کراچی طیارہ حادثہ: عینی شاہدین نے کیا دیکھا، تصاویر میں

  •  
  •  
  •  
  •  
  •  
  •  
  •  
  •  
  •  
  •  
  •  
  •  

حادثہ

Reuters

جمعہ کی دوپہر پاکستان انٹرنیشنل ایئر لائنز کا مسافر طیارہ کراچی ایئر پورٹ کے قریب ماڈل کالونی کے نزیک جناح گارڈن نامی آبادی پر گرا۔

سول ایوی ایشن کے ترجمان کے مطابق یہ ایئر بس اے 320 طیارہ لاہور سے کراچی آ رہا تھا کہ لینڈنگ سے قبل حادثے کا شکار ہو گیا۔

یاد رہے کہ پاکستان میں کوورنا کی وبا پھیلنے کے بعد اندرونِ ملک پروازوں کا سلسلہ دو ماہ تک معطل رہنے کے بعد حال ہی میں شروع ہوا ہے۔

حادثہ

EPA

طیارہ گرنے سے علاقے کے متعدد مکانات کو شدید نقصان پہنچا اور طیارے کی زد میں آنے والی گاڑیوں میں آگ لگ گئی۔

ٹی وی پر دکھائی دینے والی فوٹیج میں بھی جائے حادثہ سے دھوئیں کے کالے بادل اٹھتے دیکھے جا سکتے تھے۔

حادثے کی اطلاع ملتے ہی امدادی کارروائیاں شروع کر دی گئی ہیں اور حکام نے عوام سے اپیل کی ہے کہ وہ جائے حادثہ سے دور رہیں تاکہ امدادی کارروائیوں میں خلل پیدا نہ ہو۔

حادثہ

AFP

کراچی طیارہ حادثے کی عینی شاہد اور جناح گارڈن ماڈل کالونی کی رہائشی ڈاکٹر کنول ناظم نے بی بی سی کو بتایا کہ دوپہر پونے تین بجے انھیں ایک زوردار دھماکے کی آواز سنائی دی۔

ان کے مطابق جب انھوں نے گھر سے باہر نکل کر دیکھا تو ان کی گلی کی آخر میں ایک مسجد ہے جس کے ساتھ موجود تین گھروں سے کالے دھوئیں کے بادل اٹھ رہے تھے اور بہت سے لوگ اس جگہ کی طرف بھاگ رہے تھے۔

حادثہ

AFP

ڈاکٹر کنول کا کہنا تھا کہ چونکہ حادثے کی جگہ ان کے گھر کے بہت قریب تھی تو وہ لوگوں کی چیخ و پکار سن سکتی تھیں۔

ڈاکٹر کنول کے مطابق حادثے کے چند منٹ بعد ہی پولیس اور رینجرز جائے حادثہ پر پہنچ گئے اور علاقے کو لوگوں سے خالی کروا دیا۔

حادثہ

AFP

رضا نامی ایک اور عینی شاہد نے بی بی سی کو بتایا کہ وہ مسجد میں نماز پڑھ رہے تھے کہ لوگوں نے شور مچانا شروع کر دیا کہ ’جہاز آ رہا ہے، اس میں سے دھواں نکل رہا ہے۔‘

رضا نے بتایا کہ جہاز زمین سے آدھا کلومیٹر بھی اوپر نہیں ہوگا کہ ’وہ ایک دم آٹھ گھروں کے اوپر آ کر گرا‘، جو کاظم آباد کی آخری گلی اور بلال مسجد کی پہلی گلی ہے۔

حادثہ

Reuters

امدادی کارروائیوں کے بارے میں بات کرتے ہوئے انھوں نے کہا کہ ’ابھی تو امدادی کارکنان آگ بجھا رہے ہیں، کچھ زخمیوں کو گھروں سے نکالا بھی گیا ہے، آگ ٹھنڈی ہونے کے بعد ہی پتا چلے گا۔‘

محمد رضا کے مطابق ماڈل کالونی کی تقریباً „ہر گلی ایک سائیڈ سے جا کر بند ہوجاتی ہے۔ جس وجہ سے امدادی کاموں میں مشکلات کا سامنا ہوتا ہے۔ بار بار ٹریفک بند ہوجاتی ہے۔‘

حادثہ

AFP

صوبہ سندھ کے گورنر عمران اسماعیل نے ٹوئٹر پر ایک پیغام میں کہا ہے کہ جناح کالونی کے وہ رہائشی جن کے گھر طیارہ حادثے میں متاثر یا تباہ ہوئے ہیں انھیں قومی ایئر لائن ہوٹلوں میں ٹھہرائے گی۔

گورنر نے کہا کہ وزیر اعظم عمران خان نے پی آئی اے کو متاثرین کی فوری طور پر مدد کرنے کی ہدایت کی ہے۔

حادثہ

EPA

صوبہ سندھ کے دارالحکومت کراچی کے جناح ہسپتال کی ڈائریکٹر سیمی جمالی نے بی بی سی سے بات کرتے ہوئے بتایا کہ جس علاقے میں یہ طیارہ گرا ہے وہاں کے چار رہائشیوں کو زخمی حالت میں جناح ہسپتال پہنچایا گیا ہے۔

۔

Comments - User is solely responsible for his/her words

  •  
  •  
  •  
  •  
  •  
  •  
  •  
  •  
  •  
  •  
  •  
  •  

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 16633 posts and counting.See all posts by british-broadcasting-corp