نعرے بہت، قدم کم
میرے ایک عزیز دوست عمران ہیں۔ کالج کے زمانے سے دوستی ہے اور اب یہ تعلق دوستی سے بڑھ کر بھائی چارے میں بدل چکا ہے۔ عمران کی ایک دلچسپ عادت تھی۔ ذرا سی بات پر آنکھیں نم کر لیتے تھے۔ وجہ پوچھتے تو بڑے اطمینان سے بتاتے کہ انہوں نے کہیں پڑھ رکھا ہے کہ رونے سے آنکھیں صاف ہوتی ہیں اور آنسو گناہ بھی دھو دیتے ہیں۔ ہم ان کی اس منطق پر مسکرا دیتے اور عمران اپنی ”صفائی“ کے عمل میں مصروف رہتے۔
وقت کے ساتھ مجھے احساس ہوا کہ عمران کی یہ عادت صرف ان کی ذات تک محدود نہیں۔ ہمارے معاشرے میں ایسے بہت سے لوگ موجود ہیں جو کسی واقعے کی حقیقت جانے بغیر، کسی خبر کی تصدیق کیے بغیر اور معاملے کے پس منظر کو سمجھے بغیر فوراً ”آنسو بہانا“ شروع کر دیتے ہیں۔ فرق صرف یہ ہے کہ اب آنسو آنکھوں سے نہیں، سوشل میڈیا کی پوسٹس، تبصروں اور پیغامات کی صورت میں بہتے ہیں۔
کسی تنظیم، تحریک یا اجتماعی جدوجہد کو دیکھیں تو وہاں بھی کرداروں کی کچھ دلچسپ قسمیں نظر آتی ہیں۔ بظاہر سب ایک ہی مقصد کے ساتھ کھڑے دکھائی دیتے ہیں، مگر عملی میدان میں ان کی ترجیحات، وابستگی اور کردار ایک دوسرے سے خاصے مختلف ہوتے ہیں۔
سوشل میڈیا کے مجاہد
پہلی قسم ان لوگوں کی ہے جن کی جدوجہد کا مرکز موبائل فون کی اسکرین ہوتی ہے۔ کوئی خبر سامنے آئی نہیں کہ فوراً پوسٹ، کمنٹ، فارورڈ اور جذباتی ردعمل شروع۔
مثلاً کسی یونیورسٹی میں اساتذہ کے حقوق سے متعلق کوئی مسئلہ سامنے آئے تو چند ہی منٹوں میں سوشل میڈیا گروپس میں درجنوں پیغامات آ سکتے ہیں۔ کوئی اسے انتہائی افسوس ناک قرار دے گا، کوئی سخت ردعمل کا مطالبہ کرے گا اور کوئی پوچھے گا کہ تنظیم اس معاملے پر کیا کر رہی ہے۔ لیکن جب اسی مسئلے پر اجلاس ہو، متعلقہ فورم کے سامنے اپنا موقف پیش کرنا ہو یا اجتماعی طور پر موجود ہونا ضروری ہو تو انہی آوازوں میں سے کئی خاموش ہو جاتی ہیں۔
یہ لوگ خاموش نہیں ہوتے ؛ بس ان کی جدوجہد کی جغرافیائی حدود موبائل فون کی اسکرین تک محدود ہوتی ہیں۔
صرف اپنے مسئلے کے کارکن
دوسری قسم ان لوگوں کی ہے جنہیں اجتماعی جدوجہد کا احساس اس وقت ہوتا ہے جب مسئلہ ان کا اپنا ہو۔
فرض کریں کسی ملازم کی ترقی رک گئی، تبادلہ ہو گیا، الاؤنس کا مسئلہ پیدا ہو گیا یا کسی انتظامی فیصلے سے وہ براہِ راست متاثر ہوا۔ اچانک تنظیم یاد آ جاتی ہے۔ فون پر فون، پیغام پر پیغام اور سوال یہ کہ ”تنظیم میرے لیے کیا کر رہی ہے؟“
لیکن کچھ عرصے بعد جب تنظیم کسی اجتماعی مسئلے پر تعاون مانگتی ہے، اجلاس میں شرکت کی درخواست کرتی ہے یا مشترکہ موقف کے لیے آواز چاہتی ہے تو جواب ملتا ہے : ”دیکھتے ہیں“ ، ”ابھی مصروف ہوں“ یا ”یہ مسئلہ تو سب کا ہے، کوئی نہ کوئی کر لے گا۔“
یہ رویہ صرف خود غرضی کا مسئلہ نہیں ؛ یہ اجتماعی شعور کی کمزوری کی بھی علامت ہے۔ اجتماعی حقوق اسی وقت محفوظ ہوتے ہیں جب فرد اپنے ذاتی مسئلے سے آگے بڑھ کر مشترکہ مسئلے کو بھی اپنا مسئلہ سمجھنے لگے۔
خاموش مگر مخلص کارکن
تیسری قسم ان لوگوں کی ہے جو شاید سب سے کم بولتے ہیں، مگر ضرورت کے وقت سب سے پہلے کھڑے ہوتے ہیں۔ یہی کسی بھی تحریک کا اصل سرمایہ ہوتے ہیں۔
یہ وہ شخص ہے جو اجلاس میں آنے سے پہلے دستاویز پڑھتا ہے، مسئلے کے قانونی اور انتظامی پہلو سمجھنے کی کوشش کرتا ہے، دوسروں کو قائل کرتا ہے، وقت نکالتا ہے اور کبھی اپنے ذاتی کام مؤخر کر کے اجتماعی مقصد کے لیے موجود رہتا ہے۔
مثلاً کسی اجتماعی مسئلے پر درجنوں افراد سوشل میڈیا پر سینکڑوں تبصرے کر رہے ہوں، لیکن جب متعلقہ دفتر میں جا کر بات کرنی ہو، دستاویز تیار کرنی ہو، مسلسل رابطے رکھنے ہوں یا معاملے کو کئی ہفتوں تک آگے بڑھانا ہو تو اگر صرف دو یا تین افراد مستقل طور پر موجود رہیں، تو عملی طور پر تحریک انہی چند لوگوں کے ذریعے چل رہی ہوتی ہے۔
دلچسپ بات یہ ہے کہ ایسے لوگ اکثر اپنے کام کا کریڈٹ بھی نہیں مانگتے۔ ان کا مقصد ”دکھائی دینا“ نہیں بلکہ ”کام ہونا“ ہوتا ہے۔
نام کے رکن
چوتھی قسم ان لوگوں کی ہے جو کسی تنظیم یا تحریک کا حصہ تو ہوتے ہیں، مگر عملی طور پر ان کی موجودگی محسوس نہیں ہوتی۔
نام رکنیت کی فہرست میں، شاید سوشل میڈیا گروپ میں بھی شامل، مگر نہ اجلاس میں دلچسپی، نہ کسی مسئلے پر رائے، نہ کسی سرگرمی میں تعاون۔ یہ کچھ ایسا ہی ہے جیسے کسی کھیل کی ٹیم میں کسی کھلاڑی کا نام تو شامل ہو، مگر وہ نہ پریکٹس میں آئے، نہ میچ کھیلے اور نہ ٹیم کی کامیابی یا ناکامی سے اسے کوئی خاص فرق پڑے۔
ایسے ارکان کی تعداد زیادہ ہو تو تنظیم بظاہر بڑی دکھائی دے سکتی ہے، لیکن اس کی عملی قوت لازماً اتنی بڑی نہیں ہوتی۔
اصل مسئلہ آواز کا نہیں، وابستگی کا ہے
ان چاروں کرداروں کو سامنے رکھیں تو ایک بنیادی حقیقت واضح ہوتی ہے : کسی تحریک کی طاقت صرف اس کے ارکان کی تعداد سے نہیں، ان کی عملی وابستگی سے متعین ہوتی ہے۔
سوشل میڈیا نے اظہارِ رائے کو غیر معمولی حد تک آسان بنا دیا ہے۔ اب کسی مسئلے پر اپنی رائے دینے کے لیے گھر سے نکلنے، وقت نکالنے یا کسی اجتماعی سرگرمی میں شریک ہونے کی ضرورت نہیں۔ چند سیکنڈ میں ایک پوسٹ لکھی جا سکتی ہے اور چند منٹ میں درجنوں لوگوں کی حمایت حاصل کی جا سکتی ہے۔
لیکن ”لائک“ اور ”شرکت“ میں فرق ہے۔
”کمنٹ“ اور ”کردار“ میں فرق ہے۔
”ہمدردی“ اور ”وابستگی“ میں فرق ہے۔
کسی تحریک کو محض جذباتی ردعمل نہیں، بلکہ دلیل، تنظیم، مستقل مزاجی اور عملی شرکت درکار ہوتی ہے۔ جذبات کسی جدوجہد کو جنم دے سکتے ہیں، مگر اسے منزل تک پہنچانے کے لیے مستقل محنت درکار ہوتی ہے۔
یہی وجہ ہے کہ بعض اوقات ایک چھوٹا سا منظم اور مخلص گروہ ایک بڑے ہجوم سے زیادہ موثر ثابت ہوتا ہے۔ ہجوم کسی واقعے پر جمع ہو سکتا ہے، مگر کارکن مسئلہ حل ہونے تک موجود رہتا ہے۔
شاید ہمیں اپنے اجتماعی رویوں کا بھی کبھی احتساب کرنا چاہیے۔ ہم میں سے ہر شخص خود سے یہ سوال کرے کہ اگر کسی اجتماعی مسئلے پر میری آواز سوشل میڈیا پر سب سے بلند ہے، تو کیا عملی میدان میں بھی میری موجودگی اتنی ہی نمایاں ہے؟
کیونکہ تحریکیں صرف آواز سے نہیں چلتیں۔ آواز لوگوں کو متوجہ کر سکتی ہے، جذبات پیدا کر سکتی ہے اور کسی مسئلے کو نمایاں کر سکتی ہے ؛ لیکن منزل تک پہنچنے کے لیے قدم بھی اٹھانے پڑتے ہیں۔ نعرے تاریخ نہیں بدلتے، مستقل قدم بدلتے ہیں۔
اور آخرکار شور کم یاد رہتا ہے ؛ اصل کردار ہمیشہ ان لوگوں کا یاد رہتا ہے جو شور ختم ہونے کے بعد بھی میدان میں موجود رہتے ہیں۔

