پھول تمہاری کمزوری تھے میں بھی تمہاری اس کمزوری سے واقف تھی پھول ملیں تو کتنی خوش ہو جاتی تھیں بھول گئی تھیں جیون کانٹوں کی اک سیج جس پر تم نے کروٹ کروٹ درد سہے اور زخم اٹھائے لیکن اک انجان سفر پر جانے سے پہلے دیکھو ہم نے تم کو پھولوں کی چادر سے ڈھانپ دیا ہے اب مت کہنا! "عشرت جانی میرے لئے کوئی گلدستہ نہیں لاتا بہت دکھی ہوں کوئی پھول نہیں بھجواتا”

ماں تم مجھے سناتی تھیں جادو والی ایک کہانی شہزادی جو چڑیا بن گئی روز محل کے باغ میں آتی پہلے روتی پھر مسکاتی رونے سے سو موتی جھڑتے نوکر چاکر جھولی بھرتے مسکاتی تو پھول بکھرتے مالی اپنا دامن بھرتے میں کہتی پھر کیا ہوتا ماں؟ تم کہتیں، وہ بھولی چڑیا سارے میٹھے بول سنا کر آسمان کی اُور اڑ جاتی میں کہتی پھر کیا ہوتا ماں؟ تم کہتی تھیں، بس اب سو جا سو جا میری "منّی رانی”

  یہاں کسی کی آنکھ اور کسی کے کان بند ہیں نکل چلو کہ اس گلی کے سب مکان بند ہیں   لٹک رہی ہیں سولیوں پہ دور تک سماعتیں سنا ہے اب کے نے نواز و قصہ خوان بند ہیں   لگی ہیں یوں تو ساحلوں پہ کشتیاں قطار سے مگر ہوا رکی ہے اور بادبان بند ہے   خود اپنے ہی حصارِ ذات اور انا کی قید میں ستم یہ ہے ہمارے جیسے خوش گمان بند ہیں