مردوں کے ساتھ تصویریں کھنچوانے کا تہوار

میل آن لائن کے مطابق اس جزیرے پر بسنے والے ہر تین سال بعد قبرستانوں کا رخ کرتے ہیں اور اپنے پیاروں کی لاشوں کو نکال لاتے ہیں۔ یہ کام ”مانینے تہوار“ کے موقع پر کیا جاتا ہے جو ہر تین سال بعد منایا جاتا ہے۔ تہوار کے موقع پر لوگ اپنے مُردوں کی لاشوں کی صفائی کرتے ہیں، انہیں خوب سجاتے سنوارتے ہیں اور سجی سنوری لاشوں کو گلی گلی اٹھائے پھرتے ہیں۔

اس بارمانینے تہوار کے موقع پر کچھ سیاح بھی اس جزیرے پر جا پہنچے اور انہوں نے بھی لاشوں کے ساتھ تصاویر بنوائیں، جنہیں دیکھنے والے اپنی آنکھوں پر یقین نہیں کر پا رہے۔ ایک ایسی ہی تصویر میں ایک سفید فام جوڑا مقامی لوگوں کے ساتھ موجودہے اور ان کے درمیان ایک خاتون کی لاش ہے جسے انہوں نے اپنے ہاتھوں سے تھام رکھا ہے۔ اس مردہ خاتون کو نیلے رنگ کا نیا لباس پہنایا گیا ہے جبکہ اس کے گلے میں موتیوں کی مالا نظر آتی ہے اور اسے چوڑیاں و دیگر آرائش و زیبائش کا سامان بھی پہنایا گیا تھا۔

سیاحوں کا کہنا ہے کہ انہوں نے قبیلے کی تمام رسومات میں شرکت کی، جس کے دوران وہ قبروں سے لاشیں نکال کر لائے، انہیں صاف کیا گیا اور پھر انہیں خوب سجا سنوار کر گلیوں میں گشت کروایا گیا۔ تہوار کے اختتام پر لاشوں کو نئے تابوتوں میں ڈال کر دوبارہ ان کی قبروں میں دفن کردیا گیا تا کہ اگلے تین سال تک یہ آرام کر سکیں۔