سلام باؤ جی۔ عورت کی منمناتی ہوئی سی آواز میرے کانوں میں گونجی، میں نے کن اکھیوں کی بھی کن اکھیوں سے اس کی طرف دیکھا اور آہستہ سے سلام کا جواب دے کر آگے بڑھتا چلا گیا۔میں اس کے پاس سے روزانہ یوں ہی گزرتا ہوں جیسے کوئی ایکسپریس ٹرین جو چھوٹے چھوٹے سٹیشنوں کو خاطر میں ہی نہیں لاتی اور فراٹے بھرتے نکل جاتی ہے۔ لیکن، باوجود اس لگاتار بے اعتنائی کے وہ مجھے روزانہ ہی ’سلام باؤ جی‘ کہہ دیا کرتی۔ شاید میرا حلیہ بابوؤں جیسا تھا، ڈریس پینٹ، استری کی ہوئی شرٹ، اکڑا ہوا کالر، سلیقے سے بنے بال، پاؤں میں پالش ہوئے بند جوتے، دھیمی چال، سرفوجیوں کی طرح تھوڑا سا اٹھا ہوا۔