بالی ووڈ سے فلموں کی آفرز ہوئی ہیں: عائزہ خان


معروف ماڈل و اداکارہ عائزہ خان کا کہنا ہے کہ مجھے دھرما پروڈکشن سمیت بالی ووڈ کے بڑے پروڈکشن ہاؤسزکی جانب سے فلموں کی آفرز ہوئی ہیں۔  عائزہ خان نے ایک انٹرویو میں بتایا کہ جب میں نے اپنا کیریئر شروع کیا تو مجھے بالکل اندازہ نہیں تھا کہ میں آج اپنی مقبولیت کو اس طرح انجوائے کروں گی۔

مجھے خوشی ہے کہ لوگ مجھ سے محبت کرتے ہیں اور یہ دیکھ کر بھی مجھے خوشی ہوتی ہے کہ آج بہت سی لڑکیوں کے لئے میں ایک مشعل راہ ہوں۔ لوگ میرا ہیر اسٹائل، میک اپ، لباس اور یہاں تک کہ اپنی بیٹیوں کا نام میرے نام پر رکھتے ہیں۔  عائزہ خان نے پاکستانی فلموں میں کام کرنے سے متعلق بتایا کہ میں نے ڈراموں کے ساتھ اپنے لئے تمام راستے کھلے رکھے ہیں۔  اور جہاں تک بات فلم نہ کرنے کی ہے تو اُس کی اصل وجہ بہترین اسکرپٹ ہے جس کا مجھے انتظار ہے۔ میں ایسے اسکرپٹ کی تلاش میں ہوں جہاں میں آسانی سے فٹ ہو سکوں، میں خود بھی فلم کرنا چاہتی ہوں اور اگر مجھے اچھی فلم کی آفر ہوئی تو میں ضرور سائن کر لوں گی۔

عائزہ خان نے بالی ووڈ میں کام کی آفر کے حوالے سے کہا کہ مجھے بالی ووڈ کے بڑے بڑے پروڈکش ہاؤسز کی جانب سے فلموں میں کام کرنے کی آفرز بھی ہوئیں جس میں کرن جوہر کا دھرما پروڈکشن ہاؤس بھی ایک ہے۔  اداکارہ نے یہ بھی کہا کہ حتمی طور پر کوئی فیصلہ نہ ہونے کی وجہ سے بالی ووڈ کی آفر کا چرچا میں نے کبھی نہیں کیا۔ لیکن جب بھی موقع ملا تو میں ضرور فلم کرنا پسند کروں گی لیکن اس میں میری شرائط اور اخلاقی اقدار کی حدود شامل ہوں گی۔ کیوں کہ بطور اداکارہ اور پاکستانی ہونے کی وجہ سے فخر کی بات ہے کہ دنیا بھر میں لوگ ہمارے کام کو سراہ رہے ہیں۔


Facebook Comments - Accept Cookies to Enable FB Comments (See Footer).