مقتول سعودی صحافی جمال خشوگی کی مصری خاتون سے خفیہ شادی کا انکشاف
ایک مصری خاتون نے انکشاف کیا ہے کہ انہوں نے ترکی میں سعودی سفارتخانےمیں قتل ہونے والے سعودی صحافی جمال خشوگی سے چند ماہ قبل امریکا میں ایک مذہبی تقریب میں شادی کی تھی۔ جمال خشوگی کا قتل ویسے ہی ایک معمّا بنا ہوا تھا، اب ان کی خفیہ بیوی کے انکشاف نے کئی سوالات کھڑے کر دیئے۔
غیر ملکی میڈیا کے مطابق ایک انٹرویو میں ایک نا معلوم مصری خاتون نے جمال خشوگی کی اہلیہ ہونے کا دعویٰ کرتے ہوئے کہا کہ وہ جمال خشوگی کے ساتھ اپنے تعلقات کو ظاہر کرنے کے لئے آگے آنے والی تھیں۔ ان کا کہنا تھا کہ میں چاہتی تھیں کہ ایک مسلمان بیوی ہونے کے ناطے سےمجھے پورا حق اور اپنی صحیح شناخت ملے۔
یہ سب انکشافات انہوں نے اپنا اصل نام مخفی رکھنے کی شرط پرکئے، ان کا کہنا تھا کہ سیکیورٹی اور ملازمت کی وجہ سے وہ اپنا نام ظاہر نہیں کر سکتیں ۔ انہوں نے امریکی اخبار واشنگٹن پوسٹ کو رواں سال جون میں ہونے والی جمال خشوگی سے اپنی شادی کی تصویریں بھی شیئر کیں تاہم سعودی صحافی کے خاندان نے ان کی خفیہ شادی پر کسی بھی قسم کی کوئی بات کرنے سے گریز کیا ہے۔
دوسری جانب جمال خشوگی کی ترک منگیتر نے ٹیلیفونک انٹرویو میں بتایا کہ وہ جمال خشوگی کے ان خاتون سے تعلقات کے بارے میں کچھ نہیں جانتیں۔ انہوں نے کہا کہ ’جمال نے کبھی بھی مجھ سے اس خاتون کے بارے میں ذکر نہیں کیا تھا، آخر یہ خاتون دنیاکے سامنے جمال کی شخصیت کیوں خراب کرنا چاہتی ہے، وہ کیا چاہتی ہے،مجھے شک ہے کہ یہ جمال خشوگی کو بدنام کرنے کی کوشش ہے۔‘
انہوں نے مزید کہا کہ’ اگر وہ پہلے ہی جمال خشوگی کی قانونی بیوی ہونے کے بارے میں بتانا چاہتی تھیں تو اب بھی سامنے آکر ثابت کر دیں، اس طرح وہ جمال خشوگی کے مرنے کے بعد سعودی حکومت کی جانب سے ان کے خاندان کو ملنے والی رقم میں سے حصہ مانگنے کا حق بھی رکھ سکتی ہیں جبکہ ابھی ان کی شادی کی قانونی حیثیت واضح نہیں۔‘
یاد رہے سعودی صحافی جمال جمال خشوگی کو گذشتہ ماہ ترکی کے شہر استنبول میں واقع سعودی سفارت خانے میں قتل کر دیا گیا تھا اور سعودی حکومت کا کہنا تھا کہ اس میں سعودی ولی عہد محمد بن سلمان ملوث نہیں ہیں۔ جمال خشوگی سعودی حکمرانوں کے بڑے ناقدین میں سے ایک تھے۔
Facebook Comments - Accept Cookies to Enable FB Comments (See Footer).