سوشل میڈیا پر اپنے انٹرویو سے مشہور ہونے والی نمرا کے لیے ٹوئٹر صارفین کے مشورے


کل شام سے لے کر آج صبح تک پاکستانی ٹوئٹر کے ٹاپ ٹرینڈز میں صرف اور صرف ایک چیز کا چرچا رہا یعنی پاکستانی فوج کے ترجمان میجر جنرل بابر افتخار کا وہ بیان جس میں انھوں نے آرمی چیف جنرل قمر جاوید باجوہ اور سابق گورنر سندھ کے درمیان ملاقاتوں کی تصدیق کی ہے۔

سیاسی حالات سے واقفیت بھی ہونی ضروری ہے لیکن ذہن کو بوجھل کر دینے والی ان بحثوں کے درمیان ایک اور نام بھی ٹوئٹر پر ٹرینڈ کرتا رہا۔ اس نام کی پہچان سادگی سے بھرپور مزاحیہ اور پُرلطف باتوں سے ہے۔

بات ہو رہی ہے نمرا نامی لڑکی کی جن کا تعلق لاہور سے ہے اور وہ آج کل سوشل میڈیا پر ہردلعزیز شخصیت بن چکی ہیں۔

یہ بھی پڑھیے

خوبرو چائے والے کا مقدر چمک گیا

انڈیا میں پاکستانی چائے والے کی دھوم

قصہ کچھ یوں ہے کہ چند دن قبل لاہور کے ایک مقامی ٹی وی چینل سٹی 42 کی ایک رپورٹر شہر کے ایک پارک میں گھومنے کے لیے آئے ہوئے لوگوں کے تاثرات ریکارڈ کر رہی تھیں۔

جب مائیک اور کیمرے کا رُخ نمرا کی جانب ہوا تو اُن کی خوشی اور اُن کا جوش دیدنی تھا۔

https://twitter.com/theodahad_/status/1306343335657910279

رپورٹر سے بات کرتے ہوئے انھوں نے بتایا کہ وہ پہلے بھی یوٹیوب پر رپورٹرز کو لوگوں سے باتیں کرتے ہوئے دیکھ چکی ہیں اور جب وہ اس دن پارک میں آ رہی تھیں تو ان کی بھی خواہش تھی کہ انھیں کوئی رپورٹر مل جائے اور وہ کیمرا پر آ جائیں۔

ان کا کہنا تھا کہ ٹی وی پر آنا ان کی بہت بڑی خواہش تھی جو اب پوری ہو چکی ہے۔ اس موقع پر انھوں نے گانے گائے، لطیفے سنائے اور یوں انھوں نے فوراً ہی مقبولیت حاصل کر لی۔

انٹرویو ہوا اور نمرا اور رپورٹر دونوں نے اپنی اپنی راہ لی مگر پھر تلاش شروع ہوئی نمرا کی، جن کی باتیں نہایت محظوظ کر دینے والی تھیں۔

اس کے بعد مختلف ٹی وی چینلز اور ویب شوز نے نمرا کو دوبارہ اپنے پروگرامز میں مدعو کرنا شروع کیا اور ان سے تفصیلی گفتگو کی۔ اور انھی معصومانہ باتوں کی کلپس ٹوئٹر پر ایک مرتبہ پھر گردش کر رہی ہیں۔

گلوکار اور کامیڈین علی گُل پیر نے نمرا کے انٹرویو کی نقالی کرتے ہوئے اپنی ویڈیو بنا کر ٹوئٹر پر شائع کی تو انھوں نے بھی خوب داد سمیٹی۔

https://twitter.com/Aligulpir/status/1308361444019200000

اشاعتی ادارے پاکستان ٹوڈے نے بھی بعد ازاں نمرا کا انٹرویو کیا جو اُن کی خوش مزاجی کی وجہ سے ان کے انٹرویو کے بجائے رپورٹر کا ہی انٹرویو بن گیا۔

نمرا کے اس انٹرویو کو بھی ہزاروں مرتبہ دیکھا گیا اور کئی لوگ ٹوئٹر پر ان کے لیے نیک تمناؤں کا اظہار کرتے دکھائی دیے۔

https://twitter.com/hafeezkhilji00/status/1308986123822215169

سٹی 42 پر جب نمرا کو دوبارہ مدعو کیا گیا تو انھوں نے وہاں پر بھی کچھ گانے سنائے تو کچھ ہلکے پھلکے انداز میں سیاسی تبصرہ بھی کیا۔

https://twitter.com/UmairModel/status/1308901359668862978

کئی صارفین کا خیال تھا کہ زندگی میں خوش رہنے کے لیے ضروری ہے کہ نمرا کی طرح جیا جائے۔

ایک صارف نے لکھا کہ کوئی اتنا خوش کس طرح ہو سکتا ہے؟ [ایسا کہ] اپنی خوشی کے لیے کسی دوسرے پر انحصار نہ کیا جائے، اور نمرا نے یہ ثابت کر دیا ہے۔

’اپنی دنیا خود بناؤ، اپنی روشنی خود پیدا کرو، بس خوش رہو۔‘

https://twitter.com/veer__333/status/1308996899022745602

صحافی نزہت صدیقی نے ہیری پوٹر سیریز کی جانب اشارہ کرتے ہوئے لکھا کہ انھوں نے اپنی ہنسی سے تمام ڈیمینٹرز کو تباہ کر کے رکھ دیا ہے۔

https://twitter.com/guldaar/status/1309016052588843009

تاہم کچھ لوگوں نے نمرا کی مقبولیت پر سنجیدہ ردِعمل دیتے ہوئے کہا کہ اب بہتر یہی ہے کہ وہ میڈیا سے دور رہیں۔

صارف خضرا نے خدا سے نمرا کی حفاظت کی دعا کرتے ہوئے کہا کہ ہمارے میڈیا کا یہ طرزِ عمل ہے کہ وہ کسی کو ’پراڈکٹ‘ بنا کر انھیں بے پناہ رونمائی دیتا ہے اور جو لوگ ظاہری وضع قطع کے ایک مخصوص معیار پر پورا نہیں اترتے، انھیں نفیس بنانے کی کوشش کرتا ہے۔

انھوں نے لکھا کہ ارشد نامی چائے فروخت کرنے والے نوجوان کو بھی تباہ کیا گیا، اب نمرا کو تو اکیلا چھوڑ دیا جائے گا۔

ایک صارف سعدیہ رحمان نے لکھا کہ ان کے سٹی 42 پر دوسرے انٹرویو کی کلپس پر منفی تبصرے آ رہے ہیں، انھیں تربیت اور رہنمائی کی ضرورت ہے۔

اس بات کی تصدیق نمرا کی اس ویڈیو کے نیچے لوگوں کے تبصروں سے ہوتی ہے جس میں انھوں نے سیاسی تبصرہ کیا تھا، جس پر جہاں لوگوں نے ان کی باتوں سے لطف اٹھایا تو وہیں لوگوں نے انھیں تنقید کا نشانہ بھی بنایا۔

ایک اور صارف نے لکھا کہ یہ نمرا کا عروج ہے اور اب انھیں میڈیا سے وقفہ لے لینا چاہیے، ورنہ کبھی چائے والا بھی تھا جو ایک ماڈل شاٹ کے بعد غائب ہو گیا۔

https://twitter.com/iffiViews/status/1308859141151174656

شیری نامی ایک صارف نے لکھا کہ کئی لوگوں نے نمرا کی ویڈیو کے نیچے تبصرے کیے کہ وہ اس لیے خوش ہیں کیونکہ غیر شادی شدہ ہیں، اور شادی ہو گی تو دیکھیں گی۔ شیری نے لکھا کہ اس سے وہ حیرت میں پڑ گئی ہیں کہ یہ ہمارے معاشرے کی کتنی تسلیم شدہ حقیقت ہے کہ شادی نوجوان لڑکیوں کی خوشی چھین لیتی ہے۔

https://twitter.com/CherieDamour_/status/1306836955439804416


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32299 posts and counting.See all posts by british-broadcasting-corp