کم کارڈیشیئن نے کانیے ویسٹ سے طلاق کا مقدمہ دائر کر دیا


کم کارڈیشیئن، کانیے ویسٹ

امریکی میڈیا کے مطابق کم کارڈیشیئن نے ریپر کانیے ویسٹ سے طلاق کے لیے مقدمہ دائر کر دیا ہے۔

یہ جوڑا تقریباً سات سال سے رشتہ ازدواج میں منسلک ہے اور ان کے ایک دوسرے سے چار بچے ہیں۔

ازدواجی مشکلات کی کئی ماہ سے گردش کر رہی افواہوں کے بعد سلیبرٹی نیوز ویب سائٹ ٹی ایم زی نے یہ خبر بریک کی ہے۔

امریکی میڈیا کی رپورٹس کے مطابق 40 سالہ ریئلٹی ٹی وی سٹار نے بچوں کی مشترکہ قانونی اور جسمانی تحویل کی درخواست کی ہے۔

یہ بھی پڑھیے

کم کارڈیشیئن ’خطرناک ترین‘ آن لائن سلیبرٹی

ٹی وی سٹار کم کارڈیشیئن کو پیرس میں لوٹ لیا گیا

کارڈیشیئن خاندان نے کروڑوں ڈالر کیسے کمائے؟

کم کارڈیشیئن کی نجی جزیرے پر ’عاجزانہ‘ سالگرہ پارٹی پر کڑی تنقید

دونوں میں سے کسی نے بھی عوامی طور پر کوئی تبصرہ نہیں کیا ہے۔

یہ جوڑا دنیا کے سب سے معروف سٹارز میں سے ہے اور دونوں ہی اپنی اپنی زندگی میں انتہائی کامیاب ہیں۔

کم کو سب سے پہلے اُن کے خاندان سے متعلق ای! ٹیلیویژن کے ایک ریئلٹی شو کی وجہ سے 2007 میں شہرت ملی۔ تب سے لے کر اب تک کیپنگ اپ ود دی کارڈیشیئنز انتہائی مقبول پروگرام رہا ہے اور آئندہ سال اس کی اکیسویں اور آخری سیریز نشر ہوگی۔

انھیں کاروبار کے بھی کئی شعبوں میں کامیابی ملی ہے جس میں موبائل ایپس سے لے کر میک اپ تک شامل ہے۔ فوربز کے مطابق ان کی ذاتی دولت 78 کروڑ ڈالر کے قریب ہے۔

دوسری جانب کانیے ویسٹ 15 سال سے بھی زیادہ عرصے سے ریپ موسیقی کے سب سے بڑے ناموں میں سے ہیں۔ گریمی ایوارڈ جیتنے والے موسیقار نے فیشن ڈیزائننگ میں بھی کامیابی حاصل کی ہے۔

کم کارڈیشیئن، کانیے ویسٹ

یہ جوڑا پہلے کئی سالوں تک دوست رہا اور ویسٹ 2010 میں اس خاندان کے ریئلٹی شو میں بھی آئے تھے۔

ان کی پہلی بیٹی نارتھ جون 2013 میں پیدا ہوئیں۔

کانیے ویسٹ نے کم کارڈیشیئن کو شادی کی پیشکش کرنے کے لیے سان فرانسسکو جائنٹس بیس بال سٹیڈیم کرائے پر لیا اور ایک آرکیسٹرا کی خدمات حاصل کی تھیں۔

https://www.instagram.com/p/fxmr6XOS_Y/?utm_source=ig_embed

ان کی شادی مئی 2014 میں اٹلی میں ہوئی اور شادی کے دن اُن کے بوسے کی تصویر اس وقت انسٹاگرام کی سب سے زیادہ لائک کی جانے والی پوسٹ بنی۔ اس وقت تک وہ اور ان کی بہنیں سوشل میڈیا کو ایک آرٹ فارم میں بدل چکی تھیں اور ان کی آن لائن مقبولیت نے ان کی کاروباری کامیابی اور شہرت کو مزید بلندی پر پہنچا دیا۔

کارڈیشیئن نے اس سے اگلے سال اس جوڑے کے پہلے بیٹے سینٹ ویسٹ کو جنم دیا۔ بعد میں ان کے دو مزید بچے شکاگو اور سام ایک متبادل ماں (سروگیٹ) کے ذریعے پیدا ہوئے کیونکہ کم کارڈیشیئن اپنے گذشتہ حمل کے دوران طبی پیچیدگیوں کی شکار ہوئی تھیں۔

یہ جوڑا شاید ہی کبھی ٹیبلائڈ اخباروں کی شہ سرخیوں سے دور رہا ہو، خاص طور پر تب جب کم کارڈیشیئن کو پیرس میں 2016 میں اسلحے کے زور پر لوٹ لیا گیا تھا۔

https://www.instagram.com/p/ogSSO6uS9C/?utm_source=ig_embed

گذشتہ سال کانیے ویسٹ نے امریکی صدارتی دوڑ میں حصہ لیا مگر ناکام رہے۔ اپنی مہم کے دوران ریپر کی آن لائن پوسٹس اور عوام کے سامنے آنے کے انداز نے تشویش کو جنم دیا اور کم کارڈیشیئن کو اس حوالے سے بات کرنی پڑی۔

اُنھوں نے کہا کہ اُن کے شوہر کو بائی پولر ڈس آرڈر ہے اور وہ ‘زبردست مگر پیچیدہ شخص’ ہیں۔ اُنھوں نے عوام اور میڈیا سے کہا کہ وہ اُن کی ذہنی صحت کے حوالے سے زیادہ ہمدردی کا مظاہرہ کریں۔

https://www.instagram.com/p/CFuL5M0gIlt/?utm_source=ig_embed

اُن کی طلاق کی افواہیں کئی ماہ سے گردش کر رہی تھیں اور خیال کیا جا رہا تھا کہ اُنھوں نے مشہور وکیل لورا ویسر کی خدمات حاصل کی ہیں۔

پیج سِکس کے مطابق جنوری میں طے پا گیا تھا کہ طلاق کی کارروائی شروع کی جائے گی اور دعویٰ کیا کہ کانیے ویسٹ نے تہوار کا موسم کیلیفورنیا میں مقیم اس خاندان سے دور وائیومنگ میں اپنے رینچ پر گزارا تھا۔


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32295 posts and counting.See all posts by british-broadcasting-corp