نواز شریف کو بیرون ملک جانے پر کون راضی کر سکتا ہے؟
سوال یہ تھا کہ نواز شریف کو باہر بھیجنا کیوں ضروری ہے؟ کیا انہیں بآسانی باہر بھیجا جا سکتا ہے؟ اور اس سلسلے میں انہیں کون کن شرائط کے ساتھ قائل کر سکتا ہے؟ جواب دستیاب ہوتے تو شاید سوال ہی نہ اٹھتے۔ کالی سیاہ کافی جو غالباً ایتھوپین تھی سائیڈ ٹیبل پر دھری ٹھنڈی ہو رہی تھی، ایتھوپین اس لئے کہ ٹھنڈی ہونے کے باوجود اس کی قدرے تیز خوشبو دیر تلک کمرے میں رچی بسی تھی، یہ کافی گھونٹ لیتے ہی تلخ مگر حلق سے نیچے اترتے ہی زبان کے پچھلے ٹیسٹ بڈز پر خاص قسم کا رومانی ذائقہ فراہم کرتی ہے۔
خیر! جواب دینے سے پہلے خاکسار نے اپنے میزبان سے استفسار کی صورت میں عرض کیا، پہلی کافی نہ گرم کرا لیں؟ انہیں جنجھلاہٹ میں احساس ہی نہ ہوا کہ کافی تو کب سے ٹھنڈی پڑ چکی ہے، فوراً انٹر کام پر کافی گرم کرنے کا حکم دیا اور مردان کے نواح میں تیار کیا گیا مقامی سگریٹ سلگایا۔ پوچھا آپ تو عجیب و غریب سگار سلگاتے رہے ہیں، یہ کیا؟ لوکل برانڈ کب سے چالو کر لیا؟ کہنے لگے اس کی کِک زیادہ تگڑی ہے، ان دنوں کیونکہ لمحہ بھر چین نصیب نہیں تو ایسے میں کسی سٹرانگ اور دیسی برانڈ کی ضرورت تھی لہذا مردان میں تیار ہونے والے اس سگریٹ کا انتخابکیے بنا نہ رہ سکا۔
نواز شریف کی بگڑتی صحت پر راولپنڈی سمیت اسلام آباد میں یکساں تشویش پائی جاتی ہے، یہی وجہ ہے کہ نیب سے سروسز تک لے جانے اور پھر ان کے علاج معالجے کے دوران سرکار بیک فٹ پر آئی اور خیرسگالی کے پیغامات جاری کرنے کے علاوہ وزرا کو اس بابت بیان بازی سے روکنے پر بھی مجبور ہوئی۔ اس دوران رات کی تاریکیوں میں کئی اہم شخصیات سر جوڑے بیٹھی رہیں کہ اب کیا کیا جائے۔ ایک ایسا خدشہ انہیں بھی لاحق ہے جو ہر عام پاکستانی کے ذہن میں سوال کی صورت میں اٹھ رہا ہے۔
عرض کی کہ نواز شریف اس حالت میں سرکار کی پیٹھ پر لدھا ایک بوجھ ہیں۔ اس بوجھ تلے دبی سرکار نا آگے قدم بڑھا سکتی ہے نا پیچھے۔ اوپر سے آزادی مارچ کی رام کہانی راتوں کی نیند حرام کر چکی۔ یہ بوجھ اترے گا تو سرکار کو سیاسی طور پر سانس لینے کا موقع ملے گا، آزادی مارچ کے غبارے سے ہوا نکل جائے گی اور سرکار سنجیدگی سے عوام کے لئے کچھ کر پانے کی پوزیشن میں آئے گی۔ خدشہ اگر حقیقت میں بدل گیا تو کیا ہوگا۔ ؟
وہ بولے دیکھئے، اگر اس مدعے پر ایک عام شہری اور ایک صحافی کے ہاں اس قدر تشویش ہے تو اندازہ کیجئے ہمارے ہاں اس بابت تشویش کا پیمانہ کہاں تک جا پہنچا ہوگا۔ پوچھا، کہاں تک؟ گرم کافی کے مگ کو تھامتے ہوئے اس کے کناروں کو پر انگشت شہادت پھیرتے ہوئے وہ بولے یہاں تک! ہم سے رہا نہ گیا، پوچھا یہ تو اپنا اپنا پیمانہ ہے۔ انہوں نے مگ سائیڈ ٹیبل پر رکھا، انگشت شہادت کو گردن پر پھیرتے ہوئے بولے یہاں تک!
کہنے لگے کہ اس بات میں وزن ہے کہ نواز شریف کا سیاسی بوجھ دن بدن بڑھتا جا رہا ہے اور ایسے میں غلطی کی گنجائش باقی نہیں رہی، لیکن اب مسئلہ یہ ہے کہ انہیں کیسے قائل کیا جائے؟ عرض کی کہ پاکستان میں فی الحال تین ایسی شخصیات ہیں جو انہیں علاج کی غرض سے بیرون ملک لے جانے پر قائل کر سکتی ہیں، ایک ان کی والدہ، دوسری ان کی دختر۔ وہ بولے، لیکن ان دونوں کے ہاں تشویش صرف نواز شریف کی صحت کے حوالے سے ہے، وہ ہمیں لاحق تشویش کا ادراک نہیں رکھتیں۔ اور کیا معلوم نواز شریف ان کی بات کس حد تک سنتے ہیں۔ ویسے یہ کوشش ایک سے زائد بار ہوچکی۔ تیسرا شخص کون ہے؟ انہوں نے بات ادھوری چھوڑ کر سوال کی صورت میں پوچھا۔
تیسری شخصیت چوہدری شجاعت حسین ہیں، ہم نے جواب دیا۔ وہ مسکرائے، کافی کا گھونٹ لیا، سگریٹ کا لمبا کش کھینچا اور ہوا میں مرغولے بناتے بناتے پوچھنے لگے، چوہدری شجاعت ہیں تو باکمال، لیکن وہ کیسے قائل کر سکتے ہیں؟ ان دونوں خاندانوں کے ہاں قربت نفرت میں بدلے اب دہائیاں بیت چکیں۔ عرض کی کہ چوہدری شجاعت اب بھی نواز شریف کا دل سے احترام کرتے ہیں، اور نواز شریف کے ہاں بھی ان کے لئے نرم گوشہ ابھی باقی ہے۔ چوہدری صاحب یہ کارنامہ اسی صورت انجام دے سکتے ہیں جب جڑواں شہروں کی جانب سے انہیں سو فیصد مینڈیٹ دیا جائے۔ نواز شریف کے پاس اب کھونے کو کچھ باقی نہیں بچا، سروسز اسپتال میں زیر علاج نواز شریف سے ان کے بھائی، دختر، والدہ اور دیگر عزیز و اقارب سمیت پچھلے دروازوں سے کئی اہم شخصیات مل چکیں، لیکن تاحال کسی کو اس مشن میں رتی بھر کامیابی نہیں مل سکی۔
نواز شریف کہتے ہیں کہ آخر کس چیز کو بچانے کی خاطر اب بیرون ملک جاوں؟ میں نے اپنا معاملہ اللہ کے سپرد کر دیا، جو ہو گا یہیں ہوگا۔ ان کے نزدیک موجودہ سیاسی صورتحال میں باہر چلے جانا خودکشی ہوگی۔ وہ بولے، ہاں! نیب تحویل سے سروسز اسپتال لے جاتے وقت بھی نواز شریف نے انکار کر دیا تھا، سرشام پھر شہباز شریف کو بلانا پڑا، شہباز شریف لگ بھگ دو گھنٹے بڑے بھائی کو سمجھاتے رہے کہ ان کی صحت خطرناک حد تک خراب ہوچکی ہے اور اسپتال لے جانے کے علاوہ اب کوئی چارہ باقی نہیں رہا۔ شہباز شریف کی کوششوں سے نواز شریف اسپتال جانے پر رضا مند ہوئے۔ با اختیار اور مینڈیٹ سے بھر پور چوہدری شجاعت والا نقطہ قابل غور ہے لیکن اس مینڈیٹ میں لین دین کا پیمانہ طے کرنا انتہائی مشکل ہے۔ بہرحال اس پر سنجیدگی سے غور کرنا پڑے گا۔
اور کپتان؟ ہم نے پوچھا! قدرے سنجیدگی کے ساتھ وہ بولے، کپتان کے لئے اپنی پچ سے ہٹنا انتہائی مشکل ہو چکا ہے، کیونکہ وہ اس حد تک فرنٹ فٹ پر آ چکے ہیں کہ بیک فٹ پر لیٹ کٹ لگانے کی صورت میں ایل بی ڈبلیو ہوسکتے ہیں۔ وکٹ پر گھاس سوکھ چکا ہے، جگہ جگہ دراڑیں پڑ چکی ہیں اور ٹریک مکمل طو ر پر تجربہ کار اسپنرز کے لئے موزوں ہو چکا ہے، ان کے لئے کلوز فیلڈ لگائی جا چکی ہے۔ ایسے میں سائیوں کا تکیہ فطری طو ر پر بدلتے حالات پر ہی ہوگا۔
فطری طور پر جنم لینے والی طغیانیوں کے ساتھ مڈ بھیڑ ہمیشہ نقصان دہ ہوتی ہے لہذا ایسے کسی طوفان کے سامنے بند باندھنے کی مزید کوشش نہیں کی جائے گی۔ اب آپ خود ہی دیکھئے ناں! اگر اب تک عوام کے لئے دو چار اہم کام عملی طور پرکیے ہوتے تو اس وقت سرکار کی ساکھ اس قدر پتلی نہ ہوتی۔ کچھ تو ہوتا جس کے دم پر ترجمانوں کے لئے دفاع آسان ہوتا۔ مارچ سے سرکار تو کہیں نہیں جائے گی، البتہ اسلام آباد پہنچ کر گڑ بڑ کا خدشہ ہے، حالات نارمل رہے تو مولانا للکارتے ہوئے سرکار کے سامنے مطالبات کی فہرست رکھیں گے اور ڈیڈ لائن دیتے ہوئے اگلی تاریخ کا اعلان کر دیں گے۔ تو اس ہنگام سرکار کو کیا کرنا چاہیے ْ؟ ہم نے پوچھا۔
پشاوری چپل اتارتے ہوئے آلتی پالتی مار کر صوفے پر تقریبا نیم دراز ہوتے ہوئے وہ بولے کہ ٹیم میں کچھ ردو بدل ازحد لازم ہو چکا ہے، اس سلسلے میں کچھ فہرستوں کا تبادلہ ہونے کی اطلاعات بھی ہیں لیکن بزدار سرکار پر کپتان ڈٹے ہوئے ہیں۔ کابینہ میں البتہ اگلے چند ہفتوں میں ردو بدل کا امکان ہے۔ نواز شریف یہیں رہے اور ان کی حالت مزید بگڑ گئی تو۔ ؟ ابھی ہمارا سوال ادھورا ہی تھا کہ انہوں نے جدید نوکیا تینتس دس کی سکرین کا رخ ہماری جانب موڑا، مسیج میں لکھا تھا کہ سعودی سفیر کی چوہدری شجاعت سے ملاقات جاری ہے۔
- کمینے۔۔! - 27/11/2021
- استاد بڑے غلام علی خان اور پاکستان - 04/02/2021
- ڈاکٹر مغیث الدین شیخ: ملنے کے نہیں نایاب ہیں ہم - 26/06/2020
Facebook Comments - Accept Cookies to Enable FB Comments (See Footer).