نواز شریف بمقابلہ عمران خان

چلیں ایک موازنہ کرتے ہیں۔ عمران خان اور نواز شریف کا۔ ویسے دونوں کا موازنہ کرنا ایسا ہے جیسے سورج کو چراغ دکھانا۔ سورج اور چراغ کا موازنہ کوئی کرے بھی تو کیسے؟ ایک منٹ چیف صاحب! گالی نہیں۔ میری کیا مجال کہ ان دونوں عالی جاؤں میں سے ایک کو چراغ دوسرے کو سورج قرار دوں۔ یہ نیک کام عاشقانِ عمران خان اور دل گرفتگانِ نواز شریف اپنی اپنی سہولت کو مدنظر رکھ کر خود ہی کر دیں تو بہتر ہوگا.

ویسے نواز خان اور عمران شریف؛ ارے یہ کیا ہوا دونوں نامیوں کے اسماء گرامی کے لاحقے آپس میں گڈمڈ ہوگئے۔ معزرت چاہتا ہوں، حالانکہ اس سے کچھ زیادہ فرق نہیں پڑھنا چاہئے کہ نام میں کیا رکھا ہے، اصل چیز تو کام ہے اور ماشاءاللہ دونوں اس حوالے سے نادرِ روزگار بلکہ نابعانِ روزگار ہیں۔

ہم روحِ سفر ہیں ہمیں ناموں سے نہ پہچان

کل اور کسی نام سے آجائیں گے ہم لوگ

اگر آپ غور کریں تو اب تک یہ دونوں کتنے ہی ناموں سے ہمارے سامنے آئے ہیں۔ نواز شریف آئے تو جنرل جیلانی کا نام زبان زدِ خاص و عام ہوا۔ جنرل ضیاء کے نام کی مالا جپتے تھے۔ جنرل ضیا کوچ کر گئے تو ان کے نامکمل مشن کو مکمل کرنے کا بھیڑہ اٹھایا۔ پھر عورت کی حکمرانی سے ملک کو بچانے کے لئے آئی جے آئی کا نام خوشی خوشی اپنا لیا۔ جنرل مشرف کا کلہاڑا سر پر برسا تو جمہوریت کا نام اپنے نام کرلیا۔ پانامہ کا شور اٹھا تو ووٹ کا نام سامنے لے کر آئے۔ پانامہ کی بدولت ایک دن بیٹھے بیٹھے ان پر انکشاف ہوا کہ وہ تو خیر سے نظریاتی ہوگئے ہیں۔ نظریے کا نام استعمال ہونے لگا۔ قائداعظم ثانی تو ماشاءاللہ کافی پہلے ہوگئے تھے۔ نام ابھی اور بھی بہت سے ہیں۔ آگے آگے دیکھیئے ‘رکھتا’ ہے کیا

خان صاحب خیر سے عمران کے نام سے مشہور ہیں لیکن ساتھ ہی ساتھ احمد نیازی بھی ہیں۔ ویسے یہ نیازی نام شاید خان صاحب بھول گئے ہیں تب ہی تو شہباز شریف کو بار بار یاد دلانا پڑ رہا ہے۔ ان کا سب سے اچھا اور مناسب نام ہیرو ہے۔ پاکسان کی تاریخ میں ملک اور ملک سے باہر ایک ہیرو کی جو شہرت خان صاحب کو ملی وہ شائد ہی کسی کے حصے میں آئی ہو۔ دبنگ خان ان کا ایک اور نام تھا جس کی کرکٹ کی دنیا میں ان کی کپتانی کے دور میں چرچا ہوا۔ شوکت خانم ان کی زندگی سے جڑا ایک ایسا نام ہے جس کے اثرات ان کی زندگی پر سب سے زیادہ ہیں۔ اسی نام سے منسوب کینسر ہسپتال ایک بیٹے کا ماں سے محبت کا ایسا شاہکار نمونہ ہے جس پر ہر بیٹا اور  ماں فخر کر سکتے ہیں۔

ایک اور کانوں (خان صاحب کے) میں رس گھولتا نام وزیراعظم ہے۔ یہ نام ورلڈ کپ جیتنے اور کینسر ہسپتال  بنانے کے دوران اور بعد میں ہر اس جگہ گونجا جہاں خان صاحب جلوہ افروز ہوئے۔ اسی نام کو پا لینے کے جستجو میں خان صاحب نے قوم کو انصاف، احتساب، غیرت اور میرٹ جیسے دلفریب نعرے دئے لیکن جب بات بنتی نظر نہ آئی تو خود ہی ان کا گلا دبانے کے لئے آگے بڑھے اور کمال سرعت اور ڈھٹائی سے ان کا خون کر ڈالا۔ وزیراعظم شائد واحد نام ہے جس کے لئے خان صاحب کی محبت کبھی کم نہ ہوئی۔ نوازشریف کے نام کے ساتھ وزیراعظم کا نام تین دفعہ آیا اور خان صاحب نے اسی کے حصول کے لئے پاکستانی سیاست میں کمال مہارت کے ساتھ چوروں کو الیکٹیبلز کا نام دیا۔ ایک اور نام جو خان صاحب کا پڑا اور شہرت حاصل کی وہ ہے کپتان۔ اس نام کا شاید خان صاحب کو یہ نقصان ہوا کہ سیاست کو بھی کرکٹ کا میدان سمجھ لیا اور جس طرح وہ کرکٹ کی کپتانی میں کھلاڑیوں کو بغیر کسی وجہ کے اندر باہر کرتے رہتے وہی چلن میدانِ سیاست میں بھی اپنایا، تب ہی تو ان کے پرانے ساتھی ہر وقت رونا روتے ہیں کہ تم بھول گئے ہر بات۔ خان صاحب کا ایک اور نام جس سے آج کل وہ اور ان کے حامی چھڑتے ہیں پلے بوائے تھا لیکن جانے دیں خیالوں میں  سر پر جناح کیپ شیروانی میں ملبوس اس نام سے کراہت سی آتی ہے۔

روحِ سفر تو واقعی دونوں ہیں۔ ہماری سیاست دونوں کے بغیر ایک قدم آگے نہیں بڑھ سکتی، تب ہی تو آپ دیکھئے مملکتِ خداداد کس طرح ترقی کی جانب گامزن ہے، گامزن کیا زقندیں بھر رہی ہے۔ دونوں میں جو گھمسان کا رن پڑا ہے اس نے خوامخواہ دونوں کے چاہنے والوں کو آپس میں مشت و گریباں کر دیا ہے۔ دونوں صاحبان دراصل پاکستان کی اونچی اڑان میں اپنا حصہ ڈالنے کے لئے بے چین و بے قرار ہیں کہ تاریخ میں دونوں ہی اپنا نام سنہرے حروف سے لکھنا چاہتے ہیں۔ یہ تو  بے وقوف عوام اپنے اپنے لیڈرز کی محبت میں ایک دوسرے کو یوتھئے اور پٹواری جیسے خطابات دے رہی ہے۔