فواد چوہدری نے سعد رفیق کی دوسری اہلیہ ڈاکٹر شفق کے ساتھ شدید ناانصافی کی ہے: روف کلاسرا
صحافی روف کلاسرا نے کہا ہے کہ فواد چوہدری نے گزشتہ روز پریس کانفرنس میں نام لیے بغیر خواجہ سعد رفیق کی اہلیہ ڈاکٹر شفق حرا کو تنقید کا نشانہ بنایا ۔
تفصیلات کے مطابق روف کلاسرا کا کہنا تھا کہ ڈاکٹر شفق حرا پی ٹی وی میں اینکر ہیں اور گزشتہ برس ان کی سعد رفیق سے شادی ہوئی ہے اور جب سے ن لیگ کی حکومت گئی ہے تو اس وقت سے سعد رفیق اپنی اہلیہ پر دباﺅ ڈال رہے تھے کہ آپ پی ٹی وی سے استعفیٰ دیدیں کیونکہ پی ٹی آئی کی حکومت آ رہی ہے اور وہ سب سے پہلے یہ کام کریں گے کہ مجھے خراب کرنے کی کوشش کریں گے اور آپ کو نوکری سے فارغ کریں گے۔ جس پر ڈاکٹر شفق حرا نے جواب دیا کہ میں پسماندہ علاقے سے آئی ہوں اور پڑھ کر آئی ہوں اور آج سے دس سال پہلے مجھے پی ٹی وی میں نوکری ملی ہے تو اس سے آپ کا کیا تعلق ہے جبکہ ہماری شادی ایک سال قبل ہوئی ہے۔ روف کلاسرا نے کہا کہ سعد رفیق نے جو پیشگوئی کی تھی وہ درست ثابت ہوئی ۔
روف کلاسرا نے فواد چوہدری کو تنقید کا نشانہ بناتے ہوئے کہا کہ گزشتہ روز وزیر اطلاعات نے اپنی پریس کانفرنس میں سعد رفیق کا نام لیے بغیر کہا کہ ایک وفاقی وزیر کی بیگم کو پونے چھ لاکھ روپے تنخواہ مل رہی ہے اور وہ اینکر ہیں۔ روف کلاسرا نے کہا کہ میں نے ڈاکٹر شفق سے رابطہ کیا اور پوچھا کہ کیا معاملہ ہے تو وہ کہنے لگیں کہ میری تنخواہ آپ چیک کروا سکتے ہیں کہ دو لاکھ 75 ہزار روپے ہے۔ روف کلاسرا نے کہا کہ اتنی تنخواہ تو ہمارے یہاں پروڈیوسر لیتے ہیں اور وہ جتنی تنخواہ لے رہی ہیں میرا خیال نہیں ہے کہ اس سے پی ٹی وی بیٹھ گیا ہے۔
Facebook Comments - Accept Cookies to Enable FB Comments (See Footer).