ڈی موٹیویشنل منجن

انہوں نے چند منٹ کی ویڈیو میں کوئی اتنے کام، ان میں کامیابیاں گنوائیں کہ مجھے لگا بس اب یہ کہیں گے اور پھر میں حاملہ ہوگیا۔ پھر روداد حمل سنائیں گے لیکن نہیں وہ اب اپنے ساتھ گزرے مزید واقعات بتا رہے تھے۔ جس سے پتا چلا کہ حاملہ ہونے کے علاوہ دنیا کا ہر واقعہ ان صاحب کے ساتھ پیش آ چکا ہے۔ میرے تو ارمانوں پر پانی کیا کیچڑ پڑ گیا۔ ناکامی کا سایہ چہرے پر پھیلا محسوس ہوا۔ یہ غبار اترا نہیں تھا کہ ایک خاتون اسپیکر کا لیکچر شروع ہوگیا۔ اول تو وہ مٹکتی ہوئی آئی اور لال ہوتے ہونٹوں کو کمال مہارت سے گولائی بخشی اور جب منہ کھولا تو مجھ پر اوس پڑ گئی۔ بس پوچھیے مت، خیر وہ بھی بالوں کو کانوں کے پیچھے ٹھونستی، کیٹ واک کرتی ماہرانہ انداز میں کامرانیوں کے قصے سنا رہی تھی۔ دونالی بندوق سی ٹانگیں آپس میں چہ میگوئیاں کر رہی تھیں۔

انہوں نے پھر پٹاری کھولی اور بتایا کس کس میدان میں جھنڈے گاڑے اور کیا کیا قصہ ہوا۔ کون سے پہاڑ سر کیے۔ اب پھر مجھے لگا اب یہ بولیں گی یہ سارے معرکے ایک طرف اور معرکۂ ختنہ ایک طرف، اور پھر بتلایا جائے گا۔ آپ بھی اس طور کامیابی سمیٹ سکتے ہیں۔ گندگی باقی سمیٹ لیں گے۔ لیکن یہاں بھی ارمان ندی میں بہہ گئے پتا چلا کہ سوائے اس کے، ان کے ساتھ بھی سارے کام ہو چکے ہیں۔ لیکچر ابھی جاری تھا تالیوں کی گونج میں کوئی نیا گھسا پٹا قصہ تھا۔

سامنے بیٹھے مجمع کی رگوں میں چلتا خون دماغ کی بتی جلا، بجھا رہا تھا۔ کیا اس طور کامیابیاں سمیٹی جا سکتی ہیں؟ والدین کے نصائح جو تجربات کے خون سے سینچے ہوئے ہیں ان کو تو ردی کی ٹوکری کی نذر کر دیا۔ وجہ یہی ہے ناں کہ وہ دیتے ہیں، کچھ لیتے نہیں۔ مفت میں ملی چیز کی وقعت ہی کیا۔ یہاں پیسہ لے کر دیتے ہیں، گرچہ فقط خواب فروش ہیں مگر زور و شور ہے۔

دوسروں کی کامیابیوں کے قصے سنا کر جیب بھرنا کوئی ان سے سیکھے۔ ایک لیکچر کے ہزاروں روپے اینٹھ کر نئے لیکچر کی تیاری اور ہماری معذور قوم کی کثرت، کہ اپنی ہی کمزوریوں، خامیوں، پر لہراتے پھریرے دیکھ کر خوش ہوتے ہیں۔ سحر انگیزیوں میں کانوں کو مزہ تو آتا ہے مگر حاصل وصول کچھ نہیں۔ اک خبط ہے جو ہم پر سوار ہے۔ میں کئی لیکچرز سن چکا۔ اگر کوئی چیز سمجھ آئی تو وہ تالیوں کی گونج تھی باقی سب دھواں تھا یا پھر خالی کھو کھے، کورے کاغذ۔ ہاں البتہ شوق ضرور جاگا کہ چلو اتنی ناکامیاں تو ہیں ہی کہ موٹویشنل اسپیکر بنا جائے۔ باتونی بھی ہیں اور جھوٹ بھی سرشت میں داخل ہے۔ لیکن دوسرے لمحے قسمت کو کوسا اور توبہ کر لی۔

آپ بتائیں کیا آپ نے مسخرے دیکھے ہیں؟ بہروپیے؟ جو دوسروں کی کامیابیوں کے قصے، مٹک مٹک کر سناتے اور بے وقوف بناتے ہیں۔ اسٹیج پر ادھر سے ادھر بندر کی طرح خوخیاتے پھرتے ہیں اور اپنی کامیابیوں کے گن گا کر متاثر کرنے کی کوشش کرتے اور کامیاب ہو جاتے ہیں۔ سننے والوں کی دماغ کی بتی بجھانا، سماعتوں کو نشے کا عادی بنانا اور جیب ہلکی کرنا ان کی کمال پراڈکٹ ہے۔ بہت سے لوگ انہی کے ہاتھوں نقصان اٹھاتے ہیں۔ مانا کہ بہت سے مواقع پر موٹیویشن کی ضرورت ہوتی ہو گی۔ بلکہ ضروری ہے۔ جہاں ضرورت ہو وہاں ضرور مدد کریں مدد لیں۔ موٹیویٹ کریں۔ ہمت دیں۔ ہاتھ تھام کر چلائیں۔ لیکن یوں دھوکے کے کاروبار زندگی سے زندگیوں کے پہیوں کو زنگ آلود کرنا کہاں کا انصاف ہے۔ یوں تو بس سست گدھے ہی تیار ہوسکتے ہیں۔

آج کل چوں کہ یہ کاروبار زوروں پر ہے مقررین کی مانگ میں مسلسل اضافہ ہو رہا ہے۔ مرد و زن برابر محنت کر رہے ہیں توبچے پیچھے کیوں رہیں۔ ایک متحرک تصویر کا لنک ملا تھا۔ یہ کسی کم عمر موٹیو یشنل اسپیکرکا لیکچر تھا۔ نام تھا لٹل اسٹار چغد خان، تیرہ چودہ سال عمر، چہرے پر تجربے کا نشان ہے نہ ہی علم کا محراب، اور لیکچر دیتے کسی قصے کا ذکر کیا اور پھر کہنے لگا یہ اس وقت کی بات ہے جب میں ایک کرکٹ ٹیم کا کوچ تھا۔

یار کمال ہے ماں کے پیٹ میں کرکٹ ٹورنامنٹ، ہاں بھئی تو کھیل سکتا ہے۔ یہ اس بچے کے ساتھ بھی ظلم ہے جو والدین نے کیا۔ بچپن چھن گیا خبر ہی نہیں۔ ہاں انہیں کیا دکھ ہوگا؟ انویسٹمنٹ کی تھی۔ اب اگر باتوں کے بکنے سے مال مل رہا ہے تو برائی کیا ہے۔ ایسے لیکچر میں سامنے سامعین میں بڑے بڑے لوگ بیٹھے سن رہے ہوتے ہیں۔ نجانے وہ سیکھتے کیا ہیں۔ شاید عبرت حاصل کرنے بیٹھے ہوں۔ بھئی کیا سیکھ رہے ہیں۔ آپ کے چہرے کی ایک جھری میں چھپی کہانی ہزار سبق لیے ہوئے ہے۔ وہ سنائیں تو سیکھنے والے راستے پا لیں گے۔ تجربات، مشاہدات کے باکس میں سے کچھ نکال کر تقسیم کر دیں تو زندگیاں سنور جائیں۔

من موہنی حرکات، چکنی چپڑی باتیں کر کے آپ بھی موٹیویشنل اسپیکر بن سکتے ہیں۔ بس دوسروں کے قصے یاد رکھنے ہیں۔ باتونی بنیے، باتوں کو گھمانا سیکھیے، چند محاورے، منقول واقعات، سوانح عمریوں کا منجن بھی کام آئے گا۔ بیچ میں مذہب کا تڑکا کامیابی کی دلیل ہے۔ باتین بکیں گی اور خوب بکیں گی۔ کہتے ہیں جیسا بننا چاہتے ہو ا س کی عادات اپناؤ۔ اب اپنے لیے موٹیویشنل اسپیکر چن لیں۔ جنہیں ہم سنتے ہیں یہ خود اگر اتنے ذہین، فطین اور زندگیاں سنوارنے کے گرو ہوتے تو اپنی نہ سنوار چکے ہوتے۔

مقابلے کے امتحان میں شریک ہو چکے ہوتے لیکن نہیں یہ ناکامیاں سنا کر کامیابیوں پر ابھارتے ہیں۔ الاماشااللہ۔ اب کوئی کہے کہ میاں تم کیوں جل رہے تو حضور! شدھ سکون ہے کہ کرایے کا ٹٹو نہیں۔ وگرنہ مجھے جاننے والے جانتے ہیں بہت اچھا موٹیویشنل اسپیکر ہوں۔ باتونی بھی ہوں اور جھوٹ بھی بول سکتا ہوں۔ لیکن ناکامیوں سے اس طور نہیں سیکھا کہ زندگیوں کی واٹ لگا دوں۔ بس بات اتنی ہے کہ دانت نکوس کر کامیابی سمیٹنا قبول نہیں۔

تو بھائی لوگو! دیدہ زیب چوغوں تلے چھپے ان مداریوں، مسخروں سے بچو۔ ان کے پاس فرسودہ باتوں کے علاوہ کچھ نہیں۔ تمام تر لوگوں کی زندگیوں کی تکالیف، مسائل ایک سے نہیں ہوتے نہ ہی آٹھ نمبر کا نٹ ہے کہ آٹھ نمبر کی چاپی لی اور ٹائٹ کر لیا۔ ہر ایک کے مسائل دوسرے سے الگ ہوتے ہیں۔ ہر انسان کی پیچیدگیاں مختلف ہوتی ہیں۔ ایک ہی دوا سب کے لیے کارگر نہیں ہوسکتی۔ بھیڑ بھڑکے سے بچیں۔ کچھ مشورہ کرنا ہے تو اساتذہ سے مشورہ کریں۔ اپنے دوستوں سے، والدین سے مشورہ کریں۔ جہاں کہیں ضرورت ہو موٹیویشن کی ضرور بڑوں سے مدد لیں لیکن صرف سننا ہے تو واش روم میں بیٹھ کر سچائیاں سننے سے بہتر کوئی جگہ نہیں، آپ خود ایک بہترین موٹیویشنل اسپیکر ہیں۔

• About
• Latest Posts

عبدالباسط ذوالفقار

Latest posts by عبدالباسط ذوالفقار (see all)

• میونسپل لائبریری اور بدذوق لائبریرین (2) - 13/04/2023
• پھس پھسا کتاب میلہ اور نامانوس لوگ - 12/04/2023
• اب تو بہت سہولت ہوگئیصاحب - 11/01/2023