شہباز گِل پر انڈے، سیاہی پھینکنے کا معاملہ: وزیراعظم عمران خان کے معاون جو کوئی لگی لپٹی نہیں رکھتے
وزیراعظم عمران خان کے معاونِ خصوصی برائے سیاسی روابط شہباز گل اکثر اپنے متنازع بیانات کی وجہ سے خبروں میں رہتے ہیں۔ تاہم پیر کو جب وہ لاہور ہائی کورٹ میں ایک مقدمے کی سماعت کے لیے پہنچے تھے تو احاطے میں ان پر انڈے اور سیاہی پھینکی گئی۔
صحافی عباد الحق کے مطابق لاہور ہائی کورٹ آ کر شہباز گِل راہداری سے عدالت کی طرف جا رہے تھے جب ان پر انڈے پھینکے گئے، جو ان کے ساتھ چلنے والے پولیس اہلکار کی چھتری پر لگے۔ اس کے ساتھ ہی ان کی جانب سیاہی بھی پھینکی گئی۔
موقع پر موجود پولیس اہلکاروں نے شہباز گل پر سیاہی اور انڈے پھیکنے والے افراد کو حراست میں لے لیا۔
مگر واقعے کے بعد شہباز گل نے تبصرہ کرتے ہوئے کہا کہ ان پر سیاہی پھینکنے والوں نے ’اپنے کالے کرتوتوں کی سیاہی پھینکی ہے۔‘
‘یہ غنڈہ گردی ہے۔ لیکن ہم ایک تھپڑ کے جواب میں دس تھپڑ نہیں ماریں گے۔ غنڈہ گردی کی تربیت نہیں دیں گے، سیاست کریں گے۔’
واضح رہے کہ عدالت میں پیش ہونے سے قبل ٹوئٹر پر جاری ایک پیغام میں شہباز گل نے بتایا تھا کہ وہ پیر کو دو بجے لاہور ہائی کورٹ میں پیش ہوں گے اور انھیں پتا چلا ہے کہ مسلم لیگ ن کے غنڈوں نے ان پر حملہ کرنے کی تیاری کر رکھی ہے۔
انھوں نے لکھا کہ ‘میں عمران خان کا سپاہی ہوں، عدالت آؤں گا، ڈرنے والا نہیں۔ سیاست کرنے پر یقین رکھتے ہیں طرح غنڈا گردی پر نہیں۔’
شہباز گل کون ہیں؟
وزیر اعظم پاکستان کے معاون خصوصی برائے پولیٹیکل کمیونیکیشن ڈاکٹر شہباز گل کے سیاسی کیریئر کے بارے میں تحریک انصاف کے اہم رہنما بھی کچھ زیادہ نہیں جانتے۔
سنہ 2018 میں انتخابات کے بعد ایک دن ڈاکٹر شہباز گل نامی شخص کو وزیر اعلی پنجاب سردار عثمان بزدار کا ترجمان مقرر کردیا گیا۔
یہ بھی پڑھیے
جیز کے اشتہار میں بہن کے ‘قتل کی نہیں پٹائی کی بات ہو رہی تھی‘
’شہباز صاحب! یہ کوئی مبارک دینے والی خبر یا موقع ہے؟‘
فیاض چوہان وزیراعظم کو پسند تھے تو تبدیل کیوں ہوئے؟
جب بھاگ دوڑ کر صحافیوں نے ان کا نمبر حاصل کیا تو ان کا کہنا تھا کہ ان دنوں وہ اپنی فیملی کے ساتھ ’امریکہ میں مقیم ہیں، چند دنوں میں پاکستان آ رہے ہیں اور پھر ملاقات ہوگی۔‘
یہ تھی شہباز گل کی پاکستانی سیاست میں انٹری، یعنی پاکستان آمد سے قبل ہی وہ وزیر اعلی پنجاب کے ترجمان مقرر ہوچکے تھے اور انھیں عثمان بزدار کی امیج بلڈنگ کی ذمہ داری سونپ دی گئی تھی۔
شہباز گل کا نام گوگل کریں تو معلوم ہوتا ہے کہ انھوں نے ملائیشیا کی ایک یونیورسٹی سے پی ایچ ڈی کی ڈگری حاصل کی اور مختلف بین الاقوامی اداروں میں بطور وزٹنگ پروفیسر خدمات سرانجام دیں۔
مختلف اداروں کی ویب سائٹس کے مطابق ڈاکٹر شہباز گل انٹرنیشنل مارکیٹنگ اور انٹرنیشنل بزنس کے مضامین پر عبور رکھتے ہیں۔
اگرچہ ڈاکٹر شہباز گل تحریکِ انصاف کے شروعات کے ممبران میں سے نہیں تاہم ان کے قریبی ذرائع کا کہنا ہے کہ وزیراعظم عمران خان سے ان کا تعلق سنہ 2003، 2004 میں امریکہ میں قائم ہوا۔
ان کی پی ٹی آئی میں باقاعدہ شمولیت 2017 اور 2018 میں الیکشن مہم کے دوران ہوئی۔
شہباز گل کو خصوصی طور پر امریکہ سے بلوایا گیا اور ان کا بسیرا بنی گالا میں وزیراعظم عمران خان کی رہائش گاہ میں ہی رکھا گیا۔ وہ انتخابی مہم کے دوران عمران خان کو ان کی تقاریر میں مدد کیا کرتے تھے۔
انھیں بنیادی طور پر ایک محقق کی حیثیت سے وزیراعظم نے اپنے ساتھ رکھا اور جلسے کے لیے تقاریر کی تیاری میں ان کی مدد لی جاتی رہی۔
اس کے بعد انھیں مختلف ٹاک شوز میں متعارف کروایا گیا جہاں اپوزیشن کو آڑے ہاتھوں لینا اور ان کے خلاف جارحانہ رویہ اپنانا ان کا خاصہ بن گیا۔
جب تحریک انصاف کو 2018 کے انتخابات میں حکومت کا بنانے کا موقع ملا تو شہباز گل کو پہلا کام وزیراعلٰی پنجاب عثمان بزدار کی معاونت سونپا گیا۔
عثمان بزدار کو جس وقت وزیراعلیٰ پنجاب بنایا گیا تو اسی وقت سے یہ خیال کیا جاتا تھا کہ پنجاب میں وزیراعلٰی کو چلانے کے لیے ان کے ساتھ ایک مضبوط بندہ ہونا چاہیے۔
وزیر اعلی پنجاب کا ترجمان مقرر ہونے کے بعد ان کی سیاسی اننگز کا صحیح معنوں میں آغاز ہوا جہاں انھوں نے مسلم لیگ ن کی رہنما مریم نواز کو اپنا ہدف بنایا۔
دیکھتے دیکھتے شہباز گل نے وزیراعلیٰ کی صدارت میں ہونے والے اجلاسوں میں بیورو کریسی اور کابینہ کے اراکین کے ساتھ جارحانہ رویہ اپنانا شروع کر دیا اور یہ تاثر جانے لگا کہ عثمان بزدار تو درحقیقت صرف نام کے وزیراعلیٰ ہیں، اصل کام تو شہباز گل کرتے ہیں۔
کابینہ اور معمول کی میٹنگز کے اندر شہباز گل کے رویے سے پی ٹی آئی کے سینئیر رہنماؤں اور بیوروکریسی کو بہت شکایات تھیں اور یہ بات وزیراعلیٰ پنجاب نے بھی محسوس کی۔
ٹاک شوز میں سخت لہجہ رکھنے پر وہ عمران خان کے مزید قریب تو آگئے لیکن ساتھ ہی کئی غلطیاں ان کے کھاتے میں جمع ہوتی رہیں، جن میں سے وزیر اعلی پنجاب سے مشاورت میں دوری، پولیس سٹیشنوں کی انسپکشن کا نوٹیفیکیشن اور میڈیا سے اچھے تعلقات نہ رکھنا سرفہرست ہیں۔
مبصرین کے مطابق وزیر اعلی پنجاب کو بھی ان کی بعض باتیں ناگوار گزریں جس پر آہستہ آہستہ ڈاکٹر شہباز گل کے خلاف لاوا پکتا رہا اور آخر ایک دن انھیں وزیر اعلی پنجاب کے ترجمان کے عہدے سے ہٹا دیا گیا۔
عہدے سے ہٹنے کے چند دن بعد وہ اسلام آباد پہنچ گئے اور وزیر اعظم کی میٹنگز میں نظر آنے لگے۔ یہی نہیں، بلکہ ماضی کے برعکس انھوں نے دارالحکومت آ کر اینکر پرسنز اور میڈیا کے نمائندوں سے اچھے تعلقات بنانے کی کوشش کی۔
آخر کار 13 مئی 2020 کو وزیر اعظم نے ان پر اعتماد کا اظہار کرتے ہوئے انھیں اپنا معاون خصوصی مقرر کر دیا۔
ایک جانب ڈاکٹر شہباز گل وزیر اعظم عمران خان کی حکومت اور تحریک انصاف کا دفاع کرنے میں مصروف ہوتے ہیں تو دوسری جانب ان کا ٹوئٹر اکاؤنٹ شہباز شریف اور دیگر اپوزیشن لیڈران کے خلاف استعمال ہوتا رہتا ہے۔
تاہم شہباز گل پاکستانی سیاست میں نئے ہیں اور روایتی سیاست دانوں کے طرح موقع شناس نہیں۔ وہ بغیر کوئی لگی لپٹی رکھے بات کر جاتے ہیں اور بظاہر ’ٹیم ورک‘ کے بجائے ’سولو فلائٹ‘ پر یقین رکھتے ہیں۔
٭اس رپورٹ کے لیے صحافیوں اسلم مراد اور قذافی بٹ نے بھی مواد فراہم کیا۔
- خاتون فُٹ بال شائق کو گلے لگانے پر ایرانی گول کیپر پر 30 کروڑ تومان جُرمانہ عائد: ’یہ تاریخ میں گلے ملنے کا سب سے مہنگا واقعہ ثابت ہوا‘ - 24/04/2024
- ’مغوی‘ سعودی خاتون کراچی سے بازیاب، لوئر دیر سے تعلق رکھنے والا مبینہ ’اغوا کار‘ بھی زیرِ حراست: اسلام آباد پولیس - 24/04/2024
- جنوبی کوریا کے ’پہلے اور سب سے بڑے‘ سیکس فیسٹیول کی منسوخی: ’یہ میلہ خواتین کے لیے نہیں کیونکہ ٹکٹ خریدنے والے زیادہ تر مرد ہیں‘ - 24/04/2024
Facebook Comments - Accept Cookies to Enable FB Comments (See Footer).