چین کے لائیو سٹریمرز کی ذاتی زندگیوں کی جھلک، پیسے کمانے کے لیے یہ کیا جتن کرتے ہیں؟
چینی فوٹوگرافر ہوانگ کِنگ جون عام چینیوں کی ذاتی زندگیوں کو عکس بند کرنے کے حوالے سے جانے جاتے ہیں۔ 2003 میں ان کے ایک انوکھے پروجیکٹ میں انھوں نے چین بھر سے لوگوں کے پاس موجود ان کی ذاتی اشیا کو عکس بند کرنا شروع کیا۔
اس پروجیکٹ سیریز کو جیا ڈانگ، یا فیملی سٹف کا نام دیا گیا۔ اس کے لیے وہ تقریباً دو دہائیوں تک مختلف صوبوں میں گئے اور مختلف خاندانوں کی ان کے تمام ساز و سامان کے ساتھ تصاویر بنائیں۔
اپنے منصوبے کے تازہ دور میں ہوانگ نے اپنے کمیرے لینس کا رخ ان لوگوں کی طرف کیا جو لائیو سٹریمنگ سے اپنی روزی کماتے ہیں۔
کورونا کی وبا کے دوران لائیو سٹریمنگ کی مقبولیت میں اضافہ ہوا جس کے ذریعے تفریح فراہم کی گئی کیونکہ لاکھوں لوگ کئی ہفتوں تک اپنے گھروں تک محدود تھے۔
یہ صرف ناظرین ہی نہیں تھے جو اس سب سے جڑے ہوئے تھے۔ کاروباری افراد نے بھی سامان کی فروخت کے لیے آن لائن پلیٹ فارم کا اسستعمال کیا۔ فروری 2020 میں جب چین میں کووڈ 19 کی وبا عروج پر تھی، تاؤ باؤ نامی چینی پلیٹ فارم جس پر لائیو سٹریمنگ میں سب سے زیادہ خرید و فروخت ہوتی ہے اس کے ملک بھر میں نئے تاجروں کی تعداد میں 719 فیصد اضافہ ہوا۔
چونکہ چین کے مختلف صوبوں اور شہروں میں لاک ڈاؤن کا نفاذ اب بھی جاری ہے اس لیے لائیو سٹریمنگ کے لیے اب بھی بہت مواد موجود ہے۔
ہوانگ بی بی سی کو بتاتے ہیں، ’گذشتہ دو برسوں میں، لوگوں کی روزمرہ کی زندگی اور اشیا کے استعمال کی عادات میں بہت تبدیلی آئی ہے۔‘
’اب کووڈ وبا کے بعد کے دور میں لوگ سمارٹ فونز کے ذریعے معاشرے کو سمجھتے ہیں، اور مختصر نشریات اور لائیو سٹریمنگ افراد کے لیے اپنی صلاحیتوں کو ظاہر کرنے کا ایک راستہ بن گیا ہے۔‘
شاید زیادہ اہم بات یہ ہے کہ ان لائیو سٹریمرز نے لوگوں کے تنہائی کے احساس کو دور کیا خاص طور پر ایسے وقت میں جب پابندیوں اور قرنطینہ نے بہت سے لوگوں کو انسانی تعلق اور محفل سے محروم کر دیا ہے۔
ہوانگ کا کہنا ہے کہ ’سامعین اور لائیو سٹریمر کے درمیان ’ٹھوس دوستی‘ جو لائیو سٹریم براڈ کاسٹ کے باعث بن گئی ہے، وہ بھی لوگوں کے جذبے کو برقرار رکھنے کی وجہ ہے۔‘
اپنی پہلی تصویری سیریز میں، مسٹر ہوانگ کو چین کے کچھ دور دراز علاقوں کا سفر کرنا پڑا تاکہ لوگوں کو اپنے لیے پوز کرنے پر آمادہ کر سکیں۔ ان میں سے کچھ نے اپنی زندگی میں کبھی تصویر نہیں کھنچوائی تھی اور بہت سے ایسے تھے جن کے پاس کیمرہ بھی نہیں تھا۔
وہ عموماً اپنی معمولی لیکن قیمتی چیزیں دکھاتے تھے جیسے کہ ایک ٹیلی ویژن، چند برتن، کچھ جوڑے اور پہنے ہوئے جوتے۔
لیکن اب ان کی توجہ کا مرکز مختلف پس منظر سے تعلق رکھنے والے ٹیکنالوجی سے وابستہ لوگوں کا ایک گروپ ہے، جس میں کیمسٹری کے پروفیسر اور فوڈ ڈیلیوری مین سے لے کر کبوتر کے شوقین اور نوڈل بیچنے والے شامل ہیں۔
اس بار ان کی تصویروں کا موضوع بننے والے بہت سے لوگ خود کو کیمرے کے سامنے لاتے ہوئے، پیشہ ور فلم سازی کے آلات، الیکٹرانک آلات اور کھیلوں کے سامان کے گرد گھرے ہوئے دکھائی دیتے ہیں۔
یہ بھی پڑھیے
انڈیا کے دائیں بازو کے نوجوانوں کی ڈیجیٹل دنیا میں گہری تقسیم اور نفرت کا بیانیہ
’اب میری اماں بھی ایک منجھی ہوئی گیمر ہیں‘
’میری بیٹی کو کہا گیا کہ انڈروئیر میں پوز کرو‘: دوستی سے بلیک میلنگ تک کی ایک کہانی
ہوانگ کا کہنا تھا ’لائیو سٹریمرز کے سامان پر توجہ دیں ۔۔۔ اور وہ اوزار جن پر وہ اپنی روزی روٹی کے لیے انحصار کرتے ہیں، ہم اس دور کی تبدیلیوں کو دیکھ سکتے ہیں۔‘
’چینی معاشرے کی تیز رفتار ترقی کے ساتھ، چینی لوگوں کے معیار زندگی میں بھی بڑی تبدیلیاں آئی ہیں، اور زیادہ تر خاندان اس ترقی سے حاصل ہونے والے فائدوں سے لطف اندوز ہو رہے ہیں۔‘
عالمی بینک کا تخمینہ ہے کہ دو دہائیوں میں چین کی فی کس مجموعی قومی آمدنی دس گنا سے زیادہ بڑھ گئی ہے، جو 2000 میں 940 ڈالر سے 2020 میں 10550 ڈالر تک پہنچ گئی ہے، جس سے متوسط طبقے میں اضافہ ہوا ہے۔
لیکن فوٹوگرافر ہوانگ کا مزید کہنا ہے کہ کووڈ 19 کی وبا نے بہت سے لوگوں کو زندگی گزارنے کے انداز و اطوار پر دوبارہ سوچنے پر مجبور کر دیا ہے۔
’اب لوگوں نے ماحول کی اہمیت کو تسلیم کر لیا ہے، اور ہر گھر نے اپنے کوڑے کو ری سائیکلنگ کے لیے چھانٹنا شروع کر دیا ہے۔‘
ان کا مزید کہنا تھا ’چونکہ وبائی مرض میں بہت زیادہ غیر یقینی صورتحال ہے، اس کا لوگوں کی آمدنی اور گھریلو استعمال کی اشیا پر بھی بہت اثر پڑا ہے۔‘
ہوانگ کو امید ہے کہ ضرورت سے زیادہ اصراف سے دُوری کا یہ بتدریج رجحان ان کی سیریز کی اگلی قسط کے لیے تحریک کا کام کرے گا۔
’مجھے امید ہے کہ میں مستقبل میں ایک کم سے کم اصراف کی طرز زندگی کا موضوع کر سکتا ہوں۔‘
وہ کہتے ہیں ’اور میری فیملی سٹف سیریز کا آخری کام میرے اپنے سامان سے متعلق ہو گا۔‘
