یہ اکتوبر کی کوئی درمیانی دوپہر تھی اور ہم چار دوستوں کا مختصر قافلہ سانگھڑ سے کچھ دور نارا کینال کے دائیں جانب برٹش دؤر کی اس یادگار کو دیکھنے چل پڑا تھا، جس یادگار کو آج ایک اجڑا ہوا دیار کہا جاتا ہے۔ سندھ کے انتہائی مشرق میں جو صحرا ہے اس کو ”اچھڑو تھر“ اس وجہ سے بولا جاتا ہے کہ وہاں کے جغرافیائی خد و خال اور لینڈ اسکیپنگ سندھ کے بالائی مشرقی صحرائے تھر سے بالکل مختلف ہے۔ وسیع و عریض ریتلے میدان، جن کو بہتا ہوا صحرائی سمندر بھی کہا جاتا ہے۔