انڈیا میں کیرلا کی ہتھنی کی موت نے ’انسانیت کا جنازہ نکال دیا‘
تنبیہ: اس خبر کے کچھ پہلو ہمارے پڑھنے والوں کے لیے تکلیف دہ ہو سکتے ہیں۔
انڈیا میں ایک ہتھنی کی موت نے لوگوں کو یہ سوچنے پر مجبور کر دیا ہے کہ آیا انسان واقعی اتنے شر پسند بھی ہوسکتے ہیں کہ ہنسی مذاق کے لیے ایک معصوم جانور کی جان ہی لے لیں۔
گذشتہ روز کیرلا میں اس حاملہ ہتھنی کی موت نے انسانیت پر سنگین سوالات اس وقت کھڑے کیے جب بعض شر پسند عناصر نے ہتھنی کو دھماکہ خیز مواد سے بھرا انناس کھلا دیا۔ محکمہ جنگلات کے مطابق ’اندر سے زخمی ہونے کے بعد وہ اس قدر تکلیف میں تھی کہ تین دن تک دریائے ویلیار میں کھڑی رہی تاہم اس کو طبی امداد فراہم کرنے کی تمام کوششیں ناکام رہیں۔‘
سوشل میڈیا پر بھی یہی موضوع زیر بحث ہے۔ اس ہتھنی کی موت کو ’انسانیت کی موت‘ بھی قرار دیا جا رہا ہے۔
’انسانیت کی موت‘
معروف شخصیات اور عام صارفین تقریباً سب ہی اس بات پر اتفاق کرتے دکھائی دیتے ہیں کہ یہ واقعہ ’انسانیت کی موت‘ سے کم نہیں ہے۔
بالی ووڈ کے اداکار اکشے کمار نے ٹوئٹر پر اپنے فینز کو بتایا کہ ’شاید جانور کم جنگلی اور انسان کم انسان ہوتے ہیں۔ ہتھنی کے ساتھ ایسے برتاؤ نے دل توڑ دیا ہے۔ یہ غیر انسانی اور ناقابل قبول ہے۔‘
ان کا مزید کہنا تھا کہ ہتھنی کی موت میں ملوث مجرم کے خلاف سخت کارروائی ہونی چاہیے۔
اداکار سونو سود، جو آج کل کورونا سے پیدا ہونے والے بحران کے دوران غربت کا شکار مزدوروں کی مدد کر رہے ہیں، نے محض اپنے ایک ٹویٹ میں کہا کہ: ’اور۔۔۔ انسانیت مر گئی!‘
Humanity has failed again………..
One of my SandArt on save #Elephant. pic.twitter.com/nzcM4PNDvr— Sudarsan Pattnaik (@sudarsansand) June 3, 2020
اداکارہ شہناز گل کہتی ہیں کہ کیرلا میں جانور کے ساتھ ہونے والی بدسلوکی کی خبر نے مجھے غمگین کردیا ہے۔ ’ہم انسانوں نے وقتاً فوقتاً خود کو رسوا کیا ہے۔‘
انڈیا کی معروف کاروباری شخصیت رتن ٹاٹا کہتے ہیں کہ: ’مجھے یہ جان کر دھچکا لگا اور افسوس ہوا ہے کہ انسانوں کا ایک گروہ معصوم جانور کی موت کا باعث بنا۔‘
’ایسی مجرمانہ حرکات قتل سے کم نہیں۔۔۔ انصاف ہونا چاہیے۔‘
’ہم گنیش کی پوجا کرتے ہیں اور ہاتھیوں پر ظلم کرتے ہیں‘
انڈین اداکارہ تمنا بھاٹیا نے حکام سے مطالبہ کیا ہے کہ ملک میں انسانوں کے حقوق کے لیے ایک سخت قانون اور اس پر عمل درآمد کی ضرورت ہے۔
ہدایتکار پوجا بھٹ نے ہتھنی کی موت پر اپنی رائے دیتے ہوئے کہا کہ: ’ہم (ہندو دیوتا) گنیش کی پوجا کرتے ہیں اور ہاتھیوں پر ظلم بھی کرتے ہیں اور انھیں مارتے ہیں۔‘
We worship Lord Ganesha and kill and abuse elephants. We worship Lord Hanuman & get pleasure out of watching monkeys being chained & performing degrading tricks. We worship and revere female goddesses and resent strength in women,abuse,maim them & practise female infanticide. 🙏
— Pooja Bhatt (@PoojaB1972) June 3, 2020
’ہم ہنومان کی پوجا کرتے ہیں اور بندروں کو باندھ کر ان کا تماشہ دیکھنا پسند کرتے ہیں۔‘
نیوز اینکر پرسن پلومی ساہا نے ٹوئٹر پر اپنے پیغام میں بتایا کہ اپنی موت سے قبل بھی ہتھنی نے کسی انسان کو نقصان نہیں پہنچایا۔
’درد میں مبتلا ہتھنی نے گاؤں کی گلیوں سے گزرتے ہوئے ایک انسانی جان کو بھی نقصان نہیں پہنچایا۔ اس لیے میں نے کہا تھا کہ وہ اچھائی سے بھرپور تھی۔‘
مگر سماجی کارکن پربھا نے اس طرف اشارہ کیا ہے کہ مشتعل افراد کی جانب سے انسانوں کے قتل پر ایک لفظ نہ بولنے والے اس ہتھنی کی موت پر صرف دکھاوا کر رہے ہیں۔
’ہتھنی کے ساتھ جو ہوا وہ وحشیانہ ہے اور جو انسان ایسا کرتے ہیں انھیں جینے کا کوئی حق نہیں۔ لیکن میں یہاں ایک لکیر کھینچنا چاہتی ہوں کہ جو لوگ انسانوں کے قتل پر خوشی منانے ہیں وہ اب کہہ رہے ہیں کہ انھیں ہاتھیوں کی فکر ہے۔ آپ اپنی نفرت کے علاوہ کسی چیز کی پرواہ نہیں کرتے۔‘
نامعلوم افراد کے خلاف مقدمہ درج
وائلڈ لائف وارڈن سیموئل پچاؤ کا کہنا ہے کہ اس سلسلے میں ایک مقدمہ درج کیا گیا ہے اور ہتھنی کی موت کے ذمہ دار لوگوں کی نشاندہی کرنے کی کوشش کی جا رہی ہے۔
In the offence registered as per the sections of WL(P)A for hunting the elephant, several suspects are being interrogated. SIT formed for the purpose is making a significant headway in this regard.Forest Dept will leave no stone unturned to ensure max punishment to the offenders
— Kerala Forest Department (@ForestKerala) June 4, 2020
جبکہ کیرلا میں جنگلی حیات کے محکمے نے ٹوئٹر پر اپنے ایک پیغام میں کہا ہے کہ اس بات کا کوئی ٹھوس ثبوت نہیں کہ ہاتھی دھماکہ خیز مواد کھانے کی وجہ سے زخمی ہوا۔ ’تاہم اس کے امکان موجود ہیں۔‘
ادارے نے کہا ہے کہ نامعلوم افراد نے خلاف مقدمہ درج کر لیا گیا ہے اور ان کی نشاندہی کی جائے گی۔
اس کا کہنا ہے کہ کئی ملزمان سے تفتیش ہو رہی ہے اور محکمہ ملزمان کے لیے سخت سزا کے لیے بھرپور کوششیں کرے گا۔
جانوروں کے حقوق کے ادارے پیٹا نے کہا ہے کہ ان کی ایمرجنسی ٹیم کیرلا میں محکمہ جنگلات کے سینیئر اہلکاروں سے رابطے میں ہے۔ نامعلوم افراد کے خلاف مقدمہ درج کر لیا گیا ہے اور ’ہمیں امید ہے کہ جلد مجرم کو پکڑ لیں گے۔‘
انڈیا میں انسانوں کے حقوق کی تنظیم ایچ ایس آئی نے ہتھنی کے ’قاتلوں‘ سے متعلق معلومات دینے والوں کے لیے 50 ہزار انڈین روپے انعام دینے کا اعلان کیا ہے۔ ’معلومات دینے پر آپ کی شناخت ظاہر نہیں کی جائے گی۔‘
- جمیلہ علم الہدیٰ: مشکل وقت میں شوہر کے ہمراہ ’گھریلو اخراجات اٹھانے والی‘ ایرانی صدر کی اہلیہ کون ہیں؟ - 23/04/2024
- ’مایوس‘ والدہ کی چیٹ روم میں اپیل جس نے اُن کی پانچ سالہ بیٹی کی جان بچائی - 23/04/2024
- مبینہ امریکی دباؤ یا عقلمندانہ فیصلہ: صدر ابراہیم رئیسی کے دورہ پاکستان کے دوران ’ایران، پاکستان گیس پائپ لائن‘ منصوبے کا تذکرہ کیوں نہیں ہوا؟ - 23/04/2024
Facebook Comments - Accept Cookies to Enable FB Comments (See Footer).