شوبز ڈائری: سونو سود اصل زندگی کے ہیرو، سنی لیونی قرنطینہ میں
بالی وڈ اداکارہ سنی لیونی بھی آج کل قرنطینہ میں ہیں۔ رواں ہفتے ویب سائٹ ’بالی وڈ ہنگامہ‘ کے فریدون شہر یار کے ساتھ سکائپ پر بات چیت میں انھوں نے اس موضوع پر روشنی ڈالنے کی کوشش کی کہ لاک ڈاؤن کے بعد فلم میں محبت کے مناظر کیسے فلمائے جائیں گے۔
سنی کا کہنا تھا کہ فلم میں ہر کسی کو پیار محبت کے مناظر اچھے لگتے ہیں اور ہم دُعا کرتے ہیں کہ کورونا وائرس کی وبا ختم ہو اور ہم پہلے کی طرح کام کر سکیں۔
ایک سوال کے جواب میں سنی لیونی نے یہ بھی کہا کہ وہ عمران ہاشمی کے ساتھ کام کر کے خود کو خوش قسمت سمجھیں گی۔
کورونا اور فلم انڈسٹری کے بارے میں سنی کی یہ بات درست ہے کیونکہ اس وقت پیار تو دور کی بات ہاتھ ملانا بھی ممنوع ہے، اور اگر حالات ایسے ہی رہے تو سوچیں عمران ہاشمی کا کیا بنے گا؟
یہ بھی پڑھیے
بے چینی کو دور کرنے کے لیے کترینہ کیف کیا مشورہ دے رہی ہیں؟
کرینہ اور دیپکا کی کچے آموں کی تصاویر کا ماجرا کیا ہے؟
سلمان خان لاک ڈاؤن کس کے ساتھ گزار رہے ہیں؟
دنیا کے لاکھوں لوگوں کی طرح سلمان خان بھی گھر سے کام کر رہے ہیں۔ فرق یہ ہے کہ آج کل ان کا گھر ممبئی کے نزدیک پنویل میں ان کا فارم ہاؤس بنا ہوا ہے۔
یہ وہی فارم ہاؤس ہے جہاں سے انھوں نے عید کے موقع پر جیکلین فرنانڈیز کے ساتھ ایک رومانوی گانا ریلیز کیا تھا اور اس ہفتے ہندو مسلم بھائی چارے پر انھیں کی آواز میں پھر ایک گانا ریلیز ہوا ہے۔ اور خبر ہے کہ اب سلمان لاک ڈاؤن میں اپنی روز مرہ کی زندگی پر اپنے فارم ہاؤس سے ایک خصوصی شو کریں گے۔
’ہاؤس آف بھائی جانز‘ نام کا یہ شو کلر ٹی وی پر دکھایا جائے گا۔ اس شو میں کئی اہم شخصیات کے ساتھ ساتھ فارم ہاؤس کا عملہ بھی شامل ہو گا۔
لیکن اس سے بڑی خبر یہ ہے کہ دبنگ کے چلبل پانڈے کا کردار اب اینیمیٹڈ سیریز کی شکل میں پیش کیا جائے گا۔
اس سیریز میں صرف سلمان ہی نیں بلکہ اس سیریز کے دوسرے کردار جیسے رجو، پرجا پتی اور چھیدی سنگھ کا کردار بھی ہو گا۔
دبنگ میں چھیدی سنگھ کا کردار اداکار سونو سود نے نبھایا تھا۔ لیکن فلم دبنگ کے پردے کا یہ وِلن اصل زندگی میں ایک بڑا ہیرو بن کر ابھرا ہے اور اب سونو سود کو بالی وڈ کا اصلی دبنگ اور رابن ہڈ کہا جا رہا ہے۔
سونو سود نے لاک ڈاؤن میں پھنسے لاکھوں مزدوروں کو نہ صرف کھلے دل سے کھانے اور رہنے کی جگہ دی بلکہ اب انھوں نے مزدوروں کو ان کے گھر پہنچانے کا کام بڑے زور و شور سے شروع کر رکھا ہے۔
وہ اب تک خصوصی بسوں کے ذریعے ریاست مہاراشٹر سے ہزاروں مزدوروں کو ان کے گھر پہنچا چکے ہیں۔
سونو نے انتہائی خاموشی کے ساتھ میڈیا اور تشہیر کے بغیر ہی مزدوروں کی مدد شروع کی تھی لیکن آہستہ آہستہ ان کے کام کے چرچے ہونے لگے اور انڈسٹری کے ساتھ ساتھ میڈیا نے بھی ان کے کام کو اجاگر کرنا شروع کر دیا۔
بالی وڈ ہنگامہ کے شہر یار فریدون کے ساتھ سکائپ پر انٹرویو میں سونو سود کا کہنا تھا کہ جب تک وہ تمام مزدوروں کو گھر نہیں بھیج دیتے چین سے نہیں بیٹھیں گے۔
سونو سود کے اس کام سے فلسماز بھی متاثر ہوتے نظر آ رہے ہیں اور ان کی زندگی پر ایک فلم بنانے کی بات ہو رہی ہیں۔
Facebook Comments - Accept Cookies to Enable FB Comments (See Footer).