چین: پاکستانی طالبعلم معزالدین کو قتل کرنے کا الزام ثابت ہونے پر چینی باشندے کو موت کی سزا سنا دی گئی
مشرقی چین کے صوبے جانگسو کی ایک عدالت نے چین میں مقیم پاکستانی طالبعلم کو قتل کرنے کے جرم میں ایک چینی شہری کو سزائے موت سنائی ہے۔
سزائے موت پانے والے شخص کو واردات کے بعد پناہ دینے پر اُن کی ایک دوست کو 17 ماہ قید کی سزا دی گئی ہے۔
پاکستانی شہری معزالدین نانجِنگ یونیورسٹی میں زیر تعلیم تھے۔ تقریباً دو برس قبل کونگ نامی ایک چینی باشندے نے انھیں معمولی تکرار کے بعد قتل کر دیا تھا۔
پاکستان کے سرکاری خبررساں ادارے اے پی پی نے مقامی ذرائع ابلاغ کے حوالے سے بتایا ہے کہ قتل کی یہ واردات 11 جولائی 2018 کو اس وقت پیش آئی تھی جب ایک بازار سے گزرتے ہوئے کونگ کا سکوٹر معزالدین سے ٹکرایا تھا۔
اس پر ہونے والے جھگڑے کے دوران کونگ قریبی دکان سے چھری اٹھا لایا اور معزالدین کے سینے پر پے در پے وار کیے۔ پولیس کے مطابق اس حملے میں مقتول کے دل پر کاری وار پڑا جس سے وہ جانبر نہ ہو سکے۔ نانجنگ کی انٹرمیڈیٹ پیپلز کورٹ نے کونگ کو سزائے موت سناتے وقت اِسے قتل عمد (جانتے بوجھتے قتل کرنا) قرار دیا ہے۔
یہ بھی پڑھیے
انڈیا میں سزائے موت میں اضافہ کیوں؟
سعودی عرب سزائے موت کے معاملے میں سرفہرست
سعودی عرب: ہسپانوی ڈانسرز کو قتل کرنے والے کو سزائے موت
عدالت نے اپنے فیصلے میں لکھا ہے کہ کونگ کو ایک بالغ شخص کی حیثیت سے معلوم ہونا چاہیے تھا کہ سینے اور پیٹھ میں چھری گھونپنا ہلاکت کا باعث بن سکتا ہے، اس کے باوجود انھوں نے مقتول کے اعضائے رئیسہ پر پے در پے وار کیے۔
عدالت نے مزید کہا کہ کونگ کے طرز عمل سے صاف ظاہر ہے کہ وہ اپنے ہدف کو ہلاک کرنا چاہتے تھے۔
عدالت نے وکیل صفائی کے ان دلائل کو، کہ جھگڑا مقتول کی اشتعال انگیزی کی وجہ سے شروع ہوا تھا، عدم ثبوت کی بنیاد پر مسترد کر دیا۔
واردات کے بعد کونگ اپنی دوست شاؤ کے گھر جا کر چھپ گئے تھے۔ تاہم پولیس نے آٹھ گھنٹے بعد دونوں کو گرفتار کر لیا تھا۔ شاؤ کی عمر اس وقت 18 برس تھی۔
عدالت کا کہنا تھا کہ کونگ کو پناہ دیتے وقت شاؤ کو علم نہیں تھا کہ معزالدین ہلاک ہو چکے ہیں اس لیے وہ کم سزا کی مستحق ہیں۔ عدالت نے ایک مجرم کو پناہ دینے کے جرم میں شاؤ کو 17 ماہ قید کی سزا سنائی ہے۔
- جمیلہ علم الہدیٰ: مشکل وقت میں شوہر کے ہمراہ ’گھریلو اخراجات اٹھانے والی‘ ایرانی صدر کی اہلیہ کون ہیں؟ - 23/04/2024
- ’مایوس‘ والدہ کی چیٹ روم میں اپیل جس نے اُن کی پانچ سالہ بیٹی کی جان بچائی - 23/04/2024
- مبینہ امریکی دباؤ یا عقلمندانہ فیصلہ: صدر ابراہیم رئیسی کے دورہ پاکستان کے دوران ’ایران، پاکستان گیس پائپ لائن‘ منصوبے کا تذکرہ کیوں نہیں ہوا؟ - 23/04/2024
Facebook Comments - Accept Cookies to Enable FB Comments (See Footer).