غلام محمد، جسٹس منیر اور جنرل ایوب گٹھ جوڑ

غلام محمد لاہور کے رہنے والے تھے۔ آپ کا تعلق پشتون قبیلے ککے زئی سے تھا۔ جو لاہور میں صدیوں سے آباد ہیں۔ آپ نے علی گڑھ مسلم یونیورسٹی سے بی اے کرنے کے بعد انڈین اکاؤنٹ سروس میں چارٹرڈ اکاؤنٹنٹ کی حیثیت سے کام کیا اس کے بعد ریلوے بورڈ میں ذمہ دار عہدہ پر کام کرتے رہے۔ جنگ عظیم دوم کے دوران انھوں نے کنٹرولر آف جنرل سپلائی اینڈ پر چیز کی ذمہ داریاں سر انجام دی۔ پہلی گول میز کانفرنس میں آپ نے نواب آف بہاول پور کے نمائندے کے طور پر کام کیا۔

آپ نے نظام حیدرآباد کے مشیر خزانہ کے طور پر ذمہ داریاں سر انجام دی۔ قیام پاکستان کے بعد آپ پہلے وزیراعظم لیاقت علی خان کے کابینہ میں مشیر خزانہ کی حیثیت سے مقرر ہوئے۔ یوں آپ کو پاکستان کا پہلا بجٹ پیش کرنے کا اعزاز حاصل ہوا۔ آپ نے 8 فروری 1948 کو پاکستان کا پہلا بجٹ پیش کیا۔ یہ بجٹ خسارے کا تھا۔ اس میں آدھا دفاعی خرچہ تھا۔ کیونکہ نوزائیدہ مملکت کا اپنا سکہ نہیں تھا۔ وزیرخزانہ ملک غلام محمد نے دستور ساز اسمبلی میں اپنی بجٹ تقریر میں یہ بھی بتایا تھا کہ قیام پاکستان یعنی 15 اگست 1947 ء سے لے کر 31 مئی 1948 ء تک کے رواں مالی سال تک حکومت پاکستان کو 23 کروڑ، 41 لاکھ روپے کا خسارہ ہو رہا ہے۔

لیکن آئندہ سال یعنی 1948 ء تا 1949 ء کے لیے مجموعی طور پر 10 کروڑ، 11 لاکھ کے بجٹ خسارہ کا اندازہ لگایا گیا ہے۔ یوں اس بجٹ کی وجہ سے غلام محمد کی مقبولیت نوزائیدہ ریاست میں بڑھ گئی۔ وزیر اعظم لیاقت علی خان آپ کو عہدے سے ہٹانا چاہتے تھے کیونکہ ایک طرف آپ بے جا مداخلت کرتے اور دوسری طرف صحت بھی خراب تھی لیکن ناگزیر وجوہات کی بنا پر وہ ایسا نہ کرسکے۔ لیکن اکتوبر 1951 میں وزیر اعظم لیاقت علی خان کو راولپنڈی میں جلسے کے دوران گولی مار دی گئی۔

لیاقت علی خان کی وفات کے بعد خواجہ نظام الدین کو وزیراعظم جبکہ بیماری کے باوجود پاکستان کا تیسرا گورنر جنرل بنا دیا گیا۔ ملک غلام محمد ان دنوں خاصے بیمار رہتے تھے۔ انہیں بلند فشار خون کا عارضہ لاحق تھا۔ اس کے علاوہ فالج اور لقوے کی وجہ سے وہ ٹھیک طرح سے بول بھی نہیں پاتے تھے۔ لیکن پھر بھی وہ ملک کے سیاہ و سفید کے مالک بن گئے۔ اس وقت پاکستان میں انڈیا ایکٹ 1935 کے تحت گورنر جنرل براہ راست تاج برطانیہ کے نمائندے کے طور پر فرائض سرانجام دیتا تھا۔

چونکہ غلام محمد کبھی سیاست دان نہیں رہے۔ کبھی سیاست نہیں کی بلکہ سرکاری نوکری کی لہذا آپ کے دماغ پر طاقت کا نشہ سوار تھا۔ اپریل 1953 کے وسط میں خواجہ ناظم الدین نے اپنی کابینہ کے چند قابل اعتبار ارکان سے مشاورت کی اور یہ طے پایا کہ تاج برطانیہ سے گورنر جنرل غلام محمد کو ان کے عہدے سے ہٹانے کی سفارش کی جائے۔ اس مشاورت میں وزیر خزانہ چودھری محمد علی بھی شریک تھے اور انہوں نے یہ بات گورنر جنرل غلام محمد کو بتا دی۔ غلام محمد یہ بات سن کر آپے سے باہر ہو گئے اور انہوں نے 17 اپریل 1953 کی شام کو خواجہ ناظم الدین اور ان کی کابینہ کو گورنر جنرل ہاؤس میں بلا کر انہیں فوری طور پر مستعفی ہو جانے کا حکم دے دیا۔

مگر جب ظفر اللہ خان کے علاوہ کابینہ کے تمام اراکین اور خواجہ ناظم الدین استعفے دینے کے لیے رضامند نہ ہوئے تو گورنر جنرل غلام محمد نے خواجہ ناظم الدین اور ان کی کابینہ کو یک جُنبشِ قلم برطرف کر دیا۔ خواجہ ناظم الدین پر قانون ساز اسمبلی نے ابھی دو ہی ہفتے قبل اپنے بھرپور اعتماد کا اظہار کیا تھا جب اسمبلی نے خواجہ ناظم الدین کی کابینہ کا تیار کردہ بجٹ بھاری اکثریت سے منظور کیا تھا۔ یہ وہ وقت تھا جب گورنر جنرل غلام محمد کو فوج کی بھی حمایت حاصل تھی۔

پاکستانی فوج کے کمانڈر انچیف جنرل ایوب خان ان کے ساتھ تھے اور انہوں نے حکومت کو رخصت کرنے کا فیصلہ ایوب خان کی معاونت ہی سے کیا تھا۔ خواجہ ناظم الدین کو برطرف کر کے مشرقی پاکستان کی عوام میں مغربی پاکستان کے خلاف بداعتمادی کا بیج بویا۔ راتوں رات امریکہ میں پاکستان کے سفیر محمد علی بوگرہ کو واپس بلا کر پاکستان کا وزیراعظم بنا دیا گیا اور جنرل ایوب خان نے وزیر دفاع کے طور پر حلف اٹھایا۔ یہ پہلی مرتبہ تھا کہ ملکی فوج کا سربراہ فوجی وردی میں کابینہ کے اجلاس میں بطور وزیر دفاع شامل ہوا۔

اگرچہ پاکستانی فوج ملکی سیاسی معاملات میں شروع ہی سے داخل اندازی کرتی تھی مزید اختیارات اور طاقت ہتھیانے کے لیے سرگرم تھی مگر جب پاکستانی افواج کے کمانڈر انچیف جنرل ایوب خان وزیر دفاع بن کر کابینہ میں شامل ہو گئے تو پہلی مرتبہ فوج باضابطہ طور پر سیاسی طاقت کی شراکت دار بن گئی۔ ایوب خان چونکہ ہزارہ کے ایک سیاسی ترین خاندان سے تعلق رکھتے تھے آپ کے بھائی سردار خان بہادر پاکستان کی پہلے اسمبلی کے رکن تھے۔

1954 میں پاکستان کی پہلی دستور ساز اسمبلی نے گورنر جنرل کے اختیارات کم کرنے کی کوشش کی جب گورنر جنرل غلام محمد کو پتہ چلا تو آپ نے 24 اکتوبر 1954 کو پاکستان کی پہلی اسمبلی کو توڑ دیا۔ یہ پاکستان کی سیاسی تاریخ میں پہلی بار براہ راست جمہوریت پر وار تھا۔ دستور ساز اسمبلی کے سپیکر مولوی تمیزالدین نے اس برطرفی کو سندھ چیف کورٹ میں چیلنج کیا۔ سندھ کی اعلیٰ عدالت نے مولوی تمیزالدین کے حق میں فیصلہ دیا کہ گورنر جنرل کا فیصلہ غیر آئینی تھا اس فیصلے کے خلاف حکومت نے سپریم کورٹ میں اپیل کی تو اس کے نتیجے میں جسٹس منیر کا وہ بدنام زمانہ فیصلہ آیا جس میں گورنر جنرل کا فیصلہ جائز قرار دیا اور اسے نظریہ ضرورت قرار دیا کہ دستور ساز اسمبلی اپنی اہمیت و افادیت کھو چکی ہے۔

اس فیصلے نے پاکستان میں فوج اور بیوروکریسی کی سازشوں کا ایک نہ رکنے والا باب کھول دیا۔ جسٹس منیر نے فیصلے میں یہ احمقانہ موقف اختیار کیا کہ پاکستان نے مکمل آزادی حاصل نہیں کی ہے اور اب بھی جزوی طور پر تاج برطانیہ کا حصہ ہے۔ اس رو سے دستور ساز اسمبلی گورنر جنرل کے ماتحت ہے اور گورنر جنرل کو اسے برخاست کرنے کا اختیار حاصل ہے۔ اس مقدمے میں صرف ایک غیر مسلم جج جسٹس کارنیلیس نے یہ موقف اختیار کیا کہ پاکستان مکمل طور پر آزاد مملکت ہے اور دستور ساز اسمبلی ایک خود مختار ادارہ ہے جسے گورنر جنرل برطرف نہیں کر سکتا۔

اسی مقدمے میں جسٹس منیر نے بدنامِ زمانہ نظریہ ضرورت بھی متعارف کروایا۔ پاکستان کے پہلے چیف جسٹس عبدالرشید کی ریٹائرمنٹ کا وقت آیا تو سنیارٹی کے اعتبار سے ایک بنگالی جج جسٹس اے ایس ایم اکرام سینیئر موسٹ جج تھے۔ گورنر غلام محمد اور جنرل ایوب کو ان کی تقرری کسی صورت بھی قبول نہیں تھی سو ایک جونیئر جج جسٹس محمد منیر سے معاملات طے کیے گئے۔ جسٹس محمد منیر کے ساتھ جنرل ایوب خان کا یارانہ تھا، یہ ایک ساتھ مل کر ہینگ آؤٹ کرتے تھے، شکار کے لئے جایا کرتے تھے اور یہیں پر ان دونوں کے درمیان پاکستان کے مستقبل کا منظر نامہ طے پایا اور ملک کے وسیع تر مفاد میں جسٹس محمد منیر نے جنرل محمد ایوب کو مکمل حمایت کا یقین دلایا۔

یوں غلام محمد، جنرل ایوب خان اور جسٹس منیر کا ایک گروہ بن گیا۔ جنہوں نے مل کر ملک کو اپنے مفادات کے لیے استعمال کیا۔ جمہوریت کو روندا، پاکستان کی پہلی اسمبلی کے ارکان جو کہ بانیان پاکستان تھے ان پر مظالم ڈالے۔ اقتدار کو طوالت دی۔ سیاسی بنیادوں پر سیاسی ورکروں پر مقدمات قائم کیے۔ یہ پاکستان کی سیاسی تاریخ میں پہلی گٹھ جوڑ تھی۔ جس نے ملک میں جمہوریت کو پٹڑی سے اتارا اور جنرل ایوب خان نے 1958 میں باقاعدہ پہلی مارشل لاء قائم کی۔