افغانستان الزام تراشیوں کی بجائے اپنے اندر جھانکے: آئی ایس پی آر


پاکستان فوج کے شعبہ تعلقات عامہ آئی ایس پی آر نے ایک بیان میں کہا ہے کہ پاکستان پر الزام تراشیوں کی بجائے افغانستان کو اپنے اندر جھانکنے اور مسائل کی نشاندہی کرنے کی ضرورت ہے۔

پاکستان فوج کے شعبہ تعلقات عامہ آئی ایس پی آر کی جانب سے جاری ہونے والے بیان کے مطابق جی ایچ کیو میں کور کمانڈرز کی خصوصی کانفرنس منعقد ہوئی جس میں کابل حملے کے بعد افغانستان کی جانب سے پاکستان پر لگائے جانے والے بلا جواز الزامات اور دھمکیوں کا جائزہ لیا گیا۔

بیان کے مطابق کانفرنس کے شرکا نے دہشت گردی اور شدت پسندی کے خلاف جنگ میں افغانستان کی معاونت جاری رکھنے کا عزم بھی ظاہر کیا۔

آئی ایس پی آر کی جانب سے جاری کیے گئے بیان میں افغانستان میں حالیہ دہشت گرد حملوں کے نتیجے میں قیمتی انسانی جانوں کے نقصان پر بھی افسوس کا اظہار کیا گیا اور افغان عوام کے ساتھ اظہار یکجہتی کیا گیا۔

خیال رہے کہ گذشتہ ہفتے کابل کے سفارتی علاقے میں ہونے والے دھماکے میں بقول افعان صدر اشرف غنی 150 افراد ہلاک ہوئے تھے۔

اس کے بعد منگل کو کابل میں ہونے والی بین الاقوامی کانفرنس میں افغان صدر اشرف غنی نے پاکستان پر ایک بار پھر دہشت گردوں کی پشت پناہی کرنے کا الزام لگایا ہے۔

افغان صدارتی محل سے جاری ہونے والے بیان میں کہا گیا ہے کہ افغان حکومت پاکستان کے ساتھ بات چیت کے لیے تیار ہے لیکن پاکستان کو یہ باور کرانا ہوگا کہ پرامن افغانستان ہی پاکستان کے مفاد میں ہے۔

افغان صدر نے پاکستان پر الزام لگایا ہے کہ اُنھیں آج بھی پاکستان سے جارحیت کا سامنا ہے۔


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32288 posts and counting.See all posts by british-broadcasting-corp