اگر پروین شاکر زندہ ہوتی!

پروین شاکر اگر زندہ ہوتی تو آج اپنی سالگرہ منا رہی ہوتی۔ اس کی عمر اڑسٹھ برس ہو چکی ہوتی اور شاید اس کے بالوں کا پیشتر حصہ چاندی جیسا ہو گیا ہوتا۔ وہ ایک باوقار اور بہت خوبصورت خاتون ہوتی جسے دیکھ کر اس کے مجھ ایسے ’نوجوان‘ پروانے جل جل اٹھا کرتے۔ شاید اس کا فیس بک پر کوئی اکاؤنٹ ہوتا جس میں آئے روز اس کے شائقین کی فرینڈ ریکویسٹ آیا کرتیں اور وہ ان میں سے چند ایک کو ایڈ کر لیتی اور باقی سارے قبولیت کے دن کا انتظار کیا کرتے۔ زیادہ امکان یہ ہے کہ اس کا کوئی فیس بک پیج ہوتا جس پر لاکھوں لوگ اسے فالو کرتے۔ وہ سیول سرونٹ تھی لیکن اب تک کسی اعلی عہدے سے سبکدوش ہو چکی ہوتی۔

اب اس کا وقت سیمیناروں اور مشاعروں میں بسر ہوا کرتا۔ وہ اپنے مخصوص رکھ رکھاؤ کے ساتھ مشاعرے کے اسٹیج پر باوقار ڈھنگ سے بیٹھا کرتی اور صف سامعین کی ہر نگاہ کا مرکز قرار پاتی۔ وہ جب کلام سنانے آتی تو تحت للفظ میں بالکل سیدھے سپاٹ انداز میں شعر پڑھتی اور مشاعرہ لوٹ لیا کرتی۔ سامعین کی داد و تحسین کے شور میں وہ اسی سنجیدہ چہرے سے شعر پڑھتی رہتی۔ وہ اسٹیج پر شاید ہی کبھی مسکراتی۔ جب داد کی آواز بلند ہوتی تو وہ اپنا بایاں ہاتھ ماتھے تک لے جاکر آداب کرتی۔ وہ مشاعروں کی پارٹی بندی اور سیاست میں بالکل نہیں پڑا کرتی۔ وہ زیادہ تر وقت پڑھنے میں گزارا کرتی اور اس کی الماری میں اردو کے ساتھ ساتھ انگریزی ادب بھی بھرا رہا کرتا۔

اب وہ اپنے پوتے کے ساتھ کھیلا کرتی اور اس پر نظم کہتی۔ اس نے اپنا مجموعہ بیٹے مراد کے نام منسوب کیا تھا اب اگر وہ ہوتی اور کوئی مجموعہ چھپتا تو شاید اس کا انتساب مراد کے بیٹے کے نام ہوتا۔

وہ اپنی پوتی کی سب سے اچھی دوست ہوتی۔ وہ اس کی آنکھوں میں جھانک کر پڑھا کرتی کہ اس کے دور کی لڑکی آج کے دور میں کتنی تبدیل ہوئی ہے؟ وہ پوتی سے خوب باتیں کیا کرتی گویا کرید کرید کر اس کے خیالات جاننا چاہ رہی ہو، پھر وہ ان خیالات کو نظم کرتی اور لڑکیوں کی آواز بنتی۔ وہ غزلوں میں زبردست رومانی رنگ بکھیرا کرتی لیکن سنجیدہ نظمیں بھی پابندی سے لکھا کرتی۔ وہ جدید فکر کی ترجمانی کیا کرتی لیکن روایات کا رنگ دھندلا نہ پڑنے دیا کرتی۔

عاشور کے دن کسی چینل پر سر کو کالی چادر سے ڈھانپے وہ کوئی سلام پڑھتی نظر آ جایا کرتی۔ وہ اس دور میں وومن امپاورمنٹ کی بہت بلند آواز ہوتی۔ وہ دنیا بھر میں بلائی جاتی اور ایک عالم اس کا دیوانہ ہوتا۔ وہ نعرے بازی کا لہجہ اپنانے کے بجائے خواتین کے فطری لہجے میں ایسی ترجمانی کیا کرتی کہ بات سیدھے دلوں پر جاکر لگا کرتی۔ اگر وہ زندہ ہوتی تو میں اسے بھارت سے ایک خط بھیجتا۔ میں اس سے فرمائش کرتا کہ وہ اپنے آٹوگراف کے ساتھ اپنا مجموعہ کلام مجھے بھیجے۔ مجموعہ کلام تو میں بازار سے بھی خرید سکتا تھا لیکن اصل لالچ اس کی تحریر کا ہوتا۔ زیادہ امکان یہی تھا کہ اس کے ہزاروں شائقین کے خطوں کے جنگل میں میرا نامہ بھی گم ہو رہتا۔ ہاں اگر قسمت سے خط اس تک پہنچ جاتا اور وہ مجھے دستخط کر کے اپنی کتاب بھجواتی تو میں پہروں اس کی تحریر کو نکال کر اسے تکا کرتا۔

یہ سب ہو سکتا تھا لیکن واقعہ یہ ہے کہ اب کچھ بھی نہیں ہو سکتا۔

• About
• Latest Posts

مالک اشتر ، دہلی، ہندوستان

مالک اشتر،آبائی تعلق نوگانواں سادات اترپردیش، جامعہ ملیہ اسلامیہ سے ترسیل عامہ اور صحافت میں ماسٹرس، اخبارات اور رسائل میں ایک دہائی سے زیادہ عرصے سے لکھنا، ریڈیو تہران، سحر ٹی وی، ایف ایم گیان وانی، ایف ایم جامعہ اور کئی روزناموں میں کام کرنے کا تجربہ، کئی برس سے بھارت کے سرکاری ٹی وی نیوز چینل دوردرشن نیوز میں نیوز ایڈیٹر، لکھنے کا شوق

Latest posts by مالک اشتر ، دہلی، ہندوستان (see all)

• کیا مسلمان اخلاقیات میں مغرب سے آگے ہیں؟ - 20/11/2021
• کیا جناح 1938 کے شیعہ سنی ٹکراؤ پر خاموش تماشائی تھے؟ - 16/11/2021
• عزاداری کرنے والوں سے دو (تلخ) باتیں - 29/08/2021