کورونا وائرس سے مقابلے میں جماعت احمدیہ ہم وطنوں کی خدمت میں پیش پیش
ربوہ (پ ر): کورونا وائرس سے پیدا شدہ صورت حال میں جماعت احمدیہ اپنی روایت کے مطابق ہم وطنوں کی خدمت میں پیش پیش ہے۔ اب تک کروڑوں روپے کا راشن و دیگر امدادی اشیاء تقسیم کی جا چکی ہیں۔ گھر گھر آگاہی مہم جاری ہے۔ احمدی نوجوان بڑھ چڑھ کے وزیر اعظم کے ریلیف پروگرام میں شرکت کر رہے ہیں۔ پہلی قسط کے طور پر تیس لاکھ روپے وزیر اعظم کے کورونا ریلیف فنڈ میں جمع کروا دئیے گئے ہیں۔
ترجمان جماعت احمدیہ کے مطابق کرونا وائرس کی صورتحال سے عوام کو درپیش مسائل کے حل کے لئے جماعت احمدیہ اپنی دیرینہ روایت کے مطابق بنی نوع انسان کی بے لوث ہمدردی کے جذبہ سے ہم وطنوں کی خدمت کر رہی ہے۔ اب تک کے کاموں کی کچھ جھلکیاں پیش ہیں۔
٭ پاکستان بھر میں 7228 ضرورت مند گھروں میں راشن پیکس اور نقد رقوم کی تقسیم کر دی گئی ہے۔
٭ ہینڈ سینیٹائزر کی 23380 بوتلیں تقسیم کی گئیں۔
٭ فیس ماسک 3500 اور صابن 5000 کی تعداد میں تقسیم کیا گیا۔
٭ آگاہی مہم کے سلسلہ میں 15706 گھروں سے رابطہ کیا گیا اور 16868 گھروں میں معلوماتی پمفلٹ تقسیم کئے گئے ۔
٭ ربوہ کی تمام رہائشی کالونیوں اور سڑکوں بشمول مسیحی بستی اور گرجا گھروں کو کلورین ملے پانی سے دھویا جا رہا ہے۔
٭ احمدی نوجوان وزیر اعظم کی اعلان کردہ ریلیف فورس میں بڑھ چڑھ کر رجسٹر ہو رہے ہیں۔
٭ وزیر اعظم کے قائم کردہ کوروناریلف فنڈ میں ابتدائی طور پر30 لاکھ روپے کی رقم جمع کرائی ہے۔
ترجمان جماعت احمدیہ پاکستان سلیم الدین احمد کا کہنا ہے کہ جماعت احمدیہ کی ہمیشہ سے یہ روایت ہے کہ جب بھی ملک کو کسی مشکل کا سامنا ہوا، احمدی ملک کی خدمت کے لئے صف اوّل میں کھڑے ہوتے ہیں۔ ملک کے دفاع کی بات ہو یا وطن کی تعمیر و ترقی کا کام ہو، زلزلہ کی مشکلات ہوں یا سیلاب کی آفت کا سامنا ہو، جماعت احمدیہ ہر موقع پر ملک کے لئے اپنی خدمات پیش کرتی چلی آئی ہے۔ ترجمان نے کہا کہ کورونا وائرس سے مقابلہ کے لئے امتحان کی اس گھڑی میں بھی جماعت احمدیہ پاکستان بلا امتیاز مذہب و ملت اپنے ہم وطنوں کی خدمت میں پیش پیش ہے۔ جب بھی وطن عزیز کو ضرورت پڑے، احمدی اپنی جان و مال سے بے لوث خدمت کے لئے حاضر ہیں۔
ترجمان نے عوام سے اپیل کی ہے کہ ان نازک حالات میں تمام اختلافات بھلا کر ضرورت مند ہم وطنوں کے لئے بھائی چارہ کے جذبہ کے ساتھ آگے بڑھیں اور اس بیماری کے خلاف حکومتی اقدامات پر عمل درآمد کریں۔ ترجمان نے کہا کہ ہماری دعا ہے کہ اللہ تعالی بنی نوع انسان کو اس وبا سے جلد نجات دے۔
Facebook Comments - Accept Cookies to Enable FB Comments (See Footer).