پہلا کشکول، جو خالی لوٹا دیا گیا

گزشتہ کالم میں، میں نے پاک امریکہ تعلقات کے باب میں ٹرومین ڈاکٹرائن کا ذکر کیا تھا۔ اس ڈاکٹرائن کی روشنی میں امریکہ جنوبی ایشیا میں مضبوط اتحادیوں کی تلاش میں تھا۔ اس ضرورت کے پیش نظر امریکہ اور پاکستان کے درمیان ایک طرح کی سٹریٹجک پارٹنر شپ کا آغاز ہوا، جس کے تحت پاکستان نے سویت یونین اور کمیونسٹ نظریات کے خلاف ہر اول دستے کا کردار ادا کرنے کا فصلہ کیا۔ اس صورت حال کو سمجھنے کے لیے اس وقت کے جیو پولیٹیکل اور سٹریٹیجک حالات کو سمجھنا ضروری ہے۔

اس خطے کے ان حالات کی روشنی میں قائد اعظم محمد علی جناح نے پاکستان کے قیام سے چند ماہ قبل مئی انیس سو سنتالیس میں امریکہ کے دو سینیئر سفارت کاروں سے ملاقاتیں کیں۔ ان ملاقاتوں میں قائد اعظم نے واضح کیا کہ پاکستان کے خارجہ تعلقات کی تشکیل میں ایک نمایاں ترین عنصر مشرق وسطی کے اسلامی ممالک، اور خلیج فارس سے قریبی تعلق ہو گا۔ ان ممالک کے ساتھ ہمارے تاریخی اور ثقافتی رشتے ہیں۔ قدرتی طور پر یہ ممالک ہمارے قریب ترین حلیف ہوں گے۔

دوسری طرف پاکستان کو ایک اسلامی قوم کے طور پر بیک وقت ”ہندو سامراج“ اور ”روسی جارحیت“ کا مقابلہ بھی کرنا پڑے گا۔ یہ مقابلہ کرنے کے لیے پاکستان قدرتی طور پر امریکہ کی مالی اور فوجی امداد کا خواہشمند ہو گا۔ ایم ایس ونکا تارامانی نے اپنی کتاب ”پاکستان میں امریکی کردار“ میں ان ملاقاتوں کی تفصیل پیش کی ہے۔ پاکستان کے قیام کے پندرہ دن بعد پاکستان کے وزیر خزانہ کراچی میں امریکی چارج دے افئیرز سے ملے۔ اس ملاقات میں انہوں نے امریکی سیکریٹری آف سٹیٹ کو پیغام دیا کہ پاکستان اپنے پچانوے ہزار تربیت یافتہ فوجی جوانوں کے ساتھ بر صغیر میں سویت یونین کی ہر قسم کی نقل حرکت کی مزاحمت کرنے کے لیے تیار کھڑا ہے۔

مسلم پاکستان کی روسی نظریات کے ساتھ کوئی چیز مشترک نہیں ہے، اور پاکستان خطے میں روسی پیش قدمی اور کمیونسٹ نظریات کے پھیلاو کے خلاف لڑائی میں امریکی اتحادی کا کردار ادا کرنے کے لیے تیار ہے۔ امریکہ کے ساتھ تعلقات قائم کرنے کی اس بے تابی کی وجہ یہ تھی کہ اس وقت کی حکمران اشرافیہ کا ایک بہت بڑا طبقہ ایسے لوگوں پر مشتمل تھا، جو مغرب سے تعلیم یافتہ تھے، اور مغربی کلچر کے بارے میں نرم گوشہ رکھتے تھے۔ یہ صرف تعلیم اور کلچر کی ہی بات نہیں تھی، برطانوی نوآبادیاتی نظام کے تحت ہندوستان کی معیشت بھی بڑے پیمانے پر مغرب کے ساتھ جڑی ہوئی تھی۔

ملک میں ایک انتہائی طاقتور فیوڈل کلاس تھی، جو سماجی و معاشی تبدیلیوں کے سخت خلاف تھی، اور اپنے آپ کو امریکہ کا قدرتی اتحادی تصور کرتی تھی۔ حکمران اشرافیہ میں ایسے با اثر لوگوں کی تعداد بھی کم نہیں تھی، جو مسئلہ کشمیر پر سویت یونین کے غیر جانب دارانہ رویے پر نہ خوش تھے۔ اس مسئلے پر وہ مغرب کو اپنا اتحادی سمجھتے تھے کیوں کہ مغرب بظاہر اس مسئلے کے فوری حل پر زور دے رہا تھا۔ کچھ طاقت ور مذہبی گروہ اور شخصیات بھی پاکستان کی حکمران اشرافیہ کا حصہ تھیں، جو سویت یونین کے معاشی نظریات، سماجی خیالات اور انقلابی سیاست کے سخت خلاف تھے، اور ان میں سے بعض کے خیال تھا کہ سویت نظریات و خیالات اسلامی تعلیمات سے متصادم تھے۔

اس طرح کے طاقتور مائنڈ سیٹ کی موجودگی میں پاکستان کے قیام کے دو ماہ بعد اکتوبر میں پاکستان نے باقاعدہ سرکاری سطح پر امریکہ سے مالی مدد کی درخواست کی۔ پاکستان نے دو بلین ڈالر کی امداد مانگی، جو اس وقت ایک خطیر رقم تصور کی جاتی تھی۔ اس رقم کی درخواست کے ساتھ جو میمورنڈم امریکی حکام کو پیش کیا گیا، اس میں لکھا گیا کہ ”انتہائی محتاط اندازے کے مطابق پاکستان کو عالمی برادری میں مناسب جگہ بنانے، اور دنیا کے استحکام میں اپنا کردار ادا کرنے کے لیے اندازہ دو بلین امریکی ڈالر کی ضرورت پڑے گی۔

اس کے علاوہ پاکستان کو اپنے بیش و بہا قدرتی وسائل کو کام میں لانے کے لیے بھی امریکی امداد کے علاوہ تکنیکی مدد و تعاون درکار ہو گا۔ ملکی ترقی کے لیے کچھ خصوصی مراعات کی ضرورت ہوگی۔ اور ملک کے دفاع کے لیے امریکی اسلحہ کا حصول لازم ہو گا۔ ملک کے دفاع کے لیے مغربی پاکستان کی روس سے قربت ایک بہت ہی اہم عنصر ہے۔ اگر پاکستان روسی خطرے کا مقابلہ کرنے میں ناکام رہا تو روس آگے چل کر بھارت کے لیے بھی خطرہ بن سکتا ہے۔

اس طرح یہ اس پورے خطے کی سیکورٹی کا سوال ہے۔ اس لیے دفاع اس وقت ملک کی بنیادی ضرورت ہے، مگر اگر پاکستان اپنے دفاع کے میدان میں مضبوط بھی ہو جائے تو پھر بھی اس کو معاشی و سماجی ترقی کے لیے امریکی اور برطانوی امداد کی ضرورت رہے گی۔ اگر ہم معاشی طور پر ترقی کر لیتے ہیں، اپنا معیار زندگی بلند کر دیتے ہیں تو اس سے پاکستانی عوام میں اعتماد آئے گا، اور وہ وقت آنے پر اس اعتماد کا مظاہرہ کرنے سے نہیں ہچکچائیں گے۔

جو چیز ہمیں سب سے زیادہ ضرورت ہے، وہ مالی وسائل ہیں، اور اس سے بھی بڑھ کر وسائل کے لیے ایک باقاعدہ ذریعے کی ضرورت ہے۔ اس درخواست اور میمورنڈم کو امریکیوں تک لے جانے کے لیے قائد اعظم کے خصوصی ایلچی لائق علی کو مقرر کیا گیا۔ لائق علی نے دو بلین ڈالر کی ضرورت کا حساب کتاب کرتے ہوئے امریکیوں کو بتایا کہ ان میں سے چار سو ملین دفاع، سات سو ملین ایگریکلچر اور سات سو ملین ملک میں تعمیر و ترقی پر خرچ کیا جائے گا۔

اس درخواست کا احوال بیان کرتے کچھ تجزیہ کاروں نے لکھا کہ لائق علی نہ سننے کے عادی نہیں تھے۔ انہوں نے اس پہلے قرضے کے حصول کے لیے جارحانہ انداز اختیار کیا۔ انہوں نے سٹیٹ ڈیپارٹمنٹ میں لابی کرنے کے لیے کچھ بینکرز کو بھی بھرتی کیا، جو ان وقتوں میں بہت غیر معمولی بات سمجھی جاتی تھی۔ آخری میٹنگ میں امریکیوں نے فیصلہ سنایا کہ وہ پاکستان کو دو بلین ڈالر نہیں دے سکتے۔ حیرت انگیز طور پر اسی میٹنگ میں لائق علی نے درخواست کی کہ تین ملین مہاجرین کی بحالی کے لیے امریکہ پینتالیس ملین ڈالر کی امداد دے۔

پر لطف بات یہ تھی کہ اس نے کہا کہ یہ رقم اس قرض کا ایڈوانس تصور کیا جائے گا، جو امریکی پہلے ہی دینے سے انکار کر چکے تھے۔ لیکن اس ساری مشق کے بعد بالآخر کئی کڑی شرائط کے ساتھ امریکہ نے صرف دس ملین ڈالر دینے پر آمادگی ظاہر کی۔ لیکن آگے چل کر حالات نیا رخ اختیار کر گتے، انیس سو اڑتالیس میں مسئلہ کشمیر پر پاکستان اور بھارت کے درمیان بڑھتی ہوئی کشیدگی کے پیش نظر امریکہ نے پاکستان اور انڈیا دونوں کو اسلحہ اور فوجی امداد دینے پر پابندی لگا دی۔

سیکریٹری آف سٹیٹ نے اس اقدام کی وضاحت کرتے ہوئے کہا کہ اس کا مقصد پاکستان اور بھارت کو یہ پیغام دینا ہے کہ وہ مسئلہ کشمیر کو پر امن طریقے سے حل کرنے کی کوشش کریں۔ یہ پاکستان اور امریکہ کے درمیان تعلقات کا آغاز اور بالکل ابتدائی دور تھا، جس میں پاکستان کو سخت مایوسی کا سامنا کرنا پڑا۔ ایک طرف تو امریکہ نے پاکستان کی توقعات کے مطابق دو بلین ڈالر کے بجائے صرف دس ملین ڈالر دینے پر رضامندی ظاہر کی اور دوسری طرف بھارت کے ساتھ جنگ کی وجہ سے فوجی اور مالی امداد بھی بند کر دی۔

حالانکہ اس فوجی امداد کے آغاز میں اس کا مقصد واضح کیا گیا تھا کہ یہ امداد اس خطے میں سویت یونین کی پیش قدمی اور کمیونسٹ نظریات کے فروغ کو روکنے کے لیے استعمال کی جائے گی۔ اس مایوسی کے باوجود پاکستان نے امریکہ کے ساتھ تعلقات کو اگلے سٹیج پر لے جانے اور باقاعدہ شراکت داری میں بدلنے کی کوشش جاری رکھی، جس کا احوال آئندہ سطور میں بیان کیا جائے گا۔