اندرون شہر لاہور کے کھانے
لاہوری ہمیشہ سے خوش خوراک رہے ہیں۔ قیام پاکستان سے قبل، یہاں رہنے والوں کی مرغوب غذائیں حلیم، حلوہ پوری، حلوہ مانڈہ، کڑاہ، پراٹھا، کچوری، دہی، لسی پیڑے، دال پوری، سیخ کباب، تکے، تلی ہوئی مچھلی، فالودہ، رس ملائی، پریم کچوری، نون بری، نان خطائی، کھانڈ کلچہ، نہاری، سرے پائے، پٹھورے، نان، تنوری روٹی اور داس کلچہ وغیرہ بہت شوق سے کھائے جاتے تھے۔ دنیا میں بہت کم شہر ایسے ہیں، جو اپنے کھانوں کی وجہ سے مشہور ہیں۔
ناشتے کے اہتمام کے حوالے سے بر صغیر پاک و ہند میں، لاہور اور دہلی کا جوڑ نہیں۔ خوش آئند بات یہ کہ لاہور اشیا کی فراہمی میں اپنا مقام کس حد تک بر قرار رکھے ہوئے ہے۔ اندرون شہر جسے ہم پرانا لاہور یا والڈ سٹی کہتے ہیں، میں سردیوں میں چائے کے ساتھ بن، کلچہ اور باقر خانی، رس کیک، رس وغیرہ۔ جب کہ گرمیوں میں شربت بزوری، شربت صندل، شربت بادام وغیرہ کے ساتھ خاص طور پر گاجر، سیب اور آملہ وغیرہ کے مربہ جات کھائے جاتے تھے۔
ناشتے کے لئے بعض پوریاں، پستہ بادام، کھوپرا اور چھوہارا بھر کر پکائی جاتیں۔ باقر خانی، شیر مال، کلچے، تافتان، آبی شیر مال وغیرہ تنوری روٹیوں کی ترقی یافتہ شکلیں ہیں۔ ایک وقت تھا کہ اندرون شہر میں گھروں کے اندر ناشتے کا اہتمام بہت کم کیا جاتا تھا۔ تقسیم سے پہلے تک گھروں میں عموماً صرف لسی اور چائے بنتی تھی۔ جب کہ ناشتے سے متعلق تمام اشیائے خور و نوش بازار سے لائی جاتی تھیں۔ ناشتے میں انڈے، مکھن، ڈبل روٹی اور بند وغیرہ تب اتنے مقبول عام نہ تھے۔
دکان دار بھی اپنے گاہکوں کی تسلی کے لئے اپنا معیار بہتر سے بہتر رکھتے تھے۔ اب بھی دنیا بھر سے لاہور وارد ہونے والے لاہور کے روایتی ناشتوں کے لئے ان جگہوں کا رخ کرتے ہیں، جہاں انہیں مطلوب اشیا با آسانی دستیاب ہو جاتی ہیں۔ اہل لاہور اپنی روایت کی پاس داری کرتے ہوئے اپنے مہمانوں کو مایوس نہیں کرتے۔ تاہم شہر کے روایتی صرف غیر لاہوریوں کے لئے ہی اپنا معیار بلند نہیں رکھتے، بلکہ مقامی لوگوں کی تنقید سے بچنے کے لئے بھی خوب سے خوب تر پیش کش کے لئے کوشاں رہتے ہیں۔
زندہ دلوں کا شہر لاہور کھانے پینے میں عہد قدیم ہی سے مشہور ہے۔ پاکستان بھر میں خوش خوراکی میں لاہوریوں کا کوئی جوڑ نہیں۔ اس شہر کے بارے ایک روایت مشہور ہے کہ لاہور ایسی جگہ ہے، جہاں ڈھونڈنے سے۔ چڑیا کا دودھ بھی مل سکتا ہے۔ لاہوریا اگر ملک سے باہر جائے اور وہ گھر والوں، دوست احباب کو یاد نہ کرے تو کچھ نہیں۔ لیکن وہ لاہور کے چٹ پٹے، لذیذ، کرارے بھاٹی لاہوری اور ٹکسالی وغیرہ کے ناشتے اور کھانے کبھی نہیں بھول پاتا۔ اسے لاہوری کھانوں کے حوالے سے اس شہر کی یادیں ضرور ستائیں گی۔
لاہور کی دیگر لوازمات انڈے (فرائی آملیٹ، ابلے ہوئے انڈے)، مکھن، جیم، پنیر، کریم، روغنی نان، ڈبل روٹی، بن، پراٹھا سادہ، آلو والا نان، مولی والا، قیمے والا، ساگ پراٹھا، رس کیک، بسکٹ، باقر خانی، سردائی باداموں والی، دودھ جلیبی، چاٹی کی لسی، پیڑوں والی لسی، خطائی سادی، خطائی پستہ بادام، کلچہ سادہ، کھنڈ کلچہ پستہ بادام، باقر خانی، سموسے، پکوڑے، تکے، کباب، بریانی، روسٹ، جب کہ اندرون شہر کے کچھ لوگ داس کلچہ اور پریم کچوری کو بہت پسند کرتے ہیں۔
سبز چائے اور کھنڈ کلچہ کشمیری برادری کا ٹریڈ مارک سمجھا جاتا ہے، جو کشمیری برادری کا نہایت مرغوب ناشتا ہے۔ کھنڈ کلچہ، پریم کچوری اور داس کلچہ شہر کی مخصوص جگہوں پر دستیاب ہیں۔ چائے اور لسی بھی ناشتے کے اہم جزو ہیں۔ بعض لوگ ناشتے میں شامی کباب بھی استعمال کرتے ہیں۔ ایک وقت میں یہاں گلیوں میں لچھے فروخت ہوتے تھے۔ چینی اور گھی کے بڑھتے ہوئے نرخوں نے بچوں سے یہ ذائقے چھین لئے ہیں۔ اندرون شہر کے کھانوں میں ایک اہم ناشتا اور ماضی کی یاد بنتا داس کلچہ ہے۔ اسے خوانچہ فروش گلیوں میں آواز لگا کر بیچتے تھے اور آج کل بھی شاذ و نادر نظر آ جاتے ہیں۔
اندرون شہر میں روشنائی دروازہ کے قریب فورٹ روڈ پر ایک فوڈ سٹریٹ بنائی گئی ہے، جہاں موجود ریستورانوں کی چھتوں پر بیٹھ کر کھانا کھایا جاتا ہے۔ یہاں ہر طرح کے دیسی اور جدید کھانے مل جاتے ہیں۔ اندرون شہر کے کھانوں کی ایک اہم خاصیت یہ بھی ہے کہ یہ غریب پرور شہر ہے۔ یہاں غریب بھی کم پیسوں میں اچھا کھانا کھا سکتا ہے۔
- اندرون شہر لاہور کے کھانے - 31/12/2020
- لاہور کا شاہی حمام - 04/06/2020
- کرونا وائرس کے غریب طبقے پر منفی اثرات - 01/05/2020
Facebook Comments - Accept Cookies to Enable FB Comments (See Footer).