ہماری کہکشاں سے دور ایک ممکنہ سیارے کا نشان
ماہرین فلکیات کو پہلی مرتبہ ہماری کہکشاں سے باہر کچھ ایسے اشارے ملے ہیں جو ممکنہ طور پر ’مِلکی وے‘ سے باہر ایک سیارے کے وجود کا پتہ دیتے ہیں۔
اب تک ماہرین ہمارے سورج سے آگے تقریباً پانچ ہزار ’ایکسو پلینٹ‘ یا خلائی اجسام کا سراغ لگا چکے ہیں جو مختلف مداروں میں چکر لگا رہے ہیں، لیکن یہ تمام سیارے بہرحال اسی کہشاں کے اندر ہی ہیں جس میں ہمارا شمسی نظام موجود ہے۔
سیٹرن یا زحل کے حجم کا یہ نیا ممکنہ سیارہ امریکی خلائی ادارے کی دوربین ’چندرا ایکس رے‘ کی مدد سے دریافت کیا گیا ہے اور ماہرین کے مطابق یہ سیارہ ’میسیئر 51‘ نامی کہکشاں میں پایا جاتا ہے۔
یہ کہکشاں ہماری کہکشاں (مِلکی وے) سے تقریباً دو کروڑ 80 لاکھ شمسی سال کے فاصلے پر واقع ہے۔
خلائی تحقیق کے جریدے ’نیچر ایسٹرانومی‘ میں شائع ہونے والی اس تحقیق کے مطابق نئے ممکنہ سیارے کے وجود کا اندازہ ’ٹرانزِٹس‘ کے ذریعے لگایا گیا ہے۔
جب کوئی سیارہ کسی ستارے کے سامنے سے گزرتا ہے تو اس ستارے سے نکلنے والی شعاعوں کو کسی حد تک روک دیتا ہے جس سے کچھ وقت کے لیے روشنی کم ہو جاتی ہے۔ طاقتور دوربینوں کی مدد سے روشنی میں کمی کا اندازہ ہو جاتا ہے۔
ماضی میں بھی ہزاروں ایکسو پلینٹس یا خلائی اجسام کا سراغ لگانے کے لیے یہی تکنیک استعمال کی جا چکی ہے۔ ملکی وے سے بہت دور اس ممکنہ سیارے کا سراغ لگانے کے لیے ڈاکٹر روزانے ڈی سٹیفانو اور ان کے ساتھیوں نے ایکسریز (شعاعوں) میں کمی کا مطالعہ کیا ہے۔
نئے ممکنہ سیارے کے حوالے سے ماہرین کا کہنا ہے کہ خلاء کا وہ حصہ جہاں سے ایکسریز خارج ہو رہی ہیں وہ چھوٹا ہے، اس لیے اگر اس کے سامنے سے کوئی سیارہ گزرتا ہے تو زیادہ تر شعاعوں کو روک لیتا ہے جس کی وجہ سے ٹرانزِٹ کا پتہ لگانا آسان ہو جاتا ہے۔
ڈاکٹر سٹیفانو کہتی ہیں کہ ’ہم نے دوسری کہکشاؤں میں موجود سیاروں کا سراغ لگانے کے لیے جو طریقہ اپنایا ہے وہ واحد ایسا طریقہ ہے جسے استعمال کیا جا سکتا ہے۔‘
بی بی سی سے بات کرتے ہوئے انھوں نے کہا کہ ’یہ ایک خاص طریقہ ہے، اس لحاظ سے خاص ہے کہ ہم اس سے ایکسرے بائنریز کے ارد گرد موجود سیاروں کا سراغ لگانے کے لیے سیارے سے منعکس ہونے والی روشنی کو بہت دور سے بھی ماپ سکتے ہیں۔‘
مستقبل میں سیاروں کی تلاش
نئے ممکنہ سیارے والی ایکسرے بائنری کے اندر ایک سیاہ دائرہ یا نیوٹرون سٹار موجود ہے جو ایک بڑے ستارے کے گرد چکر لگا رہا ہے اور یہ بڑا ستارہ ہمارے سورج سے تقریباً 20 گنا بڑا ہے۔
ماہرین کے خیال میں نیوٹرن سٹار اصل میں ایک بہت بڑا ستارہ تھا جو دم توڑ گیا اور اس سے سیاروں کے اس نظام کا مرکز وجود میں آیا۔
ناسا کے ماہرین کے مطابق ان کے مشاہدے میں آیا ہے کہ روشنی میں کمی (ٹرانزِٹ) تقریباً تین گھنٹے تک جاری رہی جس دوران ایکسریز کا اخراج کم ہوتے ہوتے صفر تک پہنچ گیا۔
یہ بھی پڑھیے
21ویں صدی کا بڑا سائنسی منصوبہ: تیس برسوں میں تیار ہونے والی خلائی دوربین مشن کے لیے تیار
ہبل نے ستاروں کو بنتے اور ختم ہوتے دیکھا
ہبل دوربین کے 30 سال: سائنس کو اس سے کیا ملا؟
سیارہ زحل نیا ’چاند کا بادشاہ‘ بن گیا
ان مشاہدات اور دیگر معلومات کی بنیاد پر ماہرین نے اندازہ لگایا ہے کہ نیا ممکنہ سیارہ تقریباً زحل جتنا بڑا ہے اور یہ سیارہ اپنے مرکز یا نیوٹرون سٹار سے جس فاصلے پر چکر لگا رہا ہے وہ زحل اور ہمارے سورج کے باہمی فاصلے سے دوگنا زیادہ ہے۔
ڈاکٹر سٹیافانو کا کہنا ہے کہ یہ طریقہ ہمارے نظام شمسی سے باہر کے خلائی اجسام یا ایکسو پلینٹس کی دریافت میں بہت کامیاب ثابت ہوا ہے کیونکہ جب ہماری کہکشاں (ملکی وے) کے اندر توڑ پھوڑ ہو رہی ہوتی ہے تو دوسری کہکشاؤں میں جھانکنا بھی آسان ہو جاتا ہے۔
اس کی ایک وجہ یہ بھی ہے کہ دوسری کہکشاؤں کا ہم سے فاصلہ اتنا زیادہ ہے کہ دوربینوں تک آنے والی روشنی کم ہوتی جاتی ہے جس کا مطلب یہ بھی ہے کہ (ہماری زمین سے دیکھا جائے تو) دوسری کہکشاؤں میں تھوڑی سی جگہ پر بہت سے سیارے جمع ہیں اور ہر ایک سیارے کو الگ کر کے دیکھنا مشکل ہو جاتا ہے۔
اس تحقیق میں شامل ماہرین کو یہ تسلیم کرنے میں کوئی ہچکچاہٹ نہیں ہے کہ انھوں نے ایک نئے سیارے کی موجودگی کے حوالے سے جو اندازہ لگایا ہے اس کی تصدیق کے لیے مزید اعداد و شمار اور تحقیق کی ضرورت موجود ہے۔
ڈاکٹر سٹیافانو مزید بتاتی ہیں کہ ایکسرے میں کمی سے معلوم ہوتا ہے کہ ’شاید پوری کہکشاں میں محض چند درجن ہی ایسے خلائی اجسام موجود ہوں جن سے یہ روشنی نکل رہی ہو، اس لیے ہو سکتا ہے کہ ان خلائی اجسام کو الگ الگ دیکھنا ممکن ہو جائے۔
’اس کے علاوہ چند خلائی اجسام سے خارج ہونے والی ایکسریز اتنی روشن ہیں کہ ان سے نکلنے والی روشنی جب منعکس ہوتی ہے تو اسے ماپا جا سکتا ہے۔‘
وہ مزید کہتی ہیں ’اور آخر میں یہ امکان بھی ہے کہ ایکسریز کی اتنی بڑی مقدار ایک چھوٹی سے جگہ سے نکل رہی ہوں اور جب ایک (ہی) سیارہ اس کے سامنے سے گزرتا ہو تو اس کی تمام روشنی کو روک دیتا ہو۔‘
- کیا آئی پی ایل میں ’بے رحمانہ‘ بلے بازی کرکٹ کو ہمیشہ کے لیے بدل رہی ہے؟ - 25/04/2024
- مریم نواز اور پنجاب پولیس کی وردی:’کیا وزیراعلیٰ بہاولنگر کے تھانے کا دورہ بھی کریں گی؟‘ - 25/04/2024
- غزہ کی اجتماعی قبروں میں لاپتہ اہلخانہ کی تلاش: ’ہم اس بات کی اجازت نہیں دے سکتے کہ یہ چھوٹا سا معاملہ بن کر دب جائے‘ - 25/04/2024
Facebook Comments - Accept Cookies to Enable FB Comments (See Footer).