بیسویں صدی کے وسط میں جب مملکتِ خداداد دنیا کے نقشے پہ ابھرا تو اس وقت کھیلوں کی دنیا میں ترقی یافتہ ممالک کا راج تھا۔ مگر کھیلوں کی بنیادی سہولیات نہ ہوتے ہوئے بھی پاکستان نے اپنے قیام کے تھوڑے عرصے بعد ہی اپنی صلاحیتوں کا ایسا لوہا منوایا جس نے تمام عالَم کو دنگ کردیا۔ بات کی جائے کھیلوں میں پاکستان کے ماضی کی تو یہ کافی حسین لمحات اور باوقار کارگردگی سے بھرا ہوا ہے۔ موجودہ دور کے بر عکس ماضی میں پاکستان کا شو کیس کئی اہم عالمی تمغوں، ٹرافیوں اور ایوارڈز سے بھرا رہا ہے۔ یہ وہ دور تھا جب پاکستان نے متعدد کھیلوں میں اپنا آپ دنیا کو ثابت کیا اور عالم کو ابھرتی ہوئی ”سپورٹس نیشن“ کا پیغام دیا۔