پی ٹی ایم کے سربراہ منظور پشتین ساتھیوں سمیت گرفتار


پشتون تحفظ تحریک (پی ٹی ایم) کے سربراہ منظور پشتین کو جمعرات کی شب خیبر پختونخوا کے جنوبی شہر کوہاٹ سے تین ساتھیوں سمیت گرفتار کر لیا گیا ہے۔

پی ٹی ایم کے رہنما عبد اللہ ننگیال نے وائس آف امریکہ کو منظور پشتین کی گرفتاری کی تصدیق کرتے ہوئے بتایا ہے کہ وہ بنوں سے ملحقہ نیم قبائلی علاقے جانی خیل میں جاری احتجاجی دھرنے میں شرکت کے لیے جا ریے تھے کہ گنبت کے علاقے سے کوہاٹ پولیس نے حراست میں لیا۔

عبداللہ ننگیال کے بقول، منظور پشتین کے ہمراہ حراست میں لیے گئے تحریک کے دیگر ساتھیوں میں بلال، ادریس اور ضہیب بھی شامل ہیں۔

انہوں نے بتایا کہ پولیس نے چاروں افراد کو نامعلوم مقام پر منتقل کر دیا ہے۔

دوسری جانب منظور پشتین اور ان کے تین ساتھیوں کی گرفتاری سے متعلق اب تک کسی قسم کا سرکاری بیان یا اعلامیہ جاری نہیں ہوا۔

پی ٹی ایم کے رہنما عبد اللہ ننگیال نے ایک سوال کے جواب میں کہا کہ بلال اور ضہیب پہلے سے درج مقدمات میں عدالت سے ضمانت پر ہیں جب کہ منظور پشتین اور ادریس کے خلاف مقدمات تو درج ہیں لیکن انہیں درج مقدمات میں نہیں بلکہ، ان کے بقول، جانی خیل میں جاری احتجاجی دھرنے میں شرکت کرنے سے روکنے کے لیے حراست میں لیا گیا ہے۔

یاد رہے کہ پی ٹی ایم کے کئی رہنما پہلے ہی ملک کی مختلف جیلوں میں قید ہیں جن میں جنوبی وزیرستان سے رکنِ قومی اسمبلی علی وزیر حیدر آباد کی سینٹرل جیل میں گزشتہ برس دسمبر سے قید ہیں۔

چند روز قبل سندھ ہائی کورٹ نے علی وزیر کی درخواست ضمانت کو مسترد کر دیا تھا۔

علاوہ ازیں، صوابی سے تعلق رکھنے والے یوسف علی خان بھی تقریباً چھ مہینوں سے قید ہیں اور ان پر سوشل میڈیا پر مبینہ طور پر ملک کے ریاستی اداروں کے خلاف بیان بازی کا الزام ہے۔

واضح رہے کہ کراچی میں پولیس مقابلے میں جنوبی وزیرستان سے تعلق رکھنے والے نوجوان نقیب اللہ محسود کی ہلاکت کے خلاف 2018 میں ہونے والے احتجاج کے دوران پی ٹی ایم کا قیام عمل میں آیا تھا۔

پی ٹی ایم رہنماؤں کا مؤقف ہے کہ ان کی تحریک کا مقصد ملک بھر کے پشتونوں کو درپیش سیکیورٹی، سیاسی، معاشی اور انتظامی مسائل کو اجاگر کرنا اور ان کے حل کے لیے لوگوں کو متحد کرنا ہے۔

وائس آف امریکہ

Facebook Comments - Accept Cookies to Enable FB Comments (See Footer).

وائس آف امریکہ

”ہم سب“ اور ”وائس آف امریکہ“ کے درمیان باہمی اشتراک کے معاہدے کے مطابق ”وائس آف امریکہ“ کی خبریں اور مضامین ”ہم سب“ پر شائع کیے جاتے ہیں۔

voa has 3331 posts and counting.See all posts by voa

Subscribe
Notify of
guest
0 Comments (Email address is not required)
Inline Feedbacks
View all comments