شوبز ڈائری: آصف بصرہ کی مبینہ خوکشی، سونو سود کا سوانح عمری لکھنے کا ارادہ اور اگر بازی گری میں شاہ رخ کی موت نہ ہوتی تو؟

نصرت جہاں - بی بی سی اردو ڈاٹ کام، لندن

  •  
  •  
  •  
  •  
  •  
  •  
  •  
  •  
  •  
  •  
  •  
  •  

بالی وڈ میں آج پھر سوگ منایا جا رہا ہے کیونکہ گذشتہ روز 53 سالہ اداکار آصف بصرہ ریاست ہماچل پردیش میں اپنے مکان میں مردہ حالت میں پائے گئے۔

پولیس کے مطابق آصف بسرا مکلیوڈگنج میں اپنے کرائے کے مکان میں گذشتہ پانچ برس سے مقیم تھے اور پولیس ابتدائی طور پر اسے خودکشی کے کیس کے طور پر دیکھ رہی ہے تاہم آصف نے کوئی خود کشی نوٹ نہیں چھوڑا ہے۔

پولیس نے موقع سے شواہد اکھٹے کر لیے ہیں اور کچھ روز میں سامنے آنے والی میڈیکل رپورٹ کے بعد ہی موت کی وجہ کا تعین کیا جا سکے گا۔

آصف بصرہ یوں تو فلم ’کرش تھری‘، ’جب وی میٹ‘، ’ہچکی’ اور ’ونس اپون اے ٹائم ان ممبئی‘ جیسی فلموں سے جانے جاتے ہیں لیکن حال ہی میں ویب سیریز ‘پاتال لوک’ میں بھی نظر آئے تھے۔

یہ بھی پڑھیے

بالی وڈ: وہ فلمی ستارے جنھوں نے اپنی زندگی کا خاتمہ اپنے ہاتھوں کیا

’کسی انسان کی قدر اس کے جانے کے بعد ہی کیوں ہوتی ہے‘

’جب تک سُشانت کو کنارے لگایا جاتا وہ سٹار بن چکے تھے‘

معروف شخصیات کی موت کو تماشہ کیوں بنا دیتا ہے میڈیا؟

آصف بصرہ کی مبینہ خود کشی کی خبر پھیلتے ہی انڈسٹری میں غم اور افسردگی چھا گئی اور بالی ووڈ شخصیات نے سوشل میڈیا پر تعزیت کا اظہار شروع کر دیا۔

منوج باچپائی نے اپنے ٹوئٹر ہینڈل پر حیرانی ظاہر کرتے ہوئے لکھا کہ انھیں اس خبر سے بڑا جھٹکا لگا ہے کیونکہ لاک ڈاؤن سے پہلے آصف نے ان کے ساتھ شوٹنگ کی تھی۔

انوشکا شرما نے انسٹا پر اپنی ایک پوسٹ میں انھیں خراجِ عقیدت پیش کیا۔ ان کے علاوہ سووارہ بھاسکر سے لے کر دویا دتہ تک سبھی نے اظہارِ افسوس کیا دویا نے لکھا ’یہ ایک افسوس ناک خبر ہے، ہم نے ’ہوسٹیج ٹو کے لیے ایک ساتھ شوٹنگ کی تھی یقین نہیں آ رہا کہ اب آصف اس دنیا میں نہیں رہے وہ بہت خوش اور مطمئن نظر اتے تھے۔‘

ادھر سوشانت سنگھ راجپوت خود کشی معاملے میں محکمہ نارکوٹکس کی تحقیقات جاری ہیں اور اس سلسلے میں اداکار ارجن رامپال اور انکی گرل فرینڈ گیبریالہ کو پوچھ تاچھ کے لیے کل این بی سی کے دفتر طلب کیا گیا۔

اس سے پہلے فلسماز فیروز ناڈیاڈ والا کی بیگم شبانہ سعید کو ان کی رہائش گاہ سے منشیات برآمد ہونے پر گرفتار کیا گیا تھا بعد میں انھیں ضمانت پر رہا کر دیا گیا۔

محکمے کے اہلکاروں کا کہنا ہے کہ ابھی تک کسی کو کلین چٹ نہیں دی گئی ہے۔

شاہ رخ

Getty Images

فلم بازی گر میں اگر شاہ رخ خان کی موت نہ ہوتی تو کیا ہوتا

ڈائریکٹر عباس مستان کی فلم ’بازی گر‘ کو، جس نے شاہ رخ خان کو بالی ووڈ کا سپر سٹار بنایا تھا، 27 سال پورے ہو چکے ہیں۔

شاہ رخ، کاجول اور شلپا شیٹی کی اس فلم نے کامیابی کے نئے ریکارڈ قائم کیے تھے لیکن بہت کم لوگ یہ جانتے ہیں کہ اس فلم کے دو کلائمیکس شوٹ کیے گئے تھے۔

فلمساز عباس مستان نے خبر رساں ادارے پی ٹی آئی کے ساتھ ایک پرانے انٹرویو میں بتایا تھا کہ متعدد ڈسٹری بیوٹرز کا خیال تھا کہ فلم کے آخر میں ہیرو کی موت نہیں ہونی چاہیے بلکہ اسے پولیس کے حوالے کیا جانا چاہیے اس لیے فلم کے دو کلائمیکس شوٹ کیے گئے تھے۔ تاہم آخر میں یہ فیصلہ کیا گیا کہ ہیرو کو مرنا ہی ہو گا اور اگر ہیرو کو پولیس کے حوالے کیا گیا تو اس سے اس کردار کے ساتھ وابستہ لوگوں کے جذبات کے ساتھ انصاف نہیں ہو گا۔

یہ شلپا شیٹی کی پہلی فلم تھی جنھیں فلم کے شروع میں ہی شاہ رخ خان نے 26 منزلہ عمارت سے پھینک کر دنیا کے ساتھ ساتھ فلم سے بھی رخصت کر دیتے ہیں پھر بھی شلپا نے اپنے چھوٹے سے کردار میں لوگوں کے دلوں پر اچھا اثر چھوڑا تھا۔

سونو سود بہت سے لوگوں کے ریئل لائف ہیرو

سونو سود ایک ایسے اداکار ہیں جنھوں نے فلموں سے زیادہ اصل زندگی میں لوگوں پر اپنا ایسا اثر چھوڑا کہ لوگ ان کی دریا دلی اور ہمت کی داد دے رہے ہیں۔

کورونا وائرس وبا کے دوران ہزاروں مزدوروں کو گھر بھیج کر ان کی کی مدد کرنے والے سونو سود بہت سے لوگوں کے لیے حقیقی زندگی میں ہیرو بن چکے ہیں کوئی انھیں بھگوان تو کوئی انھیں مسیحا کہہ رہا ہے لیکن سونو سود کا کہنا ہے کہ ’میں کوئی مسیحا نہیں ہوں۔‘

کچھ عرصہ پہلے پیونگوئن رینڈم ہاوس انڈیا نے اعلان کیا تھا کہ سونو سود اپنی سوانح عمری لکھیں گے جس میں وہ کورونا وبا کے دوران اور اس کے بعد کے اپنے تجربات بیان کریں گے اور اس کتاب کا نام ہوگا ’آئی ایم نو مسیحا۔‘

سونو اس کتاب میں ان مختلف لوگوں کی کہانیاں بیان کریں گے جن سے اس دوران ان کی ملاقات ہوئی اور کس طرح زندگی کے تئیں ان کی سوچ ، ان کے رویے، ان کی شخصیت اور زندگی کے مقصد میں تبدیلی آئی۔

Comments - User is solely responsible for his/her words

  •  
  •  
  •  
  •  
  •  
  •  
  •  
  •  
  •  
  •  
  •  
  •  

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 16633 posts and counting.See all posts by british-broadcasting-corp