کریپٹو کرنسی: بٹ کوائن کی گھٹتی قدر کو ایلون مسک کی دوبارہ ٹویٹ کا سہارا


ایلون مسک ٹیسلا کے ساتھ ساتھ راکٹ بنانے والی کمپنی سپیس ایکس بھی کے بانی ہیں

ایلون مسک ٹیسلا کے ساتھ ساتھ راکٹ بنانے والی کمپنی سپیس ایکس بھی کے بانی ہیں

امریکی ٹیکنالوجی کمپنی ٹیسلا کے سربراہ ایلون مسک کی جانب سے ٹویٹس کے باعث ڈیجیٹل کرنسی بٹ کوائن کی قدر میں تبدیلی کا سلسلہ جاری ہے اور اس مرتبہ دوبارہ ان کی ٹویٹ کے بعد بٹ کوائن کی تیزی سے گرتی قدر کو ایک بار پھر سہارا ملنا شروع ہوا ہے۔

ٹیسلا کے سربراہ کا کہنا ہے کہ ان کی کمپنی نے بٹ کوائن فروخت نہیں کیے ہیں جبکہ اس سے قبل اتوار کو انھوں نے اپنی ایک ٹویٹ میں اس کے برعکس بات کی تھی۔ایلون مسک نے اپنی حالیہ ٹویٹ میں انھوں نے لکھا کہ ’قیاس آرائیوں کو ختم کرنے کے لیے ٹیسلا نے کوئی بٹ کوائن فروخت نہیں کیا ہے۔‘

کرپٹو کرنسی کے قدر کی نگرانی کرنے والے ادارے کوائن بیس کے مطابق ایلون مسک کی جانب سے وضاحتی ٹویٹ کرنے کے پانچ منٹ کے اندر ہی بٹ کوائن کی قدر میں 3.7 فیصد اضافہ ہوا اور اس کی قدر 42566 ڈالرز سے بڑھ کر 44138 ڈالرز پر پہنچ گئی۔

یہ بھی پڑھیے

کیا بجلی کا بے تحاشہ استعمال بٹ کوائن کو ڈبو سکتا ہے؟

دنیا کے امیر ترین شخص کی کامیابی کے چھ راز

ایلون مسک دنیا کے امیر ترین شخص، مگر اتنی دولت کا کیا کریں گے؟

’میں نے جعلی ایلون مسک کے فراڈ میں چار لاکھ پاؤنڈ گنوا دیے‘

عالمی سطح پر بٹ کوائن کی قدر میں گراوٹ کا حالیہ معاملہ اتوار کو اس وقت شروع ہوا تھا جب ٹوئٹر پر کرپٹو وہیل نامی ایک صارف نے ٹویٹ کرتے ہوئے لکھا تھا کہ ’بٹ کوائنز خریدنے والے صارف اگلی ششماہی میں اس وقت پچھتائیں گے جب انھیں یہ علم ہو گا کہ ٹیسلا نے اپنے خریدے ہوئے بٹ کوائنز کو فروخت کر دیا ہے۔‘

اس صارف نے مزید لکھا تھا کہ ’ایلون مسک کو اس بارے میں جو اتنی نفرت کا سامنا کرنا پڑ رہا ہے میں اس کا ذمہ دار ان کو نہیں ٹھہراؤں گا۔‘اس صارف کی ٹویٹ کے جواب میں ایک گھنٹے بعد امریکی ٹیکنالوجی کمپنی ٹیسلا کے سربراہ ایلون مسک نے لکھا تھا ’درحقیقت۔‘

تاہم انھوں نے اپنی جوابی ٹویٹ میں یہ واضح نہیں کیا تھا کہ انھوں نے ’درحقیقت‘ ٹیسلا کی جانب سے خریدے گئے بٹ کوائنز بیچنے کے متعلق کہا ہے یا ان پر ہونے والی تنقید کے جواب میں لکھا تھا۔

کرپٹو کرنسی ٹریکر کمپنی کوائن بیس کے مطابق ایلون مسک کی اس ٹویٹ کے بعد بٹ کوائن کی قدر میں تیزی سے گراوٹ شروع ہو گئی تھی اور چند ہی گھنٹوں میں اس کی قدر میں آٹھ فیصد گراوٹ کے بعد اس کی قدر 43 ہزار ڈالرز سے نیچے گر گئی تھی۔ اس کی قدر میں گراوٹ کا عمل اتوار کو شروع ہو گیا تھا لیکن اس میں تیزی ایلون مسک کی جوابی ٹویٹ کے بعد دیکھنے میں آئی تھی۔

Bitcoin

امریکی ٹیکنالوجی کپمنی ٹیسلا کے سربراہ ایلون مسک گذشتہ کچھ عرصے سے کرپٹوکرنسی کے حامی رہے ہیں۔ ایلون مسک کی جانب سے بٹ کوائن کے متعلق یہ پوسٹ ایک ایسے وقت میں سامنے آئی ہیں جب گذشتہ ہفتے انھوں نے اعلان کیا تھا کہ ان کی کمپنی ٹیسلا نے اپنی گاڑیوں کی ادائیگی بٹ کوائن کے ذریعے قبول کرنے کے منصوبے کو ترک کر دیا ہے۔

اس وقت بھی بٹ کوائن کی قدر میں 12 فیصد گراوٹ دیکھنے میں آئی تھی۔

انھوں نے گذشتہ ہفتے ٹیسلا کی جانب سے گاڑیوں کی ادائیگی بٹ کوائن کے ذریعے کرنے کے منصوبے کو ترک کرنے کا اعلان کرتے ہوئے کہا تھا کہ ’ہمیں بٹ کوائن کی مائننگ اور ٹرانزیکشن کے لیے تیزی سے بڑھتی ہوئی فوسل فیول کی کھپت کے بارے میں تشویش ہے خصوصاً کوئلہ جو کسی بھی ایندھن میں سب سے زیادہ منفی اخراج کا باعث بنتا ہے۔‘

گذشتہ بدھ کو ٹوئٹر پر اپنے ایک پیغام میں ان کا کہنا تھا کہ ’بہت سی سطحوں پر کرپٹو کرنسی ایک اچھی چیز ہے اور ہم سمجھتے ہیں کہ اس کا روشن مستقبل ہے لیکن ماحولیات کی قیمت پر ہم ایسا نہیں کر سکتے۔‘

یاد رہے کہ مارچ میں انھوں نے اس بات کا اعلان کیا تھا کہ ‘لوگ اب بٹ کوائن کے ذریعے ادائیگی کر کے ان کی کمپنی کی گاڑیاں خرید سکتے ہیں۔‘ جبکہ اس سے قبل فروری میں بھی ان کی جانب سے کہا گیا تھا کہ انھوں نے بٹ کوائن میں 1.5 بلین ڈالرز کی سرمایہ کاری کی ہے۔

ایلون مسک گذشتہ چند ماہ سے کرپٹو کرنسی کی بہت حمایت کرتے رہے ہیں اور انھوں نے بٹ کوائن کے علاوہ ‘ڈاگی کوائن’ نامی کریپٹو کرنسی کے متعلق بھی بات کی تھی۔

ایلون مسک کی ٹویٹ اور بٹ کوائن صارفین کا ردعمل

امریکی ٹیکنالوجی کمپنی ٹیسلا کے سربراہ ایلون مسک کا اتوار کے روز بٹ کوائن کے متعلق ٹویٹ نے جہاں کریپٹو کرنسی کی قدر میں ہلچل پیدا کر دی وہی دنیا بھی میں بٹ کوائن خریدنے والے صارفین کے لیے بھی ایک نئ مشکل نے جنم لے لیا۔ بٹ کوائن کی تیزی سے گرتی قیمت کے باعث بہت سے صارفین نے سوشل میڈیا پر ایلون مسک کی ٹویٹ پر مخلتف تبصرے کرنا شروع کر دیے۔

ایک سوشل میڈیا صارف نے ایلون مسک کو ٹیگ کرتے ہوئے لکھا ’سر برائے مہربانی مدد کریں، آپ کے بٹ کوائن کے متعلق بیان نے ایک ہیجان کی کیفیت پیدا کر دی ہے، میں نے اپنی تمام جمع پونجی گنوا دی ہے، آپ بٹ کوائن کے متعلق کچھ مثبت بات کریں تاکہ میرے جیسے افراد کو کچھ بچانے کا موقع مل سکے۔‘

اسی طرح ایک اور صارف نے ایلون مسک کی ٹویٹ پر غصے کا اظہار کرتے ہوئے مائیکرو سافٹ کے بانی بل گیٹس کو ہی درخواست کر ڈالی جس میں اس نے لکھا کہ ’بل گیٹس صاحب صرف آپ ہی ہیں جو بٹ کوائن کی گرتی قیمت کو روک سکتے ہیں۔ ایلون مسک سمجھتے ہیں وہ اکیلے ہیں جو اس کی قیمت میں اتار چڑھاؤ پیدا کر سکتے ہیں، بل گیٹس صاحب ان کو ذرا ان کی اوقات دکھائیں۔‘

جبکہ ایک اور صارف نے ایلون مسک سے درخواست کرتے ہوئے لکھا کہ ’ کیا آپ بٹ کوائن کے خلاف ٹویٹس کرنا بند کر سکتے ہیں؟ ہم کریپٹو کرنسی پر آپ کا اثر رسوخ جانتے ہیں اور آپ کو یہ مزید ثابت کرنے کی ضرورت نہیں ہے کیونکہ آپ پہلے ہی دنیا کے تیسرے امیر ترین شخص ہیں، آپ کو اس سے زیادہ کیا چاہیے؟ جبکہ میں نے حال ہی میں بٹ کوائن میں سرمایہ کاری کرنا شروع کی ہے تاکہ میں اپنی والدہ کو ایک گھر خرید کے دے سکوں اور انھیں ہر ماہ کرائے کی فکر نہ ہو۔‘


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32291 posts and counting.See all posts by british-broadcasting-corp