رنویر سنگھ کی برہنہ تصاویر یر شدید ردِ عمل اور کرینہ کے حاملہ ہونے کی افواہیں

نصرت جہاں - بی بی سی اردو ڈاٹ کام، لندن


’پریشان نہ ہوں میں حاملہ نہیں ہوں، یہ صرف پاستا اور وائن ہے جو دکھائی دے رہا ہے، اُف۔۔۔۔ سیف کا کہنا ہے کہ وہ پہلے ہی ملک کی آبادی میں کافی اضافہ کر چکے ہیں۔۔۔۔ انجوائے‘

کرینہ کپور نے انسٹاگرام اکاؤنٹ پر یہ پوسٹ اس وقت لکھی جب یورپ میں چھٹیاں مناتے ہوئے ان کی ایک تصویر وائرل ہو گئی جس میں ان کا پیٹ بڑھا ہوا نظر آ رہا تھا اور لوگوں نے قیاس آرائیاں شروع کر دیں کہ کرینہ کے ہاں تیسرا مہمان آنے والا ہے۔

کرینہ نے اپنے حاملہ ہونے کی افواہوں کو مسترد کرتے ہوئے کہا کہ چھٹیوں کے دوران انھوں نے خوب پاستا کھایا اور دل بھر کر وائن پی ہے۔ کرینہ آج کل اپنے شوہر سیف علی خان اور دونوں بیٹوں تیمور اور جیہ کے ساتھ یورپ میں چھٹیاں منا رہی ہیں۔

https://twitter.com/KareenaK_FC/status/1549439815590215680

ویسے کرینہ کی بات بھی درست ہی ہے کیونکہ کرینہ کے تو دو ہی بچے ہیں لیکن سیف کے چار بچے ہیں دو کرینہ کے ساتھ اور دو بچے، سارہ علی خان اور ابراھیم ان کی پہلی بیگم امریتا سنگھ کے ساتھ، تو یہاں معاملہ ‘ہم دو ہمارے دو’ نہیں بلکہ ہم تین اور ہمارے چار کا ہے۔

دوسری بات یہ کہ انڈسٹری ہی نہیں بلکہ پورے انڈیا میں سائز زیرو کرینہ نے ہی متارف کروایا تھا ایسے میں اگر وہ پاستا اور وائن کے ساتھ اس طرح کا سلوک کریں گی تو لوگ باتیں تو کریں گے ہی۔

https://www.instagram.com/p/CgBa6g3pwo3/

لیکن اگر سنجیدگی سے اس پر غور کیا جائے تو سوچنے والی بات ہے کہ جسم ہو یا کردار دوربین ہمیشہ صرف عورتوں پر ہی کیوں ہوتی ہے۔ چاہے وہ سشمیتا سین ہوں یا پھر ریا چکرورتی۔

’رنویر کا قصور نہیں کپڑے بندر اٹھا کر لے گئے‘

رنویر سنگھ

ایک جانب کرینہ ہیں جنھوں نے سائز زیرو کی شروعات کی تھی لیکن رنویر سنگھ نے بڑے بڑے لہنگے اور گھاگرے پہن کر ایک نیا ٹرینڈ شروع کیا تھا جسے کچھ لوگ ‘کول’ تو کچھ ‘اول جلول’ کہا کرتے تھے۔

رنویر اپنے لباس کی وجہ سے کافی سرخیوں میں رہا کرتے تھے۔ لیکن اس ہفتے انھوں نے کچھ ایسا کیا کہ سوشل میڈیا پر ہنگامہ برپا ہو گیا۔ اس بار وہ کپڑے پہننے کی وجہ سے نہیں بلکہ کپڑے نہ پہننے کے سبب خبروں میں ہیں۔

پیپر میگزین کے تازہ ترین کور پیج پر رنویر پوری طرح برہنہ نظر آ رہے ہیں۔ یہ وہی میگزین ہے جس پر کم کارڈیشن کے شیمپیئن فوٹو شوٹ نے انٹرنیٹ پر آگ لگا دی تھی۔ اب رنویر نے کتنی آگ لگائی یہ تو کہنا مشکل ہے ہاں وہ سوشل میڈیا پر کافی روسٹ ہو رہے ہیں۔

اس فوٹو شوٹ میں رنویر ایک قالین پر بیٹھے ہیں اور انھوں نے مختلف اینگل کے ساتھ کئی برہنہ تصاویر بنوائی ہیں جو لگتا ہے کاسمپولٹِن میگزین میں برٹ رینالڈ کے فوٹو شوٹ سے متاثر ہے۔

انسٹاگرام پر رنویر نے اپنی تصاویر کے ساتھ لکھا ’میرے لیے کپڑے اتارنا بہت آسان تھا، اپنی کچھ پرفارمنسز میں نیم برہنہ بھی نظر آیا ہوں۔ کپڑے اتارنے کے بعد آپ میری روح تک دیکھ سکتے ہو۔ میں ہزاروں لوگوں کے سامنے برہنہ ہو سکتا ہوں، مجھے کسی کی پرواہ نہیں۔‘

اب رنویر کی ان تصاویر کو سوشل میڈیا پر خوب شیئر کیا جا رہا ہے کچھ لوگ ان پر تنقید کر رہے ہیں تو بے شمار لوگ ان کی تعریف بھی کر رہے ہیں۔

اس بارے میں سب سے دلچسپ تبصرہ اداکارہ راکھی ساونت نے کیا ہے۔ ٹوئٹر پر ایک ویڈیو میں انھوں نے کہا کہ ’اس میں بیچارے رنویر کا کوئی قصور نہیں ہے وہ تو نہانے گئے تھے اتنے میں دو بندر آئے اور ان کے کپڑے اٹھا کر لے گئے۔‘

جبکہ ایک ٹوئٹر صارف نے لکھا کہ ’یہ افسوسناک ہے کہ اداکار، جن سے ہماری نوجوان نسل پیار کرتی ہے اور ان کی تقلید کرتی ہے، وہ کس طرح عریاں ہو کر عوامی سطح پر اپنے خیالات کا اظہار کر رہے ہیں کہ وہ عوام کے سامنے برہنہ ہونا کس طرح پسند کرتے ہیں۔ ہمارا معاشرہ کس طرف جا رہا ہے؟ اس اقدام سے قانونی کارروائی کے ذریعے نمٹا جانا چاہیے۔‘

https://twitter.com/rais_shk/status/1550446509644079105

سوشل میڈیا پر کسی نے رنویر کو ڈیسپریٹ کہا تو کسی نے تعریف کی۔

بنگال کی اداکارہ اور سیاست دان ممی چکرورتی نے رنویر اور ان کی تعریف کرنے والوں کو آڑے ہاتھوں لیتے ہوئے کہا کہ ’رنویر کی تازہ ترین تصاویر انٹرنیٹ پر دھوم مچا رہی ہیں اور لوگ اس پر تبصرہ کر رہے ہیں، میں سوچ رہی ہوں کہ اگر ایسی ہی تصاویر کسی ہیروئن نے لگائی ہوتیں تو اسے بری طرح ٹرول کیا جاتا اس وقت کیا ہوتا اس کے گھر کو آگ لگا دی جاتی، اس کے خلاف مظاہرے کیے جاتے، مارنے کی دھمکیاں دی جاتیں اور اس کے کردار پر کیچڑ اچھالا جاتا۔‘

https://twitter.com/mimichakraborty/status/1550174405908578304

جہاں تک کیچڑ اچھالنے کا تعلق ہے تو کئی بار اس کے لیے برہنہ تصاویر لگانے کی بھی ضرورت نہیں ہوتی۔ جیسا کے سشمیتا سین کے ساتھ ہو رہا ہے حال ہی میں جب سشمیتا اور ان کے بوائے فرینڈ للت مودی نے اپنے رشتے کو انسٹاگرام پر سب کے سامنے عام کیا تو کچھ لوگوں نے سیدھے سشمیتا پر وار کرنا شروع کر دیا لوگوں نے انھیں ‘گولڈ ڈگر’ یعنی دولت کی لالچی قرار دیا۔ یہ اور بات ہے کہ سشمیتا نے ایسے لوگوں کو منھ توڑ جواب دے کر انھیں خاموش کیا۔

ایسے میں سشمیتا کے سابق بوائے فرینڈ روہمن شال نے انسٹاگرام پر ایک ویڈیو میں لوگوں سے بات کرتے ہوئے محبت اور محبت میں توقعات کے بارے میں اپنے خیالات پیش کیے۔

روہمن کا کہنا تھا کہ لوگ اپنے پارٹنر کے ساتھ رشتے میں کچھ زیادہ ہی امیدیں وابستہ کر لیتے ہیں۔ رومن نے لوگوں کو مخاطب کرتے ہوئے کہا کہ ’بھائی آپ لوگ اپنے پارٹنر سے اتنی زیادہ امیدیں کیوں رکھتے ہو۔ آپ کے پارٹنر کی اپنی ایک زندگی ہوتی ہے، اپنے کام ہوتے ہیں ان پر زیادہ انحصار نہ کریں۔‘

انھوں نے مزید کہا کہ آپ خود اپنے آپ کو خوش رکھنا سیکھو نہ، یہ خیال کہ کوئی دوسرا آپ کو مکمل کر سکتا ہے غلط ہے آپ خود کو مکمل کرنا سیکھو۔‘

اس سے پہلے جب سوشل میڈیا پر سشمیتا کو ٹرول کیا جا رہا تھا تب بھی روہمن شال نے ایک پوسٹ میں لکھا تھا ’اگر کسی پر ہنسنے سے آپ کو سکون ملتا ہے تو ہنس لو کیونکہ پریشان وہ نہیں آپ ہو۔‘

سشمیتا اور روہمن 2018 سے ایک ساتھ تھے اور کچھ عرصہ قبل ہی دونوں کا بریک اپ ہوا تھا اور اب وہ دوست ہیں۔


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32288 posts and counting.See all posts by british-broadcasting-corp

Subscribe
Notify of
guest
0 Comments (Email address is not required)
Inline Feedbacks
View all comments