سرحد کے اُس پار اور اِس پار

 اُسے مجھ سے نفرت ہے

کہ اتفاق سے میں سرحد کے دوسرے پار سے ہوں

مجھے اُس سے نفرت ہے

کہ اتفاق سے وہ سرحد کے پرلے پار سے ہے

نہ اسے میری خبر ہے

کہ میرے اندر کا انساں کیا ہے!

نہ مجھے اس کی خبر ہے

کہ اس کے اندر کا آدمی کیا ہے!

نہ اس نے اپنی مرضی سے اپنے گھر کا ایڈریس چُنا ہے

نہ میں نے اپنے گھر کا پتہ خود سے بُنا ہے

اس نے بھی آنکھ کھولی

تو وہ نفرت کے گملے میں اُگا پڑا تھا

میں نے بھی آنکھ کھولی

تو خود کو نفرت کے گملے میں پڑا پایا

اب وہ بھی انساں نہیں کیکٹس کا پودا ہے

میں بھی انساں نہیں کیکٹس کا پودا ہوں

کچھ زہر وہ مٹی میں بھرتا ہے

کچھ زہر میں مٹی کو دیتی ہوں

اسی مٹی سے وہ بھی نسلیں بنائے گا

اسی مٹی سے میں بھی چہرے بناؤں گی

پھر وہ بھی مر جائے گا

پھر میں بھی مر جاؤں گی

نفرت وہ بھی دے جائے گا

نفرت میں بھی دے جاؤں گی

اُس کی دھرتی بھی انسانوں کے لیے ترستی رہے گی

میری مٹی بھی انسانوں کے لیے تڑپتی رہے گی