سمت کا تعین کرنا مشکل ہے؟ یہ 8 مشورے مدد کر سکتے ہیں!

  •  
  •  
  •  
  •  
  •  
  •  
  •  
  •  
  •  
  •  
  •  
  •  

سمت، قطب نما، جی پی ایس
Getty Images
جی پی ایس کے بغیر سمت کا تعین کرنا اتنا مشکل بھی نہیں جتنا کہ لوگ عام طور پر سمجھتے ہیں
کیا آپ کو بھی ایک جگہ سے دوسری جگہ تک پہنچنے کا راستہ تلاش کرنے میں مشکل ہوتی ہے اور آپ خود کو گم پاتے ہیں؟

یا آپ اکثر یہ بات کہتے ہوئے سنائی دیتے ہیں کہ ’اوہ، میں گم نہیں ہوا تھا، بس راستہ نہیں مل رہا تھا۔‘

اور اگر ایسا ہے تو نیوروسائیکولوجسٹ کیتھرین لوّ ڈے کے یہ مشورے آپ کو صحیح راستے پر آنے میں مدد کر سکتی ہیں۔

1. اپنے روٹ کی منصوبہ بندی کریں

سپین، بارسلونا

Getty Images
اگر آپ پریشان ہیں کہ کوئی جگہ حقیقت میں کیسی ہوگی، تو آپ اس کا سٹریٹ ویو پہلے سے دیکھ لیں جیسے کہ بارسلونا کی اس سڑک کا

اگر آپ کے پاس سٹریٹ ویو ہے، یا اس علاقے کی تصاویر ہیں تو خود کو اس روٹ پر چلتے ہوئے تصور کریں اور ذہن میں اپنے سفر کا تصور قائم کریں۔

ہر موڑ کو دیکھیں اور کوئی بھی غیر معمولی نشانیاں یاد کر لیں جو حقیقت میں یہ راستہ لینے پر آپ کی یادداشت تازہ کر دیں گی۔

2. پرسکون رہیں

لندن

Getty Images
پرسکون رہیں، منزل آپ کی ہوگی

پرسکون رہنے کی کوشش کریں، فکر کرنے سے آپ کے ذہن پر بوجھ پڑے گا جس سے راستہ تلاش کرنے کی آپ کی قدرتی صلاحیت متاثر ہو سکتی ہے۔

اگر آپ سفر سے پہلے منصوبہ بندی کریں گے تو اس سے بھی آپ کی بے چینی اور گھبراہٹ میں کمی ہو سکتی ہے۔

3. توجہ مرکوز رکھیں

سمت، قطب نما، جی پی ایس

Getty Images
اگر آپ ایک سے زیادہ کام ساتھ کر رہے ہیں تو سمت کا تعین کرنا مشکل ہو سکتا ہے

فون پر بات کرنے، میسج کرنے یا کسی اور چیز کے بارے میں سوچنے سے بھی آپ کو سمت کا تعین کرنے میں مشکل ہو سکتی ہے۔

کوشش کریں کہ اپنے سامنے موجود اس کام پر پوری توجہ رکھیں اور اپنے آس پاس موجود چیزوں پر غور کرتے رہیں۔

4. نشانیاں تلاش کریں

استنبول، ترکی

Getty Images
شہر کی اونچی عمارتوں کو نظر میں رکھنا سمت کے تعین میں مدد دے سکتا ہے

کوئی جانی پہچانی یا منفرد نشانی تلاش کریں اور اس پر اپنی نظر رکھیں۔

اگر آپ کسی شہر میں ہیں تو یہ سب سے بلند عمارت ہو سکتی ہے۔

ہر موڑ پر یہ دیکھیں کہ آپ اس عمارت کی کس جانب ہیں۔ اس سے آپ کو اپنے ذہن میں اس علاقے کا نقشہ تیار کرنے میں مدد ملے گی۔

5. اپنے پیچھے دیکھیں

سمت، قطب نما، جی پی ایس

Getty Images
پیچھے دیکھنا اور اس جگہ کو یاد کرنا واپسی کے سفر میں مددگار ثابت ہو سکتا ہے

اکثر لوگ صرف اس چیز پر توجہ دیتے ہیں جو ان کے سامنے ہوتا ہے مگر وہ لوگ راستہ تلاش کرنے میں زیادہ ماہر ہوتے ہیں جو نہ صرف آگے دیکھتے ہیں، بلکہ اپنے پیچھے موجود چیزوں پر توجہ دیتے ہیں۔

خاص طور پر اگر آپ کو اسی راستے سے واپس آنا ہے تو یہ ایک زبردست مشورہ ہے۔

6. جگہوں سے یادیں جوڑ لیں

دماغ، یادداشت،

Getty Images
جیسے جیسے آپ چلتے جائیں، اس جگہ کے متعلق یادیں بناتے رہیں، بعد میں یہ کام آئیں گی!

یہ خاص طور پر اس وقت مددگار ثابت ہو سکتا ہے جب آپ دوبارہ اسی جگہ جا رہے ہوں یا وہاں سے واپس آ رہے ہوں۔

اگر آپ پہلی مرتبہ کسی جگہ جاتے ہوئے کوئی بات کر رہے تھے یا کوئی گانا سن رہے تھے تو آپ کو واپس وہاں جاتے ہوئے اہم مقامات پر کافی فائدہ مند اشارے مل سکتے ہیں۔

7. تصویریں لیں

جاپان

Getty Images
جاتے جاتے تصاویر لیتے رہنا راستہ سمجھنے میں مدد دے سکتا ہے

اگر آپ کو کوئی سفر دوبارہ کرنا ہے تو اہم جگہوں پر تصاویر لیں اور بعد میں انھیں غور سے دیکھیں۔

تحقیق سے یہ بھی معلوم ہوتا ہے کہ تصاویر ویڈیوز کے مقابلے میں زیادہ مؤثر ثابت ہوتی ہیں۔

8. اپنے سفر کے بارے میں سوچیں

ذہن، یادداشت

Getty Images
کسی جگہ کے بارے میں مضبوطی سے ذہنی نقشہ بنا لیں

بعد میں اپنے ذہن میں اس سفر پر دوبارہ غور کریں، اور آپ نے جو کیا اس کو تصور کریں۔ ایسا کرنے سے آپ اپنے ذہن میں وہ اعصابی کنکشن مضبوط کر رہے ہوں گے جو آپ کی یادداشت بناتے ہیں۔ اس سے آپ کی اس راستے کے بارے میں یادداشت مضبوط ہوگی۔


اور اگر پھر بھی آپ اپنی سمت تلاش کرنے میں ناکام ہیں، تو سمارٹ فون یا سیٹلائٹ نیویگیشن سے مدد لی جا سکتی ہے۔

مگر یاد رکھیں کہ آپ جی پی ایس پر جتنا زیادہ انحصار کریں گے، آپ سمت کے تعین کی اپنی قدرتی حِس کو اتنی کم ورزش کروائیں گے۔

امید ہے کہ آپ کا سفر اچھا گزرے گا!

Comments - User is solely responsible for his/her words

  •  
  •  
  •  
  •  
  •  
  •  
  •  
  •  
  •  
  •  
  •  
  •  

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 17350 posts and counting.See all posts by british-broadcasting-corp