جاوید احمد غامدی اور اخلاقی معیارات

سو وہ جب چاہیں آپ پر معتزلہ, متجددین, گمراہ, منکر حدیث, تخفیف حدیث, وغیرہ کے الزامات لگا کر عامہ المسلمین کو آپ کے شر سے خبردار کر سکتے ہیں۔ آگے اس کو پھیلا کر نمک مرچ لگانے کا کام ان کے مقلدین و متاثرین فلاں کے شر سے بچاؤ کا فیس بک پیج بنا کر یا پمفلٹ تقسیم کر کے بخوبی کر سکتے ہیں۔ اس نیم علمی کاروبار میں کوئی سکہ بند عالم ہی نہیں مانا جاتا اگر گمراہ فرقوں اور یہود و ہنود اور مغربی تہذیب کے ایجنٹوں پر کوئی تین چار متن اور دروسی عبارات مارکیٹ میں نہ لا چکا ہو۔ ایک برہان نامی کتابچہ اس پوری تہذیبی روایت کے آگے کیا بیچتا ہے جہاں عالمانہ دروس میں طبقہ متجددین پر چوٹ کے لئے

تہذیبِ نو کے منہ پہ وہ تھپڑ رسید کر
جو اس حرامزادی کا حلیہ بگاڑ دے

جیسے شعر خون گرمانے کے لئے استعمال کئے جاتے ہوں۔ اسی سے یہ لطیفہ یاد آیا کہ بازوؤں کے بغیر قمیص میں ملبوس ایک پاکستانی خاتون صحافی نے مرحوم و مغفور ڈاکٹر اسرار صاحب پر اپنے بارے میں اس سرگوشی کا الزام لگایا کہ \”ویسٹ نے اس حرامزادی کا حلیہ بگاڑ دیا\” تو تنظیم اسلامی سے یہ وضاحت پیش کی گئی کہ ڈاکٹر صاحب دراصل اکبر الہ آبادی کے شعر سے تہذیب جدید پر تنقید فرما رہے تھے اور محترم خاتون کو یقیناََ غلط فہمی ہوئی ہے۔