امریکی صدارتی انتخاب 2020: ٹرمپ کا امریکی عوام سے دھوکا ہونے کا دعویٰ، سپریم کورٹ جانے کا اعلان
امریکی صدر ڈونلڈ ٹرمپ نے دعویٰ کیا ہے کہ ’میرے نزدیک ہم الیکشن جیت چکے ہیں‘ اور امریکی عوام کے ساتھ ’فراڈ‘ کیا جا رہا ہے۔
امریکہ میں ووٹنگ کا مرحلہ مکمل ہونے کے بعد اب ووٹوں کی گنتی اور نتائج آنے کا سلسلہ جاری ہے۔
بدھ کی دوپہر وائٹ ہاؤس میں خطاب کرتے ہوئے صدر ٹرمپ کا کہنا تھا کہ ’یہ ہمارے ملک کے لیے باعثِ شرمندگی ہے‘ اور وہ انتخابی نتائج کے خلاف سپریم کورٹ جائیں گے۔
واضح رہے کہ اب بھی امریکہ کی چند ریاستوں میں لاکھوں ووٹوں کی گنتی ہونا باقی ہے تاہم صدر ٹرمپ نے اپنی جیت کا دعویٰ کیا ہے۔
یہ بھی پڑھیے
امریکی صدارتی انتخاب: اب تک کوئی فیصلہ کیوں نہیں ہو سکا؟
نئے امریکی صدر کا فیصلہ کِن ریاستوں کے نتائج پر آن ٹھہرا اور کیوں؟
امریکی صدارتی انتخاب کے نتائج کا انتظار کرتے ہوئے کن چیزوں پر نظر رکھیں؟
انھوں نے اپنے اہلخانہ اور لاکھوں حمایتوں کا شکریہ ادا کرتے ہوئے کہا کہ ’ہم جیت کے جشن کی تیاری کر رہے تھے، ہم ہر جگہ سے جیت رہے تھے۔‘
انھوں نے فاتحانہ انداز میں امریکی ریاست فلوریڈا سے متوقع فتح کو ’بڑی کامیابی‘ قرار دیا۔ ان کا کہنا تھا کہ ’ہم صرف جیتے نہیں ہیں بلکہ ہم واضح اکثریت سے وہاں سے جیتے ہیں۔‘
انھوں نے اپنے حامیوں کو مخاطب کرتے ہوئے کہا ’ہم نے امریکی ریاستوں اوہائیو، ٹیکساس میں کامیابی حاصل کی، ہم نے جارجیا میں انھیں ڈھائی فیصد کے فرق سے شکست دی ہے۔‘
انھوں نے امریکی ریاست مشی گن میں بھی واضح اکثریت سے اپنی کامیابی اور ریاست پنسلوینیا میں واضح برتری کا دعویٰ کیا ہے۔
امریکی صدارتی انتخاب میں جوں جوں متوقع نتائج موصول ہو رہے ہیں ویسے ویسے یہ انتخابی معرکہ ایک کڑے مقابلے کی صورت اختیار کرتا جا رہا ہے۔
ٹرمپ کی تقریر سے کچھ دیر قبل ڈیموکریٹس کے صدارتی امیدوار جو بائیڈن نے بھی اپنی فتح کا دعویٰ کرتے ہوئے کہا تھا کہ ’آخری ووٹ کی گنتی تک صدارتی انتخاب کا محاذ گرم رہے گا۔‘
امریکی ریاست ڈیلاویئر میں اپنی اہلیہ کے ہمراہ خطاب کرتے ہوئے جو بائیڈن نے اپنے حامیوں کا حوصلہ بڑھایا تھا۔
انھوں نے دعویٰ کیا کہ ’ہم درست سمت میں جا رہے ہیں اور یہ صدارتی انتخاب ہم ہی جیتیں گے۔‘
ان کا کہنا تھا کہ ’ہم جانتے ہیں کہ وقت لگ رہا ہے اور لگے گا۔ شاید بات کل صبح تک جائے یا شاید اس سے بھی آگے۔ لیکن ہم جہاں ہیں اس صورتحال پر خوش ہیں۔‘
صدر ٹرمپ ہوں یا جو بائیڈن دونوں اپنی اپنی فتح کے دعویدار ہیں جبکہ اب بھی ملک میں لاکھوں ووٹوں کی گنتی ہونا باقی ہے۔
- شیاؤمی: چینی سمارٹ فون کمپنی نے الیکٹرک کار متعارف کروا کر کیسے ٹیسلا اور ایپل دونوں کو ٹکر دی - 29/03/2024
- خسارے میں ڈوبی پاکستان کی قومی ایئرلائن کو ٹھیک کرنے کے بجائے فروخت کیوں کیا جا رہا ہے؟ - 29/03/2024
- غزوہ بدر: دنیا کی فیصلہ کن جنگوں میں شمار ہونے والا معرکہ اسلام کے لیے اتنا اہم کیوں تھا؟ - 29/03/2024
Facebook Comments - Accept Cookies to Enable FB Comments (See Footer).