ماسکو: شطرنج کھیلنے والے روبوٹ نے اپنے مدِمقابل سات سالہ بچے کی انگلی توڑ دی

ایلسا میشمین - بی بی سی نیوز


شرنطج
روس کے داراحکومت ماسکو میں گزشتہ ہفتے ایک عجیب واقعہ پیش آیا جب شطرنح کھیلنے والے ایک روبوٹ نے اپنے مدمقابل سات سالہ بچے کی انگلی توڑ دی۔

روسی خبر رساں اداروں کی جانب سے اس حیران کن واقعے کی تفصیلات بتائی گئی ہیں جو شطرنج کے ماسکو اوپن ٹورنامنٹ کے دوران پیش آیا۔

اس واقعے کو کیمرے کی آنکھ نے بھی محفوظ کیا جس کی ویڈیو یوٹیوب پر موجود ہے۔

اس ویڈیو میں دیکھا جا سکتا ہے کہ میز کے درمیان میں ایک چھوٹا سا ہاتھ نما روبوٹ موجود ہے جس کے چاروں اطراف شطرنج کی بساط ہے۔

اس روبوٹ کا ایک مدمقابل ایک سات سالہ بچہ بھی ہے جس کے خلاف روبوٹ ایک چال چلتے ہوئے ایک مہرہ اٹھا کر ساتھ ہی موجود ڈبے میں پھینکتا ہے۔

اس کے فوری بعد وہ بچہ بھی اپنی جوابی چال چلتے ہوئے اپنا مہرہ آگے بڑھاتا ہے تو روبوٹ کا ہاتھ بچے کی انگلی کو تھام لیتا ہے اور اسی پوزیشن میں ساکت ہو جاتا ہے۔

بچے کو درد کی شدت سے ہلتے ہوئے اور آس پاس نظر دوڑاتے دیکھا جا سکتا ہے جس کے بعد دو افراد بچے کی جانب لپکتے ہیں۔

چند اور افراد بھی اس میز کی جانب بڑھتے ہیں اور بچے کا ہاتھ روبوٹ کے پنجے سے چھڑانے کی کوشش کرتے ہیں جس میں تھوڑی ہی دیر بعد ان کو کامیابی حاصل ہو جاتی ہے۔

یہ بھی پڑھیے

گوگل نے اس انجینیئر کو نکال دیا جس نے کہا تھا کہ مصنوعی ذہانت والے کمپیوٹر سسٹم کے احساسات ہوتے ہیں

‘شطرنج ایک ذہنی کھیل ہے۔۔۔‘ مگر کیا اس گیم کا تعلق دماغی طاقت سے بھی ہے؟

کیا 2050 تک روبوٹس فٹبال ورلڈ کپ جیتنے والی ٹیم کو ہرا سکیں گے؟

خبر رساں اداروں کے مطابق اسی دوران بچے کے ہاتھ کی انگلی ٹوٹ جاتی ہے۔

ویڈیو میں ایک شخص کو بچے کو میز سے دور لے کر جاتے ہوئے دیکھا جا سکتا ہے۔

ماسکو کی شطرنج فیڈریشن کے صدر سرگئے لازارییو نے روسی خبر رساں ایجنسی تاس سے بات کرتے ہوئے تصدیق کی کہ روبوٹ نے سات سالہ بچے کے ہاتھ کی انگلی توڑ دی۔ بچے کی شناخت ظاہر نہیں کی گئی۔

ان کا کہنا تھا کہ ’یہ برا ہوا ہے۔‘

انھوں نے بتایا کہ اس روبوٹ مشین نے اس سے پہلے بہت سے مقابلوں میں حصہ لیا تھا لیکن اس طرح کا کوئی واقعہ نہیں ہوا۔

تاس کی رپورٹ کے مطابق روبوٹ سے متاثرہ بچہ علاج کے بعد ٹورنامنٹ میں واپس آیا جہاں اس نے باقی مقابلوں میں حصہ لیا۔


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32296 posts and counting.See all posts by british-broadcasting-corp

Subscribe
Notify of
guest
0 Comments (Email address is not required)
Inline Feedbacks
View all comments