لندن کے ہیروڈز مال میں بے دریغ پیسے خرچ کرنے والی خاتون سپریم کورٹ میں کیس ہار گئیں

برطانیہ میں ایک عورت کی جانب سے برطانوی قانون 'ان ایکسپلینڈ ویلتھ آرڈر' یعنی یو ڈبلیو او کے خلاف کی گئی اپیل کا فیصلہ ان کے خلاف آیا جس میں برطانوی سپریم کورٹ کا کہنا ہے کہ ان کی موقف کی کوئی قانونی دلیل نہیں ہے اور کیس سننے سے انکار کر دیا۔

ضمیرہ حاجی ایوا نے لندن کی معروف دکان ہیروڈز سے ڈیڑھ کروڑ پاؤنڈز سے زیادہ کی شاپنگ کی تھی اور انھوں نے سٹور کے قریب ایک 12 ملین پاؤنڈز کی مالیت کا گھر اور برکشائر میں ایک گالف کورس بھی خریدا۔

ضمیرہ حاجی ایوا کا تعلق آذربائیجان سے ہے۔ وہ آذربائیجان کے ایک سرکاری بینکار کی اہلیہ ہیں جو کہ آذربائیجان میں سرکاری بینک کے ساتھ کروڑوں پاؤنڈز خرد برد کرنے کے الزام میں جیل میں قید ہیں۔

اسی حوالے سے مزید پڑھیے

16 ملین کی شاپِنگ کرنیوالی خاتون کو املاک گنوانے کا خطرہ

16 ملین پاؤنڈ کی شاپنگ کرنے والی خاتون کون ہیں؟

پرتعیش زندگی کی وضاحت طلبی کا نیا برطانوی قانون متعارف

اس فیصلے کے بعد ممکن ہے کہ وہ لندن میں اپنا 12 ملین پاؤنڈز کی مالیت کا گھر بھی ہار جائیں اگر وہ اپنے اثاثوں کی وضاحت نہ کر پائیں۔

جب دو سال قبل یہ قانونی جنگ شروع ہوئی تھی تو اس جوڑی کی دولت کا تخمینہ 22 ملین پاؤنڈز سے زیادہ لگایا گیا تھا۔

اگلے دس سالوں میں ضمیرہ حاجی ایوا نے قریب 16 ملین پاؤنڈز سے زیادہ شاپنگ ہیروڈز سے کی جس کے بعد برطانیہ کے حکام نے ان کے اثاثوں کے بارے میں کھوج لگانے کا سلسلے شروع کیا۔

ضمیرہ حاجی ایوا نے کوئی بھی غیر قانونی کام کرنے سے انکار کیا ہے اور نہ ہی ان پر برطانیہ میں کسی جرم مرتکب کرنے کا الزام ہے۔

گذشتہ سال مقامی عدالت نے ان کو آذربائیجان واپس بھیجنے کے فیصلے کو مسترد کر دیا اور کہا کہ وہاں ان کے ساتھ غیر جانبدارانہ سلوک نہیں ہوگا۔

ان کے وکلا نے برطانوی حکام کی جانب سے کی گئی تفتیش و تحقیق کے بارے میں برطانوی سپریم کورٹ سے رابطہ کیا لیکن عدالت نے ان کے کیس کو سنے بغیر مسترد کر دیا۔

نیشنل اکنامک کرائم سینٹر کے گرئیم بگار نے اس فیصلے پر تبصرہ کرتے ہوئے کہا کہ یہ ہمارے لیے بہت اہم فیصلہ ہے جس کی مدد سے ہم مالیاتی جرائم کے بارے میں یو ڈبلیو او کو ایک طاقتور ہتھیار کے طور پر پیش کر سکتے ہیں۔

’ضمیرہ حاجی ایوا کے پاس اور کوئی راستہ نہیں ہے اور انھیں اب اپنے اثاثوں کے بارے میں تفصیلات کے بارے میں بتانا ہوگا۔’

‘ان ایکسپلینڈ ویلتھ آرڈر’ کیا ہے؟

واضح رہے کہ 2017 میں برطانوی حکومت نے یہ نیا قانون، ‘ان ایکسپلینڈ ویلتھ آرڈر’ (یو ڈبلیو او) یعنی وہ دولت جس کے ذرائع کے بارے میں وضاحت نہیں دی گئی، کے بارے میں قانون نافذ کیا تھا اور اس کی مدد سے مبینہ بدعنوان افراد کو اپنے اثاثوں کے بارے میں بتانا ہوگا۔

یو ڈبلیو او کے قانون کی مدد سے برطانوی حکام کسی بھی اثاثے اور جائیداد پر اپنا قبضہ رکھ سکتے ہیں جب تک کہ ان کے بارے میں وضاحت نہ مل جائے۔

قانون کے تحت ایسے کوئی بھی اثاثے جن کی مالیت پچاس ہزار پاؤنڈ سے زیادہ ہو اور ان پر شک ہو کہ وہ غیر قانونی طور پر حاصل کیے گئے ہیں، حکومت اس کے خلاف کاروائی کر سکتی ہے۔

حکومتی اندازوں کے مطابق برطانیہ میں ہر سال کالے دھن سے حاصل کی گئی تقریباً 90 ارب پاؤنڈ تک کی رقم کو سفید کیا جاتا ہے۔