اسرائیل میں مذہبی اجتماع کے دوران بھگدڑ، درجنوں ہلاکتوں کا خدشہ

  •  
  •  
  •  
  •  
  •  
  •  
  •  
  •  
  •  
  •  
  •  
  •  


اسرائیل

EPA

اسرائیل کے شمال مشرقی حصے میں ایک مذہبی تہوار کے دوران بھگدڑ کی وجہ سے درجنوں افراد ہلاک ہو گئے ہیں۔

ملک میں ہنگامی حالات سے نمٹنے والے ادارے ایم ڈی اے نے اموات کی تصدیق کی ہے تاہم اعداد و شمار جاری نہیں کیے۔ ایم ڈی اے کا کہنا ہے کہ درجنوں افراد اس واقعے میں زخمی ہو گئے ہیں۔

اسرائیلی اخبار ہاریٹز کے مطابق 44 افراد کی ہلاکت ہوئی ہے۔ ریسکیو اہلکار جائے وقوعہ سے زخمیوں کو ہسپتال منتقل کر رہے ہیں۔

اسرائیل کے وزیر اعظم بنیامن نتن یاہو نے واقعے کو ’بڑی تباہی‘ قرار دیا ہے اور لواحقین کے ساتھ ہمدردی کا اظہار کیا ہے۔

یہ بھی پڑھیے

بنارس میں مذہبی اجتماع میں بھگدڑ، 19 افراد ہلاک

ایتھیوپیا میں فائرنگ اور بھگدڑ، متعدد افراد ہلاک

کورونا وائرس کی عالمی وبا کے آغاز کے بعد جبل الجرمق (ماؤنٹ میرن) پر لاگ با اومر کے تہوار میں سب سے زیادہ لوگ شریک ہوئے ہیں۔ یہاں وائرس کے پھیلاؤ کا خدشہ ہونے کے باوجود لاکھوں افراد نے شرکت کی۔

تاہم اب اس واقعے کے بعد یہاں درجنوں ایمبولینس گاڑیاں موجود ہیں اور ریسکیو اہلکاروں نے زمین پر یہ لاشیں رکھی ہوئی ہیں۔ ہولیس نے تمام لوگوں سے اپیل کی ہے کہ وہ یہاں سے نکل جائیں۔

واضح رہے کہ ہر برس لاکھوں کی تعداد میں قدامت پرست یہودی لا با اومر کا تہوار مناتے ہیں۔ اس سلسلے میں رات بھر عبادات اور ڈانس کے ذریعے جشن منایا جاتا ہے۔

اسرائیل

Reuters

ایمرجنسی حکام کا کہنا ہے کہ جائے وقوعہ پر 38 زخمی افراد کی حالت تشویشناک ہے۔ چھ مزید تشویشناک حالت کے مریضوں کو ہسپتال منتقل کر دیا گیا ہے جبکہ دیگر افراد کو معمولی چوٹیں آئی ہیں۔

ایک ٹویٹ کے مطابق ’ایم ڈی اے درجنوں افراد کی جان بچانے کی کوشش کر رہا ہے۔ آخری متاثرہ فرد کی (ہسپتال) منتقلی تک ہار نہیں مانیں گے۔‘

واقعہ کیسے پیش آیا؟

ابتدائی معلومات کے مطابق جائے واقعہ پر ایک عمارت گِر گئی تھی تاہم بعد میں ایم ڈی اے نے بتایا کہ درحقیقت یہاں ایک بھگدڑ مچ گئی تھی۔ پولیس ذرائع نے ہاریٹز کو بتایا کہ کچھ شرکا سیڑھیوں پر پھسل گئے تھے اور اس سے درجنوں افراد گِر پڑے۔

ایک عینی شاہد کا کہنا تھا کہ ’یہ سب کچھ ہی سیکنڈز میں ہوا۔ لوگ گرتے گئے اور ایک دوسرے کو روند کر آگے بڑھتے گئے۔ یہ تباہ کن تھا۔‘

انٹرنیٹ پر تقریب کی ویڈیوز میں دیکھا جا سکتا ہے کہ ہزاروں لوگ ایک دوسرے کے ساتھ کھڑے ہیں۔ واقعہ پیش آنے کے بعد ان لوگوں کو تقریب سے نکلنے میں کافی مشکل پیش آئی۔

اسرائیل

Getty Images

شرکا میں سے ایک فرد نے بتایا کہ لاؤڈ سپیکر پر بم کی اطلاع دی گئی تھی اور شرکا کو منتشر ہونے کا کہا گیا تھا۔

چینل 12 ٹی وی پر ایک شخص نے بتایا کہ ’کسی کے ذہن و گمان میں بھی نہیں تھا کہ یہاں یہ ہو گا۔‘

’خوشی کا تہوار غم میں تبدیل ہو گیا۔ روشنی تاریکی میں بدل گئی۔‘

قدامت پرست مذہبی ویب سائٹ بیہادری ہاریدم کے رپورٹر یانکی فاربر نے واقعے کو ’بڑی تباہی` قرار دیا ہے۔

انھوں نے بی بی سی کو بتایا کہ ’ایک ہزار سے زیادہ لوگوں نے چھوٹی سی جگہ پر جانے کی کوشش کی اور ایک دوسرے پر گِرنے لگے۔

حکام نے بڑے ہجوم کی وجہ سے ایس او پیز پر عملدرآمد کرانے میں ناکام رہے تھے۔

پولیس نے دو ایسے افراد کو گرفتار کیا ہے جنھوں نے مبینہ طور پر بھگدڑ سے قبل حکام کی جانب سے حالات کو قابو میں رکھنے کی کوششوں میں خلل ڈالا۔

Comments - User is solely responsible for his/her words

  •  
  •  
  •  
  •  
  •  
  •  
  •  
  •  
  •  
  •  
  •  
  •  

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 18954 posts and counting.See all posts by british-broadcasting-corp