برازیل کے شہر پیٹروپولس میں طوفانی بارش سے تباہی کے بعد 191 افراد اب تک لاپتہ
خراب موسم کا سلسلہ علاقے میں گذشتہ چار روز سے جاری ہے اور شدید بارش کے بعد لینڈ سلائیڈنگ میں ہلاک ہونے والوں میں 27 بچے اور کم عمر بھی شامل تھے۔
منگل کے دن برازیل کے شہر ریو ڈی جنیریو کے شمال میں واقع اس سیاحتی مقام پر فروری کے پورے مہینے کی اوسط سے زیادہ بارش ایک ہی دن میں ہوئی تھی۔
سنیچر کے دن ایمرجنسی ٹیموں کو اس وقت کئی بار اپنا کام روکنا پڑا جب انھیں غیر معمولی موسلا دھار بارش کا سامنا کرنا پڑا۔ حکام کا کہنا ہے کہ اب کسی کے زندہ بچ جانے کی امید بہت کم ہے۔
تقریباً 900 افراد کو سکولوں اور حفاطتی مقامات پر پناہ دی گئی ہے۔
سنیچر کے دن ریسکیو حکام سمیت رضاکار بیلچوں کی مدد سے ملبے اور کیچڑ میں کھودائی کرتے رہے جب کہ انھیں شدید دھند کا بھی سامنا تھا۔
اس وقت بھی لاپتہ افراد کی تلاش کا کام جاری ہے لیکن ایسے علاقے جہاں اب بھی صورت حال غیر مستحکم ہے وہاں پر دستی اوزاروں اور برقی آریوں کی مدد لی جا رہی ہے۔
ان ٹیمز کو 41 ماہر کتوں کی مدد بھی حاصل ہے جو لاپتہ افراد کو سونگ کر تلاش کرنے کی صلاحیت رکھتے ہیں۔
یہ بھی پڑھیے
روبرٹو ایمرال مقامی فائر ڈیپارٹمنٹ کی خصوصی ریسکیو ٹیم کے کوآرڈینیٹر ہیں۔ انھوں نے خبر رساں ادارے اے ایف پی کو بتایا کہ ’اس مقام پر بھاری بھرکم مشینری لانا ناممکن ہے۔ اسی لیے ہمیں تھوڑا تھوڑا کر کے چیونٹیوں کی طرح کام کرنا پڑ رہا ہے۔‘
شہر کے سب سے متاثرہ علاقے میں ایک پہاڑی پر واقع تقریباً 80 گھر لینڈ سلائیڈ کی زد میں کر تباہ ہو گئے تھے۔
برازیل کے صدر جائر بولسونارو نے جمعے کے دن حادثے کے مقامات کا فضائی جائزہ لیا تھا۔ انھوں نے کہا تھا کہ ’شہر میں بڑے پیمانے پر ایسی تباہی ہوئی جیسے کسی جنگ میں ہوتی ہے۔‘
