خطہ بے آئین گلگت بلتستان میں الیکشن اور سلیکشن کا دور زوروں پر ہے۔ یہ دنیا کا واحد علاقہ ہے، جہاں ہر شعبے میں ترقی کی رفتار اور ڈائریکشن کا معلوم نہیں ہوتا، ترقی اور شعور میں آگے جا رہی ہے کہ پیچھے۔ کوئی وثوق سے کچھ نہیں کہہ سکتا۔ اس خطے کی تاریخ سے ظاہر ہوتا ہے کہ اس کی محرومیوں کی واحد وجہ، اس کی حکومتی مشینری ہے۔

سیلف گورننس کے نام سے جو سٹیج شو دنیا کو دکھایا جا رہا ہے، وہ محض ایک فراڈ ہے۔ یہ ڈراما 2009ء سے اب تک باکس آفس پہ ہٹ بھی ہے۔ اس کی ایک وجہ یہ ہے کہ اس خاکے کے ڈائریکٹر اور پروڈیوسر یہاں کے مقامی نہیں ہیں۔ انہوں نے اس سیریز کا آغاز تو 1947ء ہی سے شروع کیا تھا، اس وقت ان کو شاید فلم سازی سیکھنے کی حد تک ضرورت تھی، اب ان کو یہ پورا علاقہ ایک فلم انڈسٹری لگنے لگا ہے۔ وہ یہاں پہ اپنا سیٹ اپ بھی لانے کا سوچ رہے ہیں۔