چیمپئنز لیگ کے فائنل میں مانچسٹر سٹی کو شکست، چیلسی کے مداحوں کا جشن

ویب ڈیسک — چیمپیئنز لیگ کے فائنل میں فٹ بال کلب چیلسی نے مانچسٹر سٹی کو شکست دے کر ٹرافی اپنے نام کرلی۔
پرتگال کے شہر پورتو میں ہفتے کو کھیلے گئے فٹ بال چیمپیئنز لیگ کے فائنل میں چیلسی نے مانچسٹر سٹی کو صفر کے مقابلے میں ایک گول سے شکست دی۔

دو یورپین کلبز کے درمیان ہونے والے اس فائنل کے پہلے ہاف کے 42 ویں منٹ میں چیلسی کے کھلاڑی کائی ہاوٹرز نے گول کرکے اپنی ٹیم کو برتری دلائی جو میچ کے آخر تک برقرار رہی۔

ہفتے کو کھیلے گئے میچ کے فائنل سے قبل مانچسٹر سٹی کو فیوریٹ قرار دیا جا رہا تھا اور یہ توقع تھی کہ وہ پہلی مرتبہ چیمپیئنز لیگ کا ٹائٹل اپنے نام کرنے میں کامیاب رہے گی۔

چیلسی نے مانچسٹر سٹی کو شکست دے کر دوسری مرتبہ چیمپئنز لیگ کا ٹائٹل اپنے نام کیا ہے۔

چیلسی کی ٹیم نے یہ کامیابی جرمن فٹ بال منیجر تھومس ٹیوچل کی قیادت میں حاصل کی ہے۔