بلاگ گوشہ ادب 

میرے پرکھوں کی پہلی دعا

عشرت آفریں
 
           

رات کی کوکھ سے
صبح کی ایک ننھی کرن نے جنم یوں لیا
شب نے
ننھی شفق کی گلابی حسیں مٹھیاں کھول کر
کچھ لکیریں پڑھیں
اور صبا سے نہ معلوم چپکے سے کیا کہہ دیا
یوں کہ شبنم کی آنکھوں سے آنسو بہے
اک ستارہ ہنسا
چاندنی مسکراتی ہوئی چل پڑی
اور نقاہت سے پہلو بدلتے ہوئے
چونک کر میری ماں نے بڑے شوق سے
کچھ اشارہ کیا
آہٹوں اور سرگوشیوں میں کسی نے کہا
آہ لڑکی ہے یہ !
اتنی افسردہ آواز میرے خدا
میری پہلی سماعت پہ لکھی گئی!!
میری پہلی ہی سانسوں میں گھولا گیا
ان شکستہ سے لہجوں کا زہریلا پن
آہ لڑکی ہے
لڑکی ہے ۔۔ لڑکی ہے یہ !
اس کی قسمت کی مانگو دعا
اب بھی میری سماعت پہ لکھی ہے وہ
میرے پرکھوں کی پہلی دعا
عشرت آفریں
Latest posts by عشرت آفریں (see all)

 
           

Facebook Comments - Accept Cookies to Enable FB Comments (See Footer).