زالینڈو: اہلیہ کے پیشہ ورانہ خوابوں کی تکمیل کے لیے معروف فیشن برینڈ کے سربراہ کا عہدہ چھوڑنے کا اعلان

یورپ کی سب سے بڑی آن لائن فیشن سائٹ کے چیف ایگزیکٹو نے یہ کہتے ہوئے اپنے عہدے سے دستبردار ہونے کا اعلان کیا ہے کہ ان کی بیوی کے ’پیشہ ورانہ کیرئر سے متعلق خوابوں کو ترجیح ملنی چاہیے۔‘

روبن رئٹر 2010 سے ’زالینڈو‘ نامی فیش ویب سائٹ کے شریک چیف ایگزیکٹو ہیں۔

یہ کمپنی، جس کا آغاز 12 سال قبل برلن میں ہوا، اب اس کے 36 ملین کسٹمر ہیں اور گذشتہ سال اس کمپنی کی 6.5 بلین ڈالر (5.8 بلین ڈالر) کی آمدنی ریکارڈ کی گئی تھی۔

کمپنی کے ساتھ روبن کا معاہدہ 2023 تک کا ہے لیکن وہ مئی میں اپنے عہدے سے سبکدوش ہو جائیں گے۔

روبن رئٹر نے ایک بیان میں کہا ہے ’میں اور میری اہلیہ اس بات پر متفق ہیں کہ آنے والے برسوں کے لیے، ان کے پیشہ ورانہ خوابوں کو ترجیح دی جانی چاہیے۔‘

’میں اپنے بڑھتے ہوئے کنبے کو زیادہ سے زیادہ وقت دینا چاہتا ہوں۔ گذشتہ 11 برسوں سے زالینڈو میری ترجیح رہی ہے، اور مجھے لگتا ہے کہ اب وقت آگیا ہے کہ میری زندگی کو ایک نئی سمت ملے۔‘

یہ بھی پڑھیے

میں ’تابعدار بیوی‘ بن گئی

’پڑھنے لکھنے کا خواب ادھورا رہ گیا‘

نہ چھٹی، نہ تنخواہ، اور دنیا کی سب سے مشکل نوکری

زالینڈو نے رئٹر کی اہلیہ کا نام یا ان کا پیشہ بتانے سے انکار کیا ہے۔ تاہم کمپنی کا کہنا ہے کہ اس جوڑے کی ایک اولاد ہے اور 2021 کے اوائل میں ان کا دوسرا بچہ متوقع ہے۔

38 سالہ رئٹر نے 2018 میں 20.2 ملین، 2019 میں 6.8 ملین دولت کمائی، جس کی وجہ سے وہ جرمنی کے سب سے زیادہ معاوضہ لینے والے ایگزیکٹوز میں شامل ہوگئے تھے۔

فرم کا کہنا ہے کہ زالینڈو کے دوسرے دو باسز، رابرٹ گینٹز اور ڈیوڈ شنائڈر کمپنی کی قیادت جاری رکھیں گے۔

رئٹر، زالینڈو میں عورتوں اور مردوں کے درمیان برابری کو بہتر بنانے والی کوششوں کی سربراہی کر رہے ہیں۔ یہ کمپنی 17 ممالک میں فیشن اور خوبصورتی کی مصنوعات فروخت کرتی ہے۔

فی الحال کوئی خاتون زالینڈو کے انتظامی بورڈ کا حصہ نہیں اور خواتین ملازمین کے مقابلے میں مرد ملازمین کی تنخواہ 22 فیصد زیادہ ہے۔ تنخواہوں میں یہ فرق جرمنی میں قومی اوسط سے قدرے زیادہ ہے۔

تاہم، نومبر میں رئٹر نے کہا تھا کہ سنہ 2023 تک، کمپنی کی انتظامیہ کے اعلیٰ عہدوں میں خواتین کی متوازن نمائندگی کا مقصد حاصل کر لیا جائے گا۔

رئٹر کا کہنا تھا ’اگرچہ تبدیلی میں وقت لگتا ہے اور ہم ابھی بھی اپنے سفر کے آغاز میں ہیں، لیکن ہماری پیشرفت اس بات کی نشاندہی کرتی ہے کہ ہم صحیح سمت میں جا رہے ہیں۔‘

ایگزیکٹو کے طور پر وہ تین رکنی انتظامی ٹیم میں حکمتِ عملی اور مواصلات کے انچارج ہیں۔ پچھلے سال تک وہ فنانس چیف کے عہدے پر بھی رہے ہیں۔

رئٹر کے فیصلے پر تبصرہ کرتے ہوئے، جینٹز کا کہنا تھا ’جب ہم نے اپنے دفتر کے تہہ خانے سے اپنے صارفین کو پہلا جوتا بھیجنا شروع کیا تو ہمیں معلوم نہیں تھا کہ یہ سفر ہمیں کہاں لے جائے گا۔‘

’زالینڈو کی کامیابی میں روبن کے کردار سے انکار نہیں کیا جا سکتا۔‘

زالینڈو کے صارفین 17 ممالک میں پھیلے ہوئے ہیں۔ یہ آن لائن پلیٹ فارم فیشن کے ساتھ ساتھ دیگر اشیا اور خوبصورتی کی مصنوعات بھی فروخت کرتا ہے۔