سمیع چوہدری کا کالم: ’ایسی فیلڈنگ قسمت کو بھی ہرا سکتی ہے‘

سمیع چوہدری - کرکٹ تجزیہ کار

  •  
  •  
  •  
  •  
  •  
  •  
  •  
  •  
  •  
  •  
  •  
  •  


باؤنڈری

Getty Images

یوں تو قسمت زندگی کے ہر پہلو میں کہیں نہ کہیں دخیل رہتی ہے مگر ٹیسٹ کرکٹ سے اس کا ناطہ کچھ زیادہ ہی عجیب اور پیچیدہ ہے۔

وہی گیند جو میچ کے اختتامی لمحات میں محمد رضوان کی آنکھوں کے عین سامنے زمین پر گر گیا، اگر ذرا مختلف زاویے سے بلے کو چُھو کر گزرا ہوتا تو پاکستان ایک نہایت یادگار فتح کے ساتھ سیریز میں برتری حاصل کر چکا ہوتا۔

اور اس غیر متوقع جیت نے پچھلے چار روز کی کئی خامیوں کی پردہ پوشی کر چھوڑی ہوتی۔ کوئی یہ نہ کہتا پایا جاتا کہ ٹاپ آرڈر کی ناکامی اس بیٹنگ لائن کو گُھن کی طرح چاٹ رہی ہے۔ نہ ہی کسی کو یہ یاد رہتا کہ عمران بٹ کے فٹ ورک میں اتنی کنفیوژن کیوں ہے۔

محمد رضوان کا چار فیلڈرز کے بیچ باؤنڈری کے عین قریب ایک عمدہ کیچ سبھی حافظوں میں محفوظ ہو چکا ہوتا۔ عمران بٹ کا دوسری سلپ سے لپک کر عابد علی کے سامنے سے کیچ جھپٹ لینا یوٹیوب ویڈیوز میں وائرل ہو رہا ہوتا۔

شاہین شاہ آفریدی کا پہلا سپیل اس میچ کی ہائی لائٹ قرار پاتا اور یہ جیت ان سبھی ڈراپ کیچز کی بھی پردہ پوشی کر جاتی جو محمد رضوان، محمد عباس اور حسن علی سے سرزد ہوئے۔

مگر قسمت کو اپنے طور سے چلنا تھا، سو چلی۔ چائے کے وقفے کے بعد اوسطاً ہر اوور میں دو گیندیں ایسی ہو رہی تھیں جو بلے باز چاہ کر بھی چھو نہیں پا رہے تھے۔ یہ چیز پاکستانی بولرز کے لیے نہایت حوصلہ افزا تھی۔ مگر دوسری جانب ویسٹ انڈین بلے باز قسمت کے ممنون ہو رہے تھے کہ کئی گیندیں نہایت خطرناک ’ایج‘ لینے کے باوجود سٹمپس اور قریبی فیلڈرز کی پہنچ سے دور رہ گئیں۔

گیٹی

Getty Images

بہرحال یہ نہایت ہی دلچسپ ٹیسٹ کرکٹ کا مظاہرہ تھا جو گذشتہ چار دن جمیکا میں دیکھنے کو ملا۔ پچ نے سبھی توقعات اور تخمینوں کو مات کر ڈالا اور دونوں ٹیموں کے بلے باز کھوجتے ہی رہ گئے کہ اس وکٹ پر کامیاب تکنیک کیا ہو سکتی ہے۔

پہلے روز بے تحاشہ سیم موومنٹ نے بلے بازوں کو پریشان کیے ڈالا۔ دوسری شام ذرا دیر کو وکٹ بیٹنگ کے لیے قدرے سہل ہوتی دکھائی دی مگر تیسری صبح یہ پھر سے بولنگ کے لیے بہترین ہو گئی۔ بابر اعظم اور محمد رضوان کی شراکت داری کے بیچ کچھ پل کو مستقل مزاج ہوتی نظر آ رہی تھی مگر اچانک بارش نے پھر سے اس میں دقت پیدا کر دی۔

سمیع چوہدری کے دیگر کالم

’درست‘ بولنگ ’تیز‘ بولنگ سے زیادہ ضروری ہے‘

سمیع چوہدری کا کالم: ’یہ شکست نہیں، یہ نری حماقت ہے‘

نیوزی لینڈ نے بدقسمتی کے لیے بھی کوئی جواز نہیں چھوڑا

یہ عجیب گرین ٹاپ تھی کہ جہاں تیسرے دن سے ہی کئی گیندیں بالکل بیٹھنے لگیں۔ کمنٹری باکس میں کولن کروفٹ نے بجا تجزیہ کیا کہ اگر ہوا میں ایسی نمی موجود نہ ہوتی تو گھاس تیسرے روز خشک ہو چکی ہوتی مگر نم آلود موسم نے گھاس کو بھی زندہ رکھا اور ویسٹ انڈین کنڈیشنز کی قدرتی تحلیل کے عمل میں وکٹ کے دوغلے باؤنس نے الگ سے بلے بازوں کو چکرا چھوڑا۔

لیکن اگر بابر اعظم کی ٹیم ٹیسٹ چیمپیئن شپ کے رواں سائیکل میں کسی نمایاں کارکردگی کی خواہاں ہے تو اس بیٹنگ یونٹ کو بھی اپنے بولنگ یونٹ جیسا جذبہ اور تسلسل پیدا کرنا ہو گا۔ جتنے قلیل ہدف کا تعاقب ویسٹ انڈیز کو کرنا تھا، اگر پاکستانی سیمرز ایسی تباہ کن بولنگ نہ کرتے تو ویسٹ انڈیز کی فتح کا مارجن بہت بہتر ہو سکتا تھا۔

کرکٹ

Getty Images

بابر اعظم کے لیے بھی یہ ایک بہترین میچ رہا۔ اگرچہ وہ جیت اپنے نام نہ کر پائے لیکن قلیل مجموعے کے دفاع میں جیسی باریک بین اور زیرک اپروچ درکار تھی، وہ اس پر پورا اُترے۔ بولرز کا بہترین استعمال کیا اور اہم ترین بات یہ کہ بلیک ووڈ کی پارٹنرشپ کے مشکل لمحات میں بھی حواس برقرار رکھے۔

اگر یہ کہا جائے کہ پاکستان اس میچ میں اپنی بری کرکٹ کے سبب ہارا تو یہ زیادتی ہو گی۔ دو سیشنز کے سوا پاکستان نے بہترین کرکٹ کھیلی مگر کمی صرف پارٹنرشپس کی رہ گئی۔ سیریز بچانے کی خاطر اب اگلے میچ میں اس بیٹنگ لائن کو بھی اپنے وقار کی لاج رکھنا ہو گی۔

سیریز سے پہلے سبھی تجزیوں میں یہ نکتہِ متفقہ تھا کہ امتحان ویسٹ انڈین بیٹنگ کا ہو گا کیونکہ پاکستانی بیٹنگ حالیہ چند سیریز میں اپنی حیثیت واضح کر چکی تھی۔ لیکن براتھویٹ کے ساتھیوں نے یہ مفروضہ پلٹ کر پاکستان پر ڈال دیا۔

اگر پاکستان کو چیمپئین شپ کا خواب زندہ رکھنا ہے تو یہ طے ہے کہ ایسی فیلڈنگ جیتے ہوؤں کو بھی ہرا سکتی ہے کیونکہ یہ تو طرف داری پر آمادہ قسمت کو بھی مایوس کر سکتی ہے۔


  •  
  •  
  •  
  •  
  •  
  •  
  •  
  •  
  •  
  •  
  •  
  •  

Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 21143 posts and counting.See all posts by british-broadcasting-corp