مسجد النور کی بیرونی دیوار کے ساتھ ساتھ پھولوں کے ڈھیر اس بات کی غمازی کر رہے تھے کہ مغرب کی طرف سے پھیلایا جانے والے اسلام دشمن پروپیگنڈے نے کتنے دلوں میں نفرت اور تعصب کی آگ کو ہوا دی تھی اور کتنے ذہنوں نے اسے قبول نہ کرتے ہوئے اپنے دامن کو اس مکروہ فلسفے سے آلودہ نہیں ہونے دیا تھا۔ یہاں پھول رکھنے والے صرف مسلمان ہی نہیں ان میں عیسائی، یہودی، ہندو اور بدھ مت کے ماننے والے بھی شامل تھے جب کہ ان میں زیادہ تعداد مقامی لوگوں کی تھی جو ایک ایسے ملک کے باشندے تھے جس کی تاریخ اپنے دامن میں صلح جوئی، انسانیت، محبت اور فکر و عمل کے سچے جذبوں سے مالا مال تھی۔