلز پارٹی کی رہنما نفیسہ شاہ اس بحث میں نہیں پڑیں کہ ارطغرل کے کردار میں کس سیاسی شخصیت کی جھلک کو دیکھا جاسکتا ہے۔
https://twitter.com/ShahNafisa/status/1259203680290701313
نفیسہ شاہ نے سماجی رابطے کی ویب سائٹ پر چند سوال اٹھائے کہ پاکستان ٹیلی وژن آخر ایک ترک ڈرامہ کیوں دکھا رہا ہے۔ ان کا کہنا تھا کہ اسے نجی چینیلز پر بھی تو دیکھا جا سکتا ہے۔
پاکستان ٹیلی وٰژن کے حوالے سے ان کا کہنا تھا کہ ’ہمیں مقامی تاریخ اور ٹیلنٹ کو فروغ دینا چاہیے۔‘
پاکستانی سیاست دان ان ڈراموں کا بھرپور فائدہ اٹھاتے ہوئے بعض اوقات صارفین کو ان ڈراموں میں موجود اخلاق پر مبنی پیغام دینے کے علاوہ اس سے حاصل ہونے والے سبق کا درس دیتے بھی دکھائی دیتے ہیں۔
ڈراموں کی بھر مار کے ساتھ یہ سلسلہ عنقریب اختتام پزیر ہوتا دکھائی نہیں دیتا۔
- انڈیا میں الیکشن کے پہلے مرحلے کا آغاز جہاں کروڑپتی امیدوار ووٹ کے لیے پیسے کے علاوہ سونا اور چاندی بھی استعمال کرتے رہے - 19/04/2024
- سڈنی شاپنگ مال حملہ: آسٹریلیا میں ’بہادری کا مظاہرہ‘ کرنے والے زخمی پاکستانی سکیورٹی گارڈ کو شہریت دینے پر غور - 19/04/2024
- مرنے سے قبل چند افراد کو اپنے وہ پیارے کیوں دکھائی دیتے ہیں جو پہلے ہی مر چکے ہوتے ہیں؟ قریب المرگ افراد کے تجربات - 18/04/2024
Facebook Comments - Accept Cookies to Enable FB Comments (See Footer).